Daniel 9 - Biblia ande chib Romani

O Daniel molilpe pala po foro

¹ Ando purvo burs katar o gazdaripe e Darioko, chaurro katar o Asuero, kai saia katar e vicha katar e medura, kai reslo te avel charo pe charoina katar e kaldeura,

² ando purvo burs kana vou charoila, me o Daniel dikhava ande lila e bursa kai phenda o Del e Jeremiaseke, cheres e eftavardes burs kai saia te nakhel o Jerusalem ande zatranie.

³ Ondaka thodem mo mui karing o Del amaro Gazda, rodiem le ando molipe ta ando alluno, thodem patave zalosne ta beslem po prajo.

⁴ Ta molisailem e Devleke mo Gazda ta phendem leke so saia ande mo lio gale alavenchar: Devla Gazda barea, kai si tut sa e zor, kai kana de cho alav chere le ta sikave cho volipe e llenenge kai volin tut ta kanden che alava,

⁵ amen cherdam o bilachipe ni kandiam ta durilam katar che zakonura ta katar che alava.

⁶ Ni thodam sama che slugenge e poraukura, kai ande cho anav die orba amare charonenge ta amare llenenge kai gazdarina, ta amare puranenge ta sa e foroke katar e phuv.

⁷ Chiro si o chachipe ta amaro si o lallao. O lallao kai allive si sa e llenenge katar o Juda ta sa e llenenge kai zivin ando Jerusalem ta sa o Israel, gola kai si pase ta gola kai si dur ande sa e phuvia kai tradian len cheres lengo bilachipe, soke vazdinaile pe tute.

⁸ Ioi Devla, amaro si o lallao ta amare puranengo ta amare gazdengo ta amare charonengo, soke sa cherdam o bilachipe chuke.

⁹ A tu amaro Del ta amaro Gazda, si tut volipe ta prostipe, i kana amen vazdinailam pe tute

¹⁰ ta ni kandiam o avazi e Devleko amaro Gazda te sai kanda leke zakonura kai vou anda angla amende pe profetonenchar leke sluge.

¹¹ Sa o Israel ni kandia cho zakono ta durilo te na kandel cho avazi, goleke pela pe amende e armaia ta e sovel kai si pisime ando zakono e Moiseseko, sluga e Devleko, soke cherdam chuke o bilachipe.

¹² Ta tu cherdan te peren pe amende sa che alava soke amen ni kandiam so phendan amenge, ta ni amare gazda ni kandie tut. Goleke avilo gava baro bilachipe pe amende soke nikada ni cherdila telal katar o miloso iek bilachipe gia baro po Jerusalem.

¹³ Sa gava bilachipe avilo pe amende, gia sar si pisime ando zakono e Moiseseko. Ta amen ni manglam tutar Devla amaro Gazda, te muka amaro bilachipe ta te lla pala cho chachipe.

¹⁴ Goleke tu Devla, dikhlan amaro bilachipe ta cherdan te perel pe amende, soke tu Devla amaro Gazda san chacho pe sa e ezgode kai chere, a amen ni kamlam te asuna tut.

¹⁵ Akana Devla amaro Gazda, tu kai sikadan chi bari zor kana ikandan katar o Ejipto che foro, ta cho anav cherdilo pinllardo llik allive, a amen cherdam o bilachipe.

¹⁶ Devla, amen llana kai tu san lacho. Manga tutar te trade katar o Jerusalem chi joli, soke vou si cho foro, cho santo burdo. Sa e llene katar e phuvia kai si truial maren espurnia katar o Jerusalem cho foro, pala amaro bilachipe ta pala o bilachipe amare puranengo.

¹⁷ Akana Devla, asun o molipe katar cho sluga ta so mangel. Ta pala cho volipe, cher cho mui te klichil pe cho santuario kai si zatrime.

¹⁸ ¡Thou sama Devla, ta asun amen! ¡Putar che akha ta dik amari zatrania ta po foro katar mangliol tutar! Moli amen chuke, na soke si amen vera ande amaro lachipe, moli amen soke si amen vera ande cho baro volipe.

¹⁹ ¡Devla, Devla! ¡Asun amen, prostisar amen! ¡Thou sama Devla ta cher le oma pala chiro volipe, soke ande gava foro molinpe chuke, ta i che manusa cheren le!

E porauka katar e eftavardes semane

²⁰ Kana me moliva man ta phenava mo bilachipe ta o bilachipe katar mo foro o Israel, ta moliva man pala leko santo burdo.

²¹ Ta kana moliva man, o Grabiel kai sikadiloia mange omanglal sargo ando suno, avilo furiando oma kote kai sema kana saia o saiato kai delpe o kurbano pasa e racha.

²² Ta cherda man te acharav ta phenda mange: Daniel avilem akana te dav tut bizaipe ta te achare.

²³ Kana thodan te moli tut phendilo o alav ta me avilem te sikavav tut, soke o Del volil tut but. Asun o lav ta achar so dikhlan sargo ando suno.

²⁴ Eftavardes semane si chinade pe cho foro ta po santo foro katar o Jerusalem, ta te gotovil o bilachipe ta te thovel o son e bilachimake, ta te lel o prostipe katar o bilachipe ta te anel o chachipe ostade, ta te sellilpe so dikhila sargo ando suno ta e poroka, ta te unjin e Santo katar e santura.

²⁵ Morabi te llane ta te achare gaia ezgoda: Kai kana ka likel o alav te lachardol ta te vazdiniaol o Jerusalem llik o Mesias Gazda, ka aven efta semane ta sovardes ta dui semane pale ka vazdiniaol e plasa ta o zido ande vremura dukhade.

²⁶ Ta mapalal katar e sovardes ta dui semane ka len o zivoto katar o Mesias na vou petar. O Jerusalem ta o cher e Devleko ka aven zatrime ta o foro katar iek charo kai ka avel ka zatril o foro ta o santuario, ta leko son ka avel bare paiea, ta llik o son katar o maripe ka aven e zatranie.

²⁷ Ta pala aver semana ka chachare po alav kai dia bute llenenchar, pala o dopas katar e semana ka achavel e kurbanura ta e ofrende. Mapalal bute bilachimaia ka avel gua kai zatril lligo ni ka avel o son ta so si chinado te perel pe gua kai zatril