Daniel 4 - Biblia ande chib Romani

O dilipe katar o Nabukodonosor

¹ Me o Nabukodonosor mangav e pas ta e baj e llenenge katar sa e phuvia ta e chibia kai zivin pe sa e phuv.

² Mangav tumen te llanen sa e bare ezgode devlikane kai o Del o baro cherda manchar.

³ ¡Gia bare si e ezgode devlikane kai cherel te dikhon! Leki charoina ka avel ostade ta leko gazdaripe ka avel pe iek vicha ta i pe ogola viche kai ka aven.

⁴ Me o Nabukodonosor ziviva esmiro ande mo cher.

⁵ A iek llive kana sema inzardo po kerveto dikhlem iek suno kai darada man ta avile pe ma mislura, ta sikadila mange ezgode sargo ando suno kai mukle man but darano.

⁶ Goleke bichaldem te aven angla ma sa e bizai katar e Babilonia te sai phenen mange so phenel gua suno.

⁷ Ta avile e chirimatarkura katar e Babilonia, e llene kai sikon katar e cheraia ta e llene kai phenen so ka avelpe, ta me phendem lenge o suno, a von nasti phende mange so phenela gua suno.

⁸ Lligo ni avilo angla ma o Daniel, kai leko anav si Beltsasar, sargo anav me deleko kai ande lete zivil o duo e delengo kai si sante. Ta angla lete phendem o suno gale alavenchar:

⁹ Beltsasar birovi katar e llene kai sikaven so si te avelpe, me llanav kai o duo santo e delengo sikavel tut ta kai llane e ezgode gurudine. Sikav mange so dikhlem ando suno ta so phenel.

¹⁰ Gala si ezgode kai dikhlem ande mo soro kana sema pe mo kerveto: cherdolape mange kai dikhava maskar e phuv iek kas kai saia but baro.

¹¹ O kas barilo ta cherdilo but zuralo, resela llik kai o miloso, ta sai dikhola katar e riga e phuviake kai si mai dur.

¹² Leke patra sea but sukar ta dela but septelie kai sai pravarela saurren. E zivirinie e umaliake thovenape telal katar leki senka, pe leke krangura cherena kuibura e chiriklia ta o zivoto sa e suetoko pravardola letar.

¹³ Ta dikhlem sargo ando suno ande mo than, iek santo kai arakhel kai fuliela katar o miloso.

¹⁴ Ta bare avazea phenela: Peraven o kas, chinen leke krangura, ikanen letar e patra ta rispin leke septelie. Te nasen e zivirinie kai si telal katar leki senka, ta e chiriklia kai si pe leke grangura.

¹⁵ A muken samo leko thulipe kai si pe phuv ta leke zile, ta phanden len e lanchonenchar sastrune ta tuchne, ta muken le maskar e patra e umaliake. ¡Muken te pechal pe lete o pai, ta te bariol maskar e zivirinie ta maskar e patra e umaliake!

¹⁶ ¡Ta te parrudol leko lio manuseko ta te delpe leke iek lio ziviriniako ta te nakhen pe lete efta vreme!

¹⁷ E kris chinde la e suechura ta e santura phende te inllaren la angle, te sai llanen sa e manusa kai o Del si le e zor pe charoine e manusenge, kai vou del e charoina kake vou mangela te del la, ta cherel birovi katar iek phuv e llene kai si mai prosto.

¹⁸ Gava si o suno kai me o Nabukodonosor dikhlem. Akana, tu Beltsasar phen mange so phenel gava suno, soke ni iek bizai katar mi charoina ni acharda le, a tu sai soke ande tute si o duo e santone delengo.

¹⁹ Ondaka o Daniel kai ikharena le Beltsasar chudisailo iek saiato ta achilo darano katar e mislura kai avena ande leki golli. A me o charo phendem leke: Beltsasar na brigisao katar o suno kai dikhlem ni te phene so phenel. Ondaka o Beltsasar phenda leke: Murno gazda, o suno te perel pe che dusmanura ta so phenel te perel pe llene kai mangen chuke o bilachipe.

²⁰ O kas kai dikhlan kai bariola ta cherdola zuralo, kai resela llik kai o miloso ta kai dikhola katar sa e phuvia,

²¹ kai leke patra sea sukar ta dela but septelie kai resena te pravaren saurren, kai telal katar leki senka chidiniaona e zivirinie e umaliake ta pele krangura cherena kuibura e chiriklia e milosoke,

²² gua san tu charo kai barilan ta cherdilan zuralo. Gia barilan kai reslan llik kai o miloso ta chi charoina resla pe sa e phuv,

²³ a cheres o santo kai arakhel kai fuliela katar o miloso ta phenela: Peraven o kas, chinen leke krangura, a muken samo leko thulipe kai si pe phuv ta leke zile, ta phanden le e lancholenchar sastrune ta tuchne, muken te pechal pe lete o pai ta te bariol maskar e zivirinie ta maskar e patra e umaliake, ta te nakhen pe lete efta vreme,

²⁴ gava si so phenel o suno ta e kris e Devleki kai avila pe tute glamno charo:

²⁵ Ka traden tut katar e manusa, ta ka zivi maskar e zivirinie ta ka pravaren tut katar e char e umaliaki sargo e guruven, ta kana ka pechalpeke katar o miloso ka ave naiardo. Ta efta vreme ka nakhen pe tute, lligo ni ka llane kai o Del o baro si o gazda katar e charoina e manusengi, ta kai vou del goia charoina kake vou mangela.

²⁶ A katar o alav te muken o thulipe katar o kas ta leke zile pe phuv, gua si kai e cher e charoko ka achel zuralo kana tu charo ka siko kai ko gazdaril si o miloso.

²⁷ Goleke charo thov mange sama so phenav chuke: Lla chachimaia ta na cher ios o bilachipe, ta pomozisar e chorren. Te cherea le ka aven tut mai but burs ande pas charo.

²⁸ Sa gala ezgode avile po charo Nabukodonosor.

²⁹ A kana nakhle desudui chon, ta kana o charo phiravelape ande po cher ande Babilonia,

³⁰ ondaka o charo phenda: ¿Inai gaia e bari Babilonia kai me vazdiem te avel o cher e charoko ta cherdem le me zoriaia, te avel mo baripe?

³¹ Kana o charo dela orba asundilo iek avazi katar o miloso kai phenela: Asun gaia ezgoda charo Nabukodonosor. Chi charoina liape tutar,

³² ka ave tradino katar e manusa ta ka zivi maskar e zivirinie katar o vos, ta ka ja char sargo e guruva. Ta ka nakhen efta vreme pe tute lligo ni ka achare kai o Del o baro gazdaril pe charoine e manusenge, ta del la kake vou mangela.

³³ Ta isto ande gua saiato cherdile e alava po Nabukodonosor ta tradie le e manusendar ta jala char sargo e guruva ta leki esnaga chingola kana pechalapeke katar o miloso, barile leke bal sargo e bal katar e agila, ta leke unlle sargo e chiriklienge.

O Nabukodonosor sastol

³⁴ A kana avilo o son katar o vreme, me o Nabukodonosor dikhlem upre ando miloso ta avili mi golli mande. Ondaka blagosisardem e bare Devle kai zivil ostade gale alavenchar: Leki zor ka avel ostade ta leki charoina ka avel sa e bursenchar.

³⁵ Angla le e llene katar e phuv inai niso. Vou cherel pi volia ando miloso ta i pe phuv, ta inai niko te achavel leko va, ta te phenel leke: ¿So chere?

³⁶ Ta isto kote avili mande mi golli ta i mo baripe katar mi charoina. Ta mo liubao ta me llene kai gazdarina, ta kai radina mange rodie man, sema thodo pale pe mi charoina ta ios mai but baripe saia mange dino.

³⁷ Goleke me, o Nabukodonosor, blagosiv ta bariarav ta dav o baripe e charo katar o miloso, soke sa so cherel si chachipe ta leke droma chache, ta vou sai del ando lallao e llenen kai llan barimaia.