Daniel 3 - Biblia ande chib Romani

Braduime katar e furnava iagaki

¹ O Nabukodonosor phenda te cheren iek estatua sunakuni, ande umal kai ikhardol Dura, ande phuv katar e Babilonia, kai saia la tranda pole vazdini ta trin pole bulimatar.

² Mapalal o charo phenda te ikharen sa e llenen kai gazdarina pe goia phuv ta e llenen kai sea birovuria katar sa e boñikura, gola kai arakhen e love, gola kai sikaven averen ta i e krisaria, te sai aven pe pachiu kai o Nabukodonosor dia e estatuake kai cherda.

³ Ondaka o charo chidia sa e llenen kai gazdarina pe goia phuv ta e llenen kai sea birovuria katar sa e boñikura, gola kai arakhen e love, gola kai sikaven averen ta i e krisaria, te sai aven pe pachiu kai o Nabukodonosor dia e estatuake kai cherda ta sa sea pe porrne angla la.

⁴ O lleno kai saia te del orba, dia orba bare avazea ta phenda: Tumen forura ta phuvia ta chibia,

⁵ kana ka asunen e tuturuge, o firo, e sitara e arpa, o salterio, e sanponia ta suako ezgoda kai basaldol, ka thoven tumen changenchar te blagosin e estatua sunakuni kai o charo Nabukodonosor vazdia.

⁶ A vareko te na dela changa te blagosil la, ka chuden le isto kote ande iek furnava iagaki phabardi.

⁷ Goleke kana sa e phuvia kai sea chidine kote asunde e tuturuge, e firura, e sitare, e arpe, e salteriura, e sanponie ta aver ezgode kai basaldon, die changa angla e estatua sunakuni kai o charo Nabukodonosor cherdaia.

⁸ Ande gola llivesa nesave kaldeura avile te dosaren e judionen. Pala so llalape

⁹ llele kai o charo Nabukodonosor ta phende leke: Te zivil amaro charo ostade.

¹⁰ Tu charo thodan iek zakono kai suako manus kai asunela e tuturuga, o firo, e sitara, e arpa, o salterio, e sanponia ta suako ezgoda kai basaldol, te del changa ta te blagosil e estatua sunakuni,

¹¹ ta gua kai ni ka del changa te blagosil la, te chuden le ande furnava iagaki phabardi.

¹² A si nesave llene judiure kai thodan len te gazdarin pe phuv katar e Babilonia, von si: O Sadrak, o Mesak ta o Abednego, gala llene ni die tut liubao, ni blagosin che delen ta ni blagosin e estatua sunakuni kai vazdian.

¹³ Ondaka o Nabukodonosor but jolailo, ta bichalda te aven angla le o Sadrak, o Mesak ta o Abednego, ta gale llenen oma ande len kai o charo.

¹⁴ Ta o Nabukodonosor phenda lenge: Sadrak, Mesak ta Abednego ¿Si istina kai tumen ni blagosin me dele ta ni blagosin e estatua kai vazdiem?

¹⁵ Akana tumen, ¿mangen kana ka asunen e tuturuge, e firura, e sitere, e arpe, o salterio ta e sanponie ta aver ezgode kai basaldon, te den changa angla e estatua kai cherdem ta te blagosin la? Soke te na blagosin la, isto kote ka chuden tumen ande iek furnava phabardi, ¿ta savo del ka ikanel tumen katar pe va?

¹⁶ O Sadrak, o Mesak ta o Abednego phende e charoke: Nai soke te phena chuke so ka chera.

¹⁷ Tu charo ka dikhe kai amaro Del, kai sam leke esluge, vou sai braduil amen katar goia furnava phabardi ta i sai braduil amen tutar, glamno charo, ta katar chi zor.

¹⁸ A te na cherela le morabi te llane, glamno charo, kai amen ni ka blagosi che delen ta ni ka da changa angla e estatua sunakuni.

E trin chaurre si braduime katar e furnava iagaki

¹⁹ Kana o Nabukodonosor asunda gala alava leko mui lolilo jolinatar po Sadrak, po Mesak ta po Abednego, ta phenda te tataren e furnava efta droma mai but neko sar cherena le.

²⁰ Ta phenda e boñikonenge kai sea e mai zurale, te phanden e Sadrake e Mesake ta e Abednegone ta te chuden len ande furnava iagaki.

²¹ Ondaka gale ternen phangle len pe patavenchar, pe gertachenchar, pe minienchar ta pe dikhlenchar, ta chudie len ande furnava iagaki.

²² Ta sar o charo phendaia te sigaren te tataren but e furnava, o plameko mundarda e llenen kai chudiea e Sadrake e Mesake ta e Abednekone ande furnava iagaki.

²³ Kana chudie len von peletar phangle andre ande furnava iagaki.

²⁴ Ondaka o charo darailo ta ustilo oma ta phenda e llenenge kai pomozina le ande charoina: ¿Ni sea trin chaurren ternen kai chudie phangle ande furnava iagaki? Von phende leke: Ea gua si o chachipe charo.

²⁵ A me dikhav star chaurre terne kai inai phangle ta phiravenpe po maskaral katar e iag ta ni phabon, ¡ta o starto chaurro si sargo o chaurro e delengo!

²⁶ Kana phenda gaia orba o Nabukodonosor avilo pasa o udar katar e furnava phabardi ta phenda: Sadrak, Mesak ta Abednego, sluge katar o Del o baro. ¡Liken kotar ta aven kate! Ondaka o Sadrak, o Mesak ta o Abednego likiste katar e iag.

²⁷ Ta sa e sudura katar e phuv kai sea kote chidinaile te dikhen e ternen kai e iag nasti phabardaia lengi esnaga ta ni iek bal katar lengo soro. Lenge patave ni saia lenge niso ta ni khandena thuv.

²⁸ Ondaka kote o Nabukodonosor phenda: Blagosime te avel lengo Del katar o Sadrak o Mesak ta o Abednego, kai bichalda pe suecho ta braduisarda pe slugen, soke pachaie ande lete ta ni kandie me alava. A mai preche saia lenge te meren a na te blagosin avere dele te na avela lengo Del.

²⁹ Goleke me mukhav gala alava kai suako foro, phuv o chib, te phenena vareso bilacho katar o Del e Sadrakeko e Mesakeko ta e Abednegoeko, te avel chindo pe kotora ta leko cher te cherdol than kote kai chuden o llubri. ¡Soke nisavo del inai te braduil sargo gava Del!

³⁰ Mapalal o charo dia gale trinen ternen e radura mai lache ta bare ande phuv katar e Babilonia.