Daniel 2 - Biblia ande chib Romani

O suno katar o Nabukodonosor

¹ Kana nakhla dui burs kai charoila o Nabukodonosor, vou dikhla but sune ta pala gola sune nasti sovela.

² Ondaka phenda te ikharen e llenen kai cheren chirimate, ta e llenen kai sikon katar e cheraia te apogodin so ka avelpe, ta e bizaen te sai von phenen leke so phenen gola sune. Gola llene avile kai o charo,

³ ta o charo phenda lenge: Dikhlem iek suno ta but brigime sem soke mangav te llanav so phenel gua suno.

⁴ Ondaka gola llene kaldeura die orba lea ande chib aramea ta phende: ¡Te zivi ostade charo! Phen o suno che slugenge ta ka phena chuke so phenel.

⁵ O charo phenda lenge: O suno bristailem. A tumen te na phenena mange o suno kai dikhlem ta so phenel, ka chingarav tumen pe kotora ta tumare chera ka cherav len te aven o than tkote kai chuden o llubri.

⁶ A te phenena mange o suno kai dikhlem ta so phenel, ka cherav tumenge but sebapi ta sa ka den tumen baro liubao. Goleke phenen mange o suno kai dikhlem ta so phenel.

⁷ E bizai pale phende: Charo phen che slugenge o suno kai dikhlan ta ka phena chuke so phenel.

⁸ O charo phenda: Me llanav kai tumen mangen te nakhel o vreme soke llanglen so mangav te cherav.

⁹ Goleke tumen te na phenena mange o suno kai dikhlem, chindo si so ka cherdol tumenchar. Tumen lacharen tumen maskar tumende te den iek orba kojamni angla ma, ta cheren te nakhel o vreme te sai pharrudol mo mislo. Goleke phenen mange o suno ta gia me ka llanav kai ka phenen mange so phenel.

¹⁰ E kaldeura phende angla o charo: Inai ni iek lleno pe sa e phuv te phenel chuke charo savo suno dikhlan, ta nikada ni iek charo, ni birovi, ni gazda ni puchla nikada iek ezgoda gia iekhe llene kai cherel chirimate o kai dikhel e charaia te apogodil so ka avelpe, ta ni iekhe llene kai si bizai.

¹¹ Gava so mange charo nasti cherdol ta inai niko te sai phenel le chuke, samo e dela sai. A e dela ni zivin e manusenchar

¹² Goleke kana o charo asunda gala alava but jolailo ta phenda te mundaren sa e bizaen katar e Babilonia.

¹³ Kana llanglinaila gala alava maskar o sueto, rodie i e Daniele ta leke amale te sai mundaren len.

O Daniel ta o suno e charoko

¹⁴ Ondaka o Daniel dia orba bizaimaia e Ariokea, o mai baro katar e sudura kai arakhena e charo kai likistoia te mundarel e bizaen katar e Babilonia,

¹⁵ ta phenda leke: ¿Soke gala alava e charoke diaepe te llanglionpe e suetoke gia oma? Ta o Ariok phenda e Danieleke so nakhlaia.

¹⁶ Ondaka o Daniel llelo kai o charo ta mangla letar vreme te phenel e charoke so phenel o suno.

¹⁷ Mapalal o Daniel llelotar kai po cher ta phenda so nakhla sa pe llenenge e Ananiaseke, e Misaeleke ta e Azariaseke,

¹⁸ te sai mangen katar o Del e milosoko te pomozin len ande gaia ezgoda, te na mundaren len ogole bizaenchar katar e Babilonia.

¹⁹ Ande goia riat gaia ezgoda sikadila e Danieleke sargo ando suno, goleke o Daniel blagosisarda e Devle katar o miloso

²⁰ gale alavenchar: Blagosime te avel ostade o anav e Devleko, soke leki e zor ta o bizaipe.

²¹ Vou parruvel o vreme ta e dobe. Ikanel charura ta thovel charura, del bizaipe e bizaen ta llanglipe e llenen kai acharen.

²² Vou sikavel e ezgode kai si gurudine pinllarel so si ando truniariko, soke o villelo si lea.

²³ Tut Devla me dadengo, dav tut e fala ta blagosiv tut, soke dian man zor ta bizaipe. Ta sikadan mange so manga tutar: Cherdan te llana so brigila e charo.

²⁴ Mapalal katar gaia ezgoda o Daniel llelo te del orba e Ariokea, gole kai o charo bichaldaia te mundarel e bizaen katar e Babilonia, ta phenda leke: Na mundar e bizaen. Inllar man kai o charo, ta me ka phenav leke so phenel gua suno.

²⁵ Ondaka o Ariok inllarda oma e Daniele kai o charo ta phenda leke: Maskar e llene kai andan katar o Juda maladem iekhe llene kai ka phenel chuke so phenel cho suno.

²⁶ Ondaka o charo phenda e Danieleke kai ikharena le Beltsasar: ¿Sai phene mange tu savo suno dikhlem, ta so phenel mo suno?

²⁷ O Daniel phenda leke: Inai ni iek bizai ni iek lleno kai sikol katar e cheraia te apogodil so ka avelpe ni chirimatarko te sai phenen chuke charo, so tu mange te llane.

²⁸ A si iek Del ando miloso kai sikavel e ezgode gurudine ta vou si kai cherda te lane tu charo Nabukodonosor so ka avel mai angle. Etalo kate cho suno, ta e ezgode kai dikhlan sargo ando suno ando than kai sove:

²⁹ Kana tu charo sana ande cho than kai sove avila pe tute e mislura te llane so ka avelpe mai angle, ta gua kai sikavel so si gurudino sikada chuke so si te avelpe.

³⁰ Ta gala ezgode gurudine sikadile mange, na soke man si mai but bizaipe neko sa e manusen, cherdila te sai me phenav chuke charo so phenel gua suno ta te sai tu charo achare e mislura kai avile chuke.

³¹ Tu charo, dikhea iek bari estatua kai saia but bari ta but klichila, ta saia pe porrne angla tu, ta sar dikhola daravela.

³² O soro katar gaia estatua saia katar o sunakai lacho, leko brek ta leke va sea rupune, leko lli ta leke changa sea tuchne,

³³ leke changa sea sastrune, ta leke porrne sea cherde katar o sastri ta katar o glibo chirado.

³⁴ Kana tu dikhea e estatua, iek barr kai ni saia chindo e vastea, chalada la ande lake porrne sastrune ta gliboke chirado, ta phagla len pe kotora.

³⁵ Ondakaka phagile pe kotora i o sastri, o glibo chirado, o tuch, o rup ta o sunakai, ta cherdile sargo prajo kana dikhol o milai kana chiden o lliu kai inllarel le e balav ta lendar ni achila niso. A o barr kai chalada ande estatua cherdilo iek baro burdo kai pherda sa e phuv.

³⁶ Gava si o suno ta i so phenel o suno ta ka phenale angla tu charo.

³⁷ Tu charo, san charo e charonengo, soke o Del e milosoko dia tut e charoina, o gazdaripe, e zor ta o liubao.

³⁸ Ta o Del dia ande va e charoke sa e manusen ta i e zivirinien katar e umalia ta e chiriklien katar o miloso, ta dia te gazdaril pe sa ezgode, pe suako rig kai si zivoto. Tu charo san gua soro sunakuno.

³⁹ Ta mapalal tutar ka vazdiniaol aver charoina mai minoni tutar, ta mapalal ka avel iek trito charoina tucheki ta goia charoina ka gazdaril pe sa e phuv.

⁴⁰ Mapalal ka avel iek starto charoina, zurali sargo sastri ta ka phagel ta ka drobol sa e ezgode.

⁴¹ Ta e porrne ta e naia kai tu charo dikhlan, kai sea cherde katar o glibo chirado ta katar sastri, ka avel iek charoina fuladi, a ka avel ande late vareso katar e zor katar o sastri, gia sar dikhlan o sastri amime e gliboia chirado.

⁴² Ta sar si e naia e porrnenge cherde katar sastri ta o gliboko chirado, e charoina ka avel pe iek rig zurali a pe aver kovli.

⁴³ Ta gia charo sar dikhlan o sastri amime e gliboa, gia e charura katar gaia charoina ka aminpe maskar pete te zininpe a nasti ka aven iek averea ande iek than, gia sar o sastri nasti amilpe e gliboia.

⁴⁴ Ta ande llivesa katar gala charura o Del e milosoko ka vazdel iek charoina kai nikada ni ka avel zatrime, ta ni ka avel iek charoina kai mukelpe avere phuviake, ka drobol ta ka zatril sa gale charoinen, a e Devleki charoina ka achel ostade

⁴⁵ ta gia sar o charo dikhla kai katar o burdo perela iek barr kai ni saia chindo e vastea kai drobosarda o sastri, o tuch, o glibo, o rup, ta o sunakai. O baro Del sikada e charoke so si te avelpe ando vreme mai angle ta o suno si chacho, ta so phenel si o chachipe.

⁴⁶ Ondaka o charo Nabukodonosor thoda po mui llik pe phuv angla o Daniel ta phenda te den le ezgode ta taimano.

⁴⁷ Mapalal o charo dia orba e Danielea ta phenda leke: Chachimaia tumaro Del si o Del e delengo ta o Gazda e charonengo, ta sikavel so si gurudino soke sai phendan gava suno kai saia gurudino.

⁴⁸ Ondaka o charo bariarda e Daniele ta dia le baro liubao ta but ezgode lache, ta thoda le te avel gazda pe sa goia phuv katar e Babilonia ta birovi pe sa e llene bizai katar goia phuv.

⁴⁹ Ta o Daniel mangla katar o charo te gazdarin o Sadrak, o Mesak ta o Abednego pe sa so chindol o bichindol ande goia phuv ta gia von achile maskar e bare llene kai radina e charoke.