Daniel 10 - Biblia ande chib Romani

So dikhla o Daniel sargo ando suno pasa o pai kai ikhardol Tigris

¹ Ando burs trito katar o Siro charo katar e Persia, sikadila e alava e Danieleke Kai ikharena le Beltsasar. Ta e alava sea chache a niko nasti acharela len, a vou acharda e alava ta saia le bizaipe ande so dikhla sargo ando suno.

² Ande gola llivesa me o Daniel achilem tristome trin semane.

³ Ni jalem jape sukar ta ni zumadem mas ni mol, ta ni thodem pe ma ni iek meriso lligo ni nakhle gola trin semane.

⁴ O llive bistastar katar o purvo chon, me sema pasa e bari len kai ikhardol Jidekel,

⁵ ta vazdiem me akha ta dikhlem iekhe llene furiado ando lino ta pe leke dume saia iek kavisi sunakuno katar o Ufaz.

⁶ Leki esnaga saia sargo o berilo, ta leko mui dikhola sargo iek esterlicha, ta leke akha sea sargo plameko iagako, ta leke va ta leke porrne dikhona sargo tuch kai klichil a leko avazi asundola sargo but sueto.

⁷ Samo me o Daniel dikhlem gava sargo suno, a e llene kai sea manchar ni dikhle le, von but daraile ta nasle ta gurudile.

⁸ Goleke achilem korkorre ta dikhlem gava sargo ando suno, lava te baldiv man ta ni saia man zor.

⁹ Ta kana asundem leke alava ta so phenela, baldisailem ta achilem peradino e muiea pe phuv.

¹⁰ Ondaka iek va dodisarda man ta cherda man te thovav man changenchar, ta te thovav me va pe phuv.

¹¹ Mapalal phenda mange: Daniel, kai o Del but volil tut, thov sama pe alava kai ka phenav chuke ta thov tut pe porrne, soke tute sem bichaldo akana. Kana phenela gaia orba mange, thodem man pe porrne ta izdrava.

¹² Ondaka phenda mange: Daniel, na dara soke o purvo llive kai thodan tut te achare ta te avel tut liubao angla cho Del, sea asunde che alava ta cheres che alava me avilem.

¹³ A o gazda katar e charoina katar e Persia vazdinailo pe ma bis ta iek llive. A o Migel, kai si iek katar e mai bare gazda, avilo te pomozil man ta achilem kote e charonenchar katar e Persia.

¹⁴ Avilen te sai cherav tut te llane so si te avelpe che foroke ando vreme mai angle, soke gava sargo suno kai dikhlan si gole llivesenge.

¹⁵ Kana phenela mange gala alava, me akha sea karing e phuv ta achilem bi alaveko.

¹⁶ A iek kai dikhola sargo chaurro manuseko, dodisarda me us. Ondaka putardem mo mui ta diem orba ta phendem e manuseke kai saia angla ma: Gazda, gava so dikhlem sargo ando suno cherda te dukhal man ta inai man zor.

¹⁷ ¿Sar ka cherel o sluga me gazdako te del orba me gazdaia kana inai man zor ta achilen bi duoko?

¹⁸ A gua kai dikhola sargo manus dodisarda man pale, ta dia man zor

¹⁹ ta phenda mange: Na dara, o Del volil tut e pas te avel tuia. ¡Cher chuke zor ta te ave tromano! Ta kana vou dela orba, lien pale zor ta phendem: De orba mo gazda soke dian man zor.

²⁰ Ondaka phenda mange: ¿Llane soke avilem tute? Soke akana pale morabi te iriv man te marav man e gazdaia katar e Persia, ta kana ka gotoviu lea, o gazda katar e Gresia ka avel.

²¹ A me ka sikavav tut so si pisime ando lil katar o chachipe, ta niko ni pomozil man te marav man lenchar, samo o Migel tumaro gazda.