Daniel 5 - Biblia ande chib Romani

O pisipe po zido

¹ O charo Beltsasar thoda iek bari sinia pe milia birovenge, ta angla e milia piela mol.

² Ta sar o Beltsasar matiloa, bichalda te anen e tasura sunakune ta rupune kai leko dad o Nabukodonosor inllardaia peke katar o cher e Devleko kai saia ando Jerusalem, te sai pien ande lende o charo ta sa leke llene, leke diskinie ta leke lluvlia.

³ Ondaka ande e tasura sunakune kai andea katar o cher e Devleko kai saia ando Jerusalem, ta pile ande lende o charo, leke gostura, leke diskinie ta leke lluvlia.

⁴ Pile mol ta blagosisarde pe delen sunakune, rupune, tuchne, sastrune, kastune ta barrastune.

⁵ Isto ande gua saiato sikadile e naia katar iek va manuseko, kai pisila angla o kandelero po zido katar o cher e charoko, ta o charo dikhela o va kai pisila.

⁶ Ondaka leko mui galbenisarda ta leke mislura briginale, jasarda pi zor ta leke changa izdrana daratar.

⁷ O charo urkisarda zurale ta phenda te anen e llenen kai cheren chirimate, e llenen kai phenen so ka avelpe mai angle ta e llenen kai sikon katar e cheraia. Ande len. Ta phenda o charo e bizaenge: Vareko te chidila so si kote pisime ta te phenela mange so phenel, ka avel furiado ando lolipe ta iek lancho sunakuno ka avel pe leki korr, ta ka avel o trito lleno mai baro ande charoina.

⁸ Ondaka sa e bizai kai radina e charoke nakhle ande soba ta niko nasti chitisarda so saia pisime, ta niko nasti phenda e charoke so phenela gua pisipe.

⁹ Ondaka o charo Beltsasar achilo but brigime ta leko mui galbenisarda, a leke birovura ni llanena so te cheren.

¹⁰ A e charoina kana asunda e alava katar o charo ta katar leke mai preche llene, dia ande soba kai thovena e sinia ta phenda: ¡O charo te zivil ostade! ta te na brigilpe ta te na galbenil leko mui,

¹¹ soke ande chi charoina si iek lleno kai ande lete zivil o duo e santune delengo, ta ande llivesa che dadeke ande gua lleno maladila o villelo ta o bizaipe, o bizaipe sargo e delengo kai cho dad o charo Nabukodonosor thoda le pe sa e bizai, pe sa e chirimatarke, pe sa e llene kai dikhen so si te avelpe ta pe sa e llene kai sikon katar e cheraia,

¹² soke ando Daniel maladila iek duo mai bizai te acharel ta te phenel so phenen e sune, te acharel e alava kai aver llene ni acharen, te del pe gor ta te lacharel but ezgode. Gua lleno si o Daniel, kai cho dad thoda leko anav Beltsasar. Goleke charo, bichal te ikharen e Daniele ta vou ka phenel chuke so phenel o pisipe po zido.

¹³ Ondaka ande e Daniele angla o charo, ta o charo phenda leke: ¿San tu o Daniel kai mo dad anda katar o Juda, kai avilo phanglo maskar e llene katar e Juda?

¹⁴ Me asundem kai o duo e delengo si ande tute ta kai ande tute si mai but villelo, achardipe ta bizaipe.

¹⁵ Soke akana ande angla ma bizaen ta llenen kai sikon katar e cheraia te sai chitin gava pisipe ta te phenen mange so phenel, a von nasti sikade mange so phenel.

¹⁶ A me asundem tutar kai tu sai chiti gava pisipe po zido ta kai sai phene mange so phenel, te cherdan le, ka ave furiado ando lolo ta ka thoven pe chi korr iek lancho sunakuno, ta ka ave o trito lleno kai ka gazdaril ande charoina.

¹⁷ Ondaka o Daniel phenda e charoke: Glamno charo, achi che ezgodenchar ta de avere gaia pachiu. Me ka chitiv e charoke so si pisime po zido ta ka phenav chuke so phenel.

¹⁸ O Del o baro dia che dade e Nabukodonosore e charoina, e zor, o baripe ta o gazdaripe.

¹⁹ Pala e zor kai die le sa e forura, e phuvia ta e chibia, izdrana daratar angla le. Vou lela o zivoto o dela le kake vou mangela, averen bariarela a averen mukela len ando lallao.

²⁰ A kana leko lio pherdilo baripe ta leko duo zurailo ande po baripe, saia ikando katar pi charoina ta ikando katar po baripe.

²¹ Ta avilo tradino maskar e manusa ta leki golli cherdile sargo e ziviriniengi, ta zivisarda e magarchenchar katar e burdura, cherde le te jal char sargo e guruva ta leki esnaga chingola kana pechalapeke, lligo ni dia pe gor kai o Del o baro si kai gazdaril pe charoine e manusenge, ta thovel pe lende ka vou mangela.

²² A tu, leko chaurro o Beltsasar ni muklan o baripe katar cho lio kana llane sa gala ezgode,

²³ ta vazdinailan po Del e milosoko, pe gachin baripe cherdan kai cherdan te anen e tasura katar o cher e Devleko ta tu che gostura, lenge diskinie ta lenge lluvlia pile mol ande lende. Ta ni cherdan samo gaia ezgoda, blagosisardan delen cherde katar o rup, katar o sunakai, katar o tuch, katar o sastri, katar o kas ta katar o barr, ¡dela kai ni dikhen, kai ni asunen niso ta ni llanen niso! A tu charo nikada ni blagosisardan e Devle kai ande leke va si cho zivoto ta kai leke si sa che droma.

²⁴ Goleke o Del bichalda o va kai pisisarda gala alava:

²⁵ MENE, MENE, TEKEL, UPARSIN.

²⁶ Gava si sophenen gala alava, MENE: Llinda o Del chi charoina ta thoda lake son.

²⁷ TEKEL: O Del phariada tut ande iek balansa ta ni phariave so saia te phariave.

²⁸ PERES: E charoina e charoki avila fuladi ta avili dini e phuvienge kai ikhardon medo ta persa.

²⁹ Ondaka o charo Beltsasar phenda te furiaven e Daniele lole patavenchar, te thoven pe leki korr iek lancho sunakuno ta te phenen sa e llenenge kai si o trito lleno kai gazdaril ande charoina.

³⁰ Isto ande goia riat mundarde e Beltsasare, charo katar e kaldeura,

³¹ ta e charoina achila ande va katar o Dario katar e Media, kana saia leke sovardes ta dui burs.