Daniel 12 - Biblia ande chib Romani

O vreme katar o son

¹ Ande gua vreme ka vazdiniaol o Migel, o baro gazda kai arakhel e llenen katar cho foro. Ka avel iek vreme dukhado, iek vreme kai nikada ni saia aver sar kai si e phuvia. Kana ka avel gua vreme, ka avel mukliardo cho foro, sa gola kai si pisime ando lil.

² Ta but katar gola kai soven ando prajo e phuviako ka llungadon nesave te zivin ostade a aver ka llungadon ando lallao ta ande burkania ostade.

³ E llene kai acharen ka klichin sargo o miloso ta gola kai sikaven o chachipe bute llenen ka klichin ostade sargo e cheraia.

⁴ A tu Daniel phande gala alava ta thov o sello po lil llik kai o vreme katar o son. But llene ka prasten katar iek rig kai aver, ta o bizaipe ka bariol.

⁵ Ta me o Daniel dikhlem ta sea aver dui kai sea pe porrne, iek pe gaia rig katar o pai a o gua pe ogoia rig katar o pai.

⁶ A iek lendar phenda e manuseke kai saia furiado ando lino, kai saia upral po pai katar e len: ¿Kana ka avel o son katar gala bare ezgode?

⁷ Ta asundem e manuse furiado ando lino kai saia upral po pai katar e len, ta vazdia pe va ando miloso ta jala sovel ando anav e Devleko o llundo, ta phenda: Ka nakhel iek vreme, ta dui vremura ta o dopas katar iek vreme. Ta kana ka gotovilpe o rispipe katar e zor katar o foro santo, sa gala ezgode ka cherdon.

⁸ Me asundem so phenela a ni achardem. Ta phendem: Murno Del ¿Savo ka avel o son katar gala ezgode?

⁹ A vou phenda mange: Lla Daniel, soke gala alava si phangle ta o sello si pe lende llik o vreme katar o son.

¹⁰ But llene ka aven chistome, lacharde ta jalade, a e bilache ka cheren o bilachipe ta ni iek katar e bilache ni ka acharel. A e llene bizai ka acharen.

¹¹ Ta katar o vreme kana ka achadol o kurbano suako lliveseko llik kai o bilachipe pusto, ka aven milia ta dui stotine ta iniarvardes llivesa.

¹² Blagosime gua kai ka aduricharel ta kai ka resel kai e milia ta trin stotine ta tranda ta panch llivesa.

¹³ A tu Daniel ka lla llik kai o son, ta ka ache te lelpe tutar o chiñipe, ta ka uste te sai le so ka perel tut ando son e llivesengo.