Deuteronomio 2 - Biblia ande chib Romani

E bursa po pusto

¹ Mapalal llelamtar po pusto katar o drom katar e Mora e Loli, gia sar o Del phendaia mange ta but vreme phirdam truial e burdura katar o Seir.

² Ondaka o Del phenda mange:

³ Tumen ia inllaren but vreme kai phiren truial e burdura irin tumen ando norte.

⁴ Phen e foroke gia: tumen ka nakhen katar e phuv katar tumare phlal e chaurre katar o Esau, kai zivin ando Seir von ka daran tumendar. A tumen arakhen tumen.

⁵ Ta na maren tumen lenchar, soke me ni ka dav tumen ni iek kotor katar goia phuv, soke e burdura katar o Seir si e phuv katar e chaurre katar o Esau. Me diem la lenge.

⁶ Tumen ka mangen lendar te bichinen tumenge o jape kai trubul tumen ta ka pochinen lenge ta i o pai kai ka pien.

⁷ O Del tumaro Gazda blagosisarda tumen pe sa so cherden. Ande gala saranda burs o Del saia tumenchar ta arakhla tumen pe gava baro pusto ta niso ni trubusarda tumen.

⁸ Mapalal durilam katar e phuv katar amare phlal kai si e chaurre katar o Esau kai zivin ando Seir ta llelam truial katar o drom katar o Araba katar o Elat ta o Ezion Geber ta irisailam ta istardam o drom katar o pusto katar o Moab.

⁹ Ondaka o Del phenda mange: Na amisao ta na martut e moabitenchar soke si katar e vicha e Loteki, ta ni ka dav tut ni iek kotor katar lengi phuv, soke e phuv katar o Ar diem la lenge.

¹⁰ Ande gaia phuv omanglal zivina e Emitas, kai sea llene bare ta baro sueto ta bare sargo e chaurre katar o Anak.

¹¹ E llene mislina kai von sea refaitas, a e moabite ikharena len emitas.

¹² Ande gaia phuv katar o Seir omanglal zivina e Joreosura, a e chaurre katar o Esau tradie len petar ta von zivisarde ande lengi phuv gia sar cherde e israelita ande phuv kai o Del dia len.

¹³ Ta akana phenda o Del, akana thoven tumen te piren ta nakhen o pai katar o Zered. Ta ondaka nakhlam o pai.

¹⁴ Ta katar likistam katar o Kades Banea llik o llive kai nakhlam o pai katar o Zered, nakhle tranda ta ojto burs. Ande gua vreme mulia sa e vicha katar e llene kai marenape kai saia ando pero, gia sar o Del jalaia la sovel.

¹⁵ Ta i o va e Devleko pela pe lende lligo ni zatrisarda len.

¹⁶ Ta avilape kai kana mule sa e llene kai marenape maskar o foro,

¹⁷ O Del dia manchar orba ta phenda mange:

¹⁸ Allive tu ka nakhe e phuv katar o Moab ta ka lle karing o Ar,

¹⁹ a kana ka malado e chaurrenchar katar o Amon na amisao lenchar ta na mar tut lenchar, soke ni ka dav tut ni iek kotor katar lengi phuv, soke e phuv dien la e chaurrenge katar o Lot.

²⁰ Ta i gaia phuv pinllarena la kai saia katar e refaitura, soke omanglal zivisardea kote e refaitura, kai e amonitura ikharena len zamzumitura.

²¹ Von sea iek foro baro ta bute llenengo ta manusa bare sargo e chaurre katar o Anak.

²² Ta o Del cherda isto gia sar cherda e chaurrenchar katar o Esau kai zivina ando Seir ta kai zatrisarde e Joreosuren te sai zivin kote.

²³ Isto gua nakhle e jeveosura, kai zivina ande forichura pasa e Gasa ta kai zatrisarde len e filisteusura, kai avilea katar e Kreta ta achile kote te zivin.

²⁴ ¡Aven phenda o Del, thoven tumen te phiren ta nakhen o pai katar o Arnon! Me ka cherav te peren ande tumare va amorreura o Sijon, kai si o charo katar o Jesbon ta leke phuvia. ¡Nakhen ande lengi phuv ta maren tumen lenchar!

²⁵ Allive ka cherav angla tumende sa e forura katar e phuv te izdran daratar. Kana ka asunen kai den tumari orba ka thovenpe te izdran ta e dar ka avel pe lende angla tumende.

O Israel dobil e charo katar o Sijon

²⁶ Katar o pusto katar o Kademot bichaldem poroka e charoke katar o Jesbon pala nesave lene, te phenav leke lachimaia gaia orba:

²⁷ Misliman te nakhav katar chi phuv katar o drom o baro ta te na dodiu ni so katar chi phuv.

²⁸ Ka pochina chuke lovenchar o jape kai trubula amen ta i o pai kai ka pia. Samo mangav tutar te muke amen te nakha phirindo,

²⁹ gia sa mukle amen te chera e chaurre katar o Esau kai zivin ando Seir ta e moabite kai zivin ando Ar. Morabi te nakha o Jordan ta te ava kai e phuv kai o Del amaro gazda ka del amen.

³⁰ A o charo Sijon ni mukla amen te nakha katar pi phuv, soke o Del tumaro Gazda cherda vou te na mukel amen, te sai thovel le ande tumare va, gia sar si llik akana.

³¹ Ondaka o Del phenda mange: Akana dav tut o Sijon ta sa leki phuv lla ta lela chuke.

³² O Sijon likisto te maladol amenchar sa pe boñikonenchar, te sai marelpe amenchar ando Jajas.

³³ A o Del amaro gazda cherda le te perel ande amare va ta dobisardam le, leke chaurren ta sa leke boñikonen.

³⁴ Ondaka liam sa lenge forura ta sa zatrisardam sa lenge forura ta lenge murusen, lenge diskinien ta i lenge minonen. Ni muklam nika llundo.

³⁵ Samo liam amenge e zivirinien ta e ezgode kai si kuch kai maladam ende forura kai liam.

³⁶ De katar o foro katar o Aroer, kai si pasa o pai katar o Arnon ta o foro kai si ande umal llik o Galaad, ni saia foro te na sel katar amare va, sa e forura o Del amaro gazda dia len amenge.

³⁷ Samo phuvia kai ni lliam si gala: E phuv katar e amonitas sa e phuv katar o pai katar o Jabok, e forura kai si pe burdura ta sa ogola phuvia kai o Del amaro gazda ni phenda amenge te la.