Daniel 11 - Biblia ande chib Romani

¹ Ta isto me, ando purvo burs katar o Dario o medo, sema te vazdav le ta te dav le zor.

² Ta akana ka sikavav chuke o chachipe. Ka resen te charoin ande Persia trin charura, a o starto charo ka avel but mai barvalo neko sa ogola. Ta kana ka cherdol zuralo pe barvalimaia, ka vazdel saurren pe charoina katar e Gresia.

E charura katar o norte ta katar o sur

³ Mapalal ka vazdiniaol iek charo tromano kai ka gazdaril bare zoriaia ta ka cherel so vou mangel.

⁴ A kana ka vazdiniaol, leki charoina ka avel peradini ta fuladi karing e star balavia e milosoke. Na leke porodoke, ta ni ka avel gia zuralo sar saia kana vou gazdarila, soke leki charoina ka avel ikandi, ta aver ka gazdarin pe lengo than.

⁵ Ta ka avel le zor o charo katar o sur, a iek katar leke sudura bare ka avel mai zuralo letar, ta leko gazdaripe ka avel baro.

⁶ Pala nesave bursa ka achen pe orba, ta e chorri katar o charo katar o sur ka zinilpe e charoia katar o norte, ta ka cherdol e pas. A voi nasti ka achel leke zoriaia, soke ka kojaven la ta i lake chaurre ta i golen kai llana laia ta i e llenen kai ande gua vreme sea pe rig laia.

⁷ A katar laki familia ka likel iek kai ka avel e boñikonenchar te marelpe, ta ka vazdiniaol po charo katar o norte ta ka del andre katar leke zidura. Ta pe llenenchar ka gazdaril pe lende.

⁸ Ta i lenge dela ta lenge slike cherde katar o sastri biladino, ta i lenge ezgode kai mol len but kai si rupune ta sunakune, ka inllarel len peke ando Ejipto. Ta mapalal katar nesave bursa kai ni ka avel maripe maskar e dui phuvia,

⁹ o charo katar o norte ka mangel te del ande phuv katar o sur, a pale ka irilpe ande pi phuv.

¹⁰ A e chaurre katar o charo katar o norte ka lacharenpe e marimake ta ka lacharen bute llenen te marenpe, iek lendar ka llal pe boñikonenchar te sai dobin o sur, ta ka zatril sa sargo iek pai kai likel ta zatril. Mapalal pale ka marelpe ta ka resel llik kai leke zidura.

¹¹ Gava ka cherel te joliaol o charo katar o sur ta ka likel ta ka llal te marelpe e charoia katar o norte iekhe bare suetoia kai marenpe ta ka dobil len ta ka zatril len.

¹² Ta kana vou ka inllarel e sueto, leko lio ka cherel baripe ta ka peravel bute milien, a leki zor ni ka achel but vreme.

¹³ A o charo katar o norte pale ka chidel llenen te marenpe. Ka chidel mai but llenen neko so chidiaia omanglal. Ta pala nesave bursa ka avel oma iekhe bare suetoia te marelpe ta bare barvalimaia.

¹⁴ Ande gua vreme ka vazdiniaon but llene po charo katar o sur, llene bilache katar suako foro te sai cherdol so dikhila sargo ando suno, a von ni ka dobin.

¹⁵ Ondaka o charo katar o norte ka avel ta ka vazdel phurda truial katar o foro zuralo, ta ka dobil le ta ni e mai zurale boñikura nasti ka achaven len soke ka jasaren pi zor.

¹⁶ O charo ka avel te marelpe ta ka cherel so vou mangel ta niko nasti ka tromal te thovelpe angla lete, ta ka achel ando foro kai si blagosime ta gava foro ka avel zatrime tala leki zor.

¹⁷ Mapalal ka lacharelpe te avel sa pe zoriaia pe charoinaki, ta ka achel pe iek alav e charoia katar o sur, a te zatril le ka del le iek katar pe chorra te avel leki rromi, a nasti ka dobil le.

¹⁸ Mapalal ka llal te marelpe e foronenchar kai si pasa e mora, ta but lendar ka peren ande leki zor. A iek sudo baro ka thovel o son gale lallaimake ta ka thovel ando lallao e charo katar o norte.

¹⁹ Mapalal ka irilpe kai e zidura pe phuviake, ta ka eskonbal ta ka perel, ta nikada ios ni ka llangliolpe letar.

²⁰ Ta ka vazdiniaol pe leko than iek kai chidel love katar e llene te sai barvarel pi charoina, ta ande cherricha llivesa ka avel zatrime, na ande joli ni ando maripe.

²¹ Mapalal letar ka charoil iek lleno bilacho kai ni ka den le liubao sar den iekhe charo. Ta kana ka avel ni ka phenel le nikake, ta ka lel e charoina kojaimaia.

²² Angla le leke dusmanura ka aven sa zatrime sargo kana del o pai kana bariol. Gia ka aven zatrime e charoia kai achilea lea pe orba.

²³ Ta gola kai ka achen po alav lea vov ka kojavel len ta ka vazdiniaol pe lende te marelpe, ta ka dobil len cherricha llenenchar.

²⁴ Kana e phuv ka avel ande pas ta ando barvalipe ta ka cherel so ni cherde leke purane, ka fulavel maskar pe boñikura o barvalipe kai dobisarde po maripe. Ta ka mislilpe te marelpe e foronenchar zidome, ta gava ka avelpe samo nesavo vreme.

²⁵ Ta ka llungadol leki zor ta ka vazdiniaol po charo katar o sur bute llenenchar kai marenpe. Ta o charo katar o sur ka marelpe bute llenenchar zurale kai marenpe, a nasti ka dobil soke isto leke llene ka kojaven le.

²⁶ Isto golen kai vou anela te besen te jan pe leki sinia ka zatrin le, ta leke boñikura ka aven zatrime ta but lendar ka aven mundarde.

²⁷ Ondaka e lie katar gala dui charura ka mangen samo te cheren o bilachipe, ta isto pe iek sinia iek avere ka kojaven a gaia ezgoda ni ka blazil lenge niso, soke ni ios inai o vreme.

²⁸ Ondaka o charo katar o norte ka irilpe kai pi phuv bare barvalimaia, a mai anglal ka mangel te phagel e orba santa pe so achilea. Ka cherel so vou mangel ta ka irilpe kai pi phuv.

²⁹ Ta po vreme kai si chinado, pale ka bichalel pe llenen te marenpe e llenenchar katar o sur, ta pe gava maripe ni ka llal leke sar llelaia leke e purvo drom.

³⁰ Soke ka marenpe lea e llimie katar o Kitin ta ka muken le ando lallao, a vou ande pi joli ka vazdiniaol pe alava sante pe so achilea, ta ka cherel so vou mangel, a ka sikadol lacho e llenenchar kai mukle e sante alava pe so achilea.

³¹ Leke boñikura ka muken ando lallao o cher e Devleko ta e zidonen, ta ka achaven e kurbanura suako lliveseke ta ka thoven iek ezgoda gado pusti.

³² Ta e llenen kai ka phagen e alava ka kojavel len alavenchar kojamne, a o foro kai pinllarel pe Devle, sa pe zoriaia ni ka mukel te kojaven le.

³³ E bizai katar o foro ka sikaven bute llenen, ta nesave llivesa ka mundaren len e jarniea ta e iagaia, ta averen ka inllaren len phangle, ta ka len lenge ezgode.

³⁴ Ta kana ka peren ka pomozin len cherricha, ta but llene ka chidiniaon lenchar kojaimaia.

³⁵ Ta i ka peren e llene kai sikavena e foro te sai aven chistome ta parniarde llik kai o vreme kai si chinado, soke llik gale ezgodake si chinado iek vreme.

³⁶ Ta o charo katar o norte ka cherel so vou mangel, ta pe gachin ka istardol kai ka mislilpe kai vou si mai baro neko sa e dela, ta ka vazdiniaol po Del e delengo ta ka del orbe bare, ta ka llal leke sukar lligo ni ka perel pe lete e joli, soke so si chinado ka avelpe.

³⁷ Gia baro ka avel leko baripe kai ni ka thovel sama e delenge katar leke purane, ni e dela kai blagosin e diskinie ta ni ka del liubao ni iekhe dele.

³⁸ A vou ka blagosil e dele katar e zidura iek del kai leke purane ni pinllarde ta ka del le sunakai, rup, barra kuch ta ezgode kai si but kuch.

³⁹ Iekhe delea avere phuviengo ka dobil e foronen kai si len bare zidura kai niko nasti dobila len, ta ka del baro liubao golen kai blagosina le ta ka pochinen lenge e phuviaia.

⁴⁰ A kana ka avel o vreme o charo katar o sur ka marelpe lea, ta o charo katar norte ka vazdiniaol pe lete sargo iek baro bursin. Bordonenchar kai marenpe ta llenenchar kai llan pe gra ta i but llimie, ta ka del sargo iek baro pai kai inllarel sa.

⁴¹ Ta i ka del ande phuv katar o sukaripe ta ka mundarel bute llenen, a ka braduinpe e llene katar o Edom ta katar o Moab, ta but llene katar e phuv katar o Amon.

⁴² Ta leke boñikura ka dobin avere phuvien ta ni o Ejipto ni ka braduilpe.

⁴³ Ta ka lel peke o barvalipe, o sunakai, o rup ta sa e ezgode kai mol len kuch kai si ando Ejipto, ta mapalal ka lel peke o barvalipe katar e Libia ta e Etiopia.

⁴⁴ A kana ka asunel e viasta katar likel o kham ta katar o norte, ka daral ta ka llal bare jolinaia te zatril ta te mundarel bute llenen.

⁴⁵ Ta ka inzarel e chare katar pi charoina maskar e more ta o burdo santo, a ka avel leko son ta ni ka avel le ko te pomozil le.