Apokalipsis 8 - Biblia ande chib Romani

O eftato sello

¹ Kana o Bakro putarda o eftato sello, ni asundilo niso ando miloso llik kai o dopas o saiato.

² Mapalal dikhlem efta suechura pe porrne angla o Del, ta avila lenge dine efta tuturuge.

³ Ondaka avilo aver suecho kai anela iek insensario sunakuno ta thodape angla o altar ta avila leke dino but taimano te thovel le e molimaia kai cherela o santo foro po altar sunakuno kai saia angla o trono.

⁴ Ta katar o va e suechoko o thuv katar o taimano ta o molipe katar o santo foro llelo upre angla o Del.

⁵ Ondaka o suecho istarda o insensario ta pherdale iag katar o altar ta chudiale pe phuv; ta saia germipe, avazura esterliche, ta e phuv dermosaili.

⁶ Ta e efta suechura kai saia len e efta tuturuge thodepe te basalen len.

E star purve tuturuge

⁷ O purvo suecho basalda e tuturuga ta pela pe phuv krupe ta iag amime e ratea, ta chudinaile pe phuv. Ta iek katar suako trin kasta phabile, ta phabile sa e patra zenele.

⁸ O duito suecho basalda e tuturuga, ta sargo iek baro burdo kai phabol chudinailo ande mora, ta iek katar e trin riga e morake cherdile rat.

⁹ Ta muletar iek katar suako trin zivirinie kai sea ande mora, ta iek katar suako trin llimie zatrisaile.

¹⁰ O trito suecho basalda e tuturuga ta katar o miloso pelitar iek bari cherain kai phabola sargo iek antorcha, ta peli upral pe iek katar suako trin lena ta pe paia kai liken katar e phuv.

¹¹ Ta e cherain ikhardol Ajenjo; ta iek katar suako trin riga e paieke cherdile ajenjo, ta but llene mule cheres gola paia kai cherkile.

¹² O starto suecho basalda e tuturuga ta avile ranime iek katar e trin riga e khameke ta katar o chon ta katar e cheraia te sai cherdon truniariko iek katar suako trin lendar ta te na avel villelo ande iek katar suako trin vreme e lliveseke ta i e rachake.

¹³ Ta mapalal dikhlem ta asundem iekhe suecho kai furiala po maskaral katar o miloso ta phenela bare avazea: ¡Tesko, tesko e llenenge kai zivin pe phuv cheres ogola tuturuge kai si te basalen e trin suechura!