Ebreos 1 - Biblia ande chib Romani

O Del dia orba

¹ Cherel but burs palpale o Del dia orba but droma ta bute orbenchar amare puranenge katar e poraukura.

² Ta akana, ande llivesa kai si mai anglune so vou mangla te phenel amenge phenda le leko Chavo, ta letar cherdile sa e ezgode kai si, ta cherda le te avel o Gazda pe sa e ezgode.

³ O Chavo sikavel amenge o baripe e Devleko, soke vou si isto sar si o Del ta si pe suako ezgoda, ta pe bare zoriaia cherel sa e ezgode te avel len zivoto; ta vou cherda te prostil amen o Del katar amaro bilachipe, ta mapalal llelo ando miloso ta beslo pe rig e chachi e Devleki, kote kai si leki charoina.

⁴ Ta vou cherdilo mai baro neko e suechura ta die le iek anav kai si mai baro neko lengo.

⁵ Soke nikada o Del ni phenda iekhe suechoke: Tu san mo chaurro, Ta katar gava llive me sem cho dad. Ta nikada ni phenda iekhe suechoke: Me ka avav leke sargo iek dad. Ta vou ka avel mange sargo iek chaurro.

⁶ Ta kana bichalda ande gaia phuv pe Chaurre phenda te cheren gia: Sa me suechura te blagosin le.

⁷ Ta i o Del kana del orba cheres e suechura phenel: Me suechura si e balav, ta me esluge si e esterliche.

⁸ A kana del orba katar po Chaurro, phenel: Chi charoina Devla si ostade, ta si iek charoina chachimaki.

⁹ Volisardan o lachipe ta murzisardan po bilachipe, goleke esvirisarda tut o Del, chiro Del, ta pherda tut veselia: mai but neko e llenen kai san lenchar ande iek than.

¹⁰ Ta i phenel: Tu Gazda, cherdan e phuv mai anglal; isto tu cherdan o miloso.

¹¹ Sa gala ezgode ni ka aven ios, a tu ka ave ostade. Sa gala ezgode ka phurion sargo e patave.

¹² ¡Ta ka bangare len sargo e patave, ta ka pharruve len sargo kana iek lleno thovel aver patave pe pete! A tu san isto gua, a cho zivoto ni ka merel.

¹³ O Del nikada ni phenda ni iekhe suechoke: Bes pe mi chachi, lligo ni ka cherav che dusmanonen te aven telal katar che porrne.

¹⁴ Soke sa e suechura si duura kai si esluge e Devleke: ta bichalel len te pomozin golen kai ka len o braduipe.