Daniel 7 - Biblia ande chib Romani

Sargo ando suno dikhon star azdave

¹ Ando purvo burs katar e charoina katar o Belsasar ande Babilonia, o Daniel dikhla iek suno ta sikadila leke ande leke mislura ezgode sargo ando suno. Gala ezgode nakhla kana saia inzardo ande pi soba, mapalal pisisarda o suno ta e ezgode mai preche katar gua suno. Gava si so pisisarda ta gava si so phenda:

² Me dikhava sargo ando suno orachaia kai e star baliava e milosoke marenape ande bari mora.

³ Ta star azdave bare, kai ni iek lendar ni saia sargo aver, likena katar e mora.

⁴ E purvi azdava dikhola sargo liono ta sea la pakha sargo e agilaki. Me dikhava pe late lligo ni ikande lake pakha, ta vazdie la katar e phuv ta cherde la te ustel pe pe porrne sargo e manusa, ta diape lake iek lio manuseko.

⁵ Ta dikhlem iek duito azdava kai dikhola sargo iek melledo kai vazdiniaola mai but pe iek rig neko pe ogoia rig ta saia ande lako mui trin pasuare maskar e danda. Ta asundem kai phende lake gala alava: Uste, ja but mas.

⁶ Pamalal katar gava dikhlem iek trito azdava kai dikhola sargo iek leopardo, stare pakhenchar pe pe zea sargo chirikliake ta i saia la star sore, ta diape lake e zor te gazdaril.

⁷ Ta isto ande goia riat, kana dikhava gala ezgode sargo ando suno, dikhlem iek starto azdava, kai dela dar ta saia la iek zor but bari ta saia la iek danda bare sastrune, jala ta drobola ta so achela ustavela le pe porrnenchar. Voi saia iek azdava kai ni saia prema ogola azdave kai dikhlema, ta saia la des singa.

⁸ Kana me dikhava e singa, dikhlem kai maskar lende likela iek sing mai minoni ta angla late sea ikande trin singa katar e purve, ta gaia sing saia la akha sargo manuseke ta iek mui kai dela bare orbe.

E kris e Devleki

⁹ Ta me dikhava lligo ni sea thode tronura, ta iek Phuro llivesengo beslo. Leke patave sea parrne sargo iv, ta e bal katar leko soro sea sargo e bakrenge bal chiste. Ta leko trono plameko iagako ta leke tochkura iag kai phabola.

¹⁰ Ta iek len iagaki likela angla lete. Ta milia ta milia radina leke, ta millonura ta millonura sea angla lete, ta o krisari beslo, ta e lila putaile.

¹¹ Ondaka me dikhava cheres e bare alava kai dela orba e sing, dikhava lligo ni mundarde e azdava ta laki esnaga drobosarde la ta die la te phabardol ande iag.

¹² Ta i lie katar ogola azdave lengo gazdaripe, a saia lenge dino te zivin nesavo vreme.

¹³ Me dikhava sargo ando suno orachaia kai avela maskar e oblakura e milosoke iek sargo chaurro e manuseko kai avilo llik kai o Phuro llivesengo, ta cherde le te avel pase angla le.

¹⁴ Ta saia leke dino o gazdaripe, o baripe ta e charoina te sai sa e forura, phuvia ta chibia te blagosin le. Leko gazdaripe si iek gazdaripe ostade, kai nikada ni ka nakhel ta leki charoina nikada ni ka avel zatrime.

¹⁵ Mo duo achilo chudo, ta me o Daniel achilem sargo nasualo pala e ezgode kai dikhlem sargo ando suno kai avile ande mo soro.

¹⁶ Ondaka avilem pase katar iek kai saia kote pe porrne, ta phendem leke te sikavel mange o chachipe katar sa gala ezgode. Ta vou dia orba manchar ta sikada mange so phenen gala ezgode.

¹⁷ Gala star bare azdave si star charura kai ka vazdiniaon pe phuv.

¹⁸ Ta mapalal ka len e charoina e santura e bare Devleke, ta ka len e charoina sa e bursenchar ostade.

¹⁹ Ondaka manglem te llanav mai but cheres e starto azdava kai ni saia sargo ogola azdave kai dela dar, ta kai lake danda sea sastrune, ta lake unlle sea tuchne. Suako ezgoda jala ta drobola, ta so achela ustavela le pe porrnenchar.

²⁰ Ta me manglem te llanav cheres e des singa kai saia la po soro, ta katar e sing minoni kai saia la akha ta iek mui kai dela bare orbe ta kai dikhola mai bari neko ogola singa, ta katar e trin singa kai peletar angla la.

²¹ Ta me dikhava kai gaia sing marelape e santonenchar ta dobila len,

²² lligo ni avilo o Phuro llivesengo ta diape e kris kai e santura e bare Devleke, ta avilo o vreme ta e santura lie e charoina.

²³ Ta phenda gia: E starto azdava ka avel e starto charoina kai ka avel pe phuv, kai ni ka avel sargo ogola charoine, ta sa e phuvia ka jal ta ka drobol ta ka chinen len pe kotora.

²⁴ A e des singa si kai katar goia charoina ka vazdiniaon des charura, ta pala lende ka vazdiniaol aver kai ni ka avel sargo ogola purve, ta trinen charonen ka peravel.

²⁵ Ta ka del orbe bilache e bare Devleke, ta e santonen e bare Devleke ka peravel. A ka mislilpe te parruvel e vremura ta o zakono, ta ka aven dine ande leke va llik o vreme ta e vremesura, ta o dopas katar o vreme.

²⁶ A ka besel o krisari ta ka len leko gazdaripe te sai avel zatrime ta zatrime llik kai o son,

²⁷ ta e charoina, ta o gazdaripe, ta o baripe katar e phuvia kai si telal katar sa o miloso te avel dino e foroke katar o Del o baro, kai leki charoina si iek charoina ostade, ta sa e charoine katar e phuv ka radin leke ta ka kanden le.

²⁸ Kate gotovil e orba. A me o Daniel achilem but brigime, ta mo mui galbenisarda. Ta nikake ni phendem gala ezgode.