Apokalipsis 9 - Biblia ande chib Romani

E panchto tuturuga

¹ O panchto suecho basalda e tuturuga ta dikhlem iek cherain kai pelitar katar o miloso pe phuv, ta avila lake dino o klucho katar o bunari katar e jar.

² Ta putarda o bunari katar e jar ta likisto thuv sargo o thuv kai likel katar iek bari furnava. Ta o kham cherdilo truniariko, ta i e balav cheres o thuv e bunareko.

³ Ta katar o thuv likiste langoste upral pe phuv ta avila lenge dini e zor kai si len e alakranura e phuviake.

⁴ Ta phendilo lenge te na zatrin e patra e phuviake ta nisavo zenelipe ta ni iek kas samo te zatrin e manusen kai ni saia len o sello e Devleko pe lengo chikat.

⁵ Ta avila lenge dino te na mundaren len samo te patin len panch chon ta lengi patnia saia sargo kana pusavel e manuse iek eskorpion.

⁶ Ta ande gola llivesa e manusa ka roden o meripe ta ni ka malaven le, ka mangen te meren a o meripe ka nasel lendar.

⁷ E langoste sea sargo gra lacharde e marimake. Pe lenge sore inllarena sargo korone sunakune, ta lenge muia sea sargo muia manusenge.

⁸ Lenge bal sea sargo bal diskiniake, ta lenge danda sea sargo lionoke.

⁹ Pe lengi esnaga sea kore sastrune ta lenge pakha asundona sargo but bordona kai chirden len e gra kana prasten po maripe.

¹⁰ Saia len poria sargo e eskorpionura ta i saia len suvia, ta pe lenge poria saia len e zor te dukhaven e manusen panch chon.

¹¹ Ta lengo charo si o suecho katar e jar, ta leko anav ando ebreo si Abadon, ta ando griego si Apolion.

¹² O purvo tesko nakhlo; a achen ios dui.

E sovto tuturuga

¹³ O sovto suecho basalda e tuturuga ta asundem iek avazi maskar e singa katar o altar sunakuno kai si angla o Del.

¹⁴ Ta phenda e soutone suechoke kai saia le e tuturuga: putar e stare suechonen kai si phangle pasa e bari len kai ikhardo Eufrates.

¹⁵ Ta avile mukliarde e star suechura kai sea lacharde te mundaren ando saiato o llive o chon ta burs iekhe katar suako trin llene.

¹⁶ Ta e boñikura kai llana pe gra sea dui stotine millonura, ta me asundem pe gachin sea.

¹⁷ Gia dikhlem sargo ande iek suno e gra ta e boñikura kai llana pe lende kai sea len kore sastrune sargo e iagake sargo o safiro ta sargo o asufre. Ta e grastenge sore sea sargo sore lionoke ta katar lenge muia likela iag, thuv ta asufre.

¹⁸ Ta cheres gala trin zatranie mule iek katar suako trin llene cheres e iag o thuv ta o asufre kai likela katar lengo mui.

¹⁹ Soke e zor e grastengi saia ande lengo mui ta ande lenge poria soke lenge poria sargo sapa saia len sore ta zatrina lenchar.

²⁰ Ta ogola manusa kai ni mule cheres gala zatranie, ni gia ni keisaile katar e ezgode kai cherena pe vastenchar ta ni mukle te blagosin e llavolonen ta e delen kai si cherde katar o sunakai, katar o rup katar o tuch katar o barr ta katar o kas, a gola dela ni dikhen ni asunen ta ni phiren.

²¹ Ta ni keisaile katar o mundaripe kai cherena ni katar o drabaripe ni katar o kurvaluko ni katar o choripe.