Apokalipsis 7 - Biblia ande chib Romani

E 144 milie sellaura

¹ Mapalal katar gala ezgode, dikhlem star suechura pe porrne pe star riga e phuviake, ta achavena e star balavia te na phurdel ni iek balav pe phuv ni pe mora ni pe nisavo kas.

² Ta i dikhlem aver suecho kai likela katar likel o kham, ta saia le o sello katar o Del o llundo ta urkisarda bare avazea pe star suechura, gola kai saia lenge dini e zor te zatrin pe phuv ta pe mora,

³ ta phenda: ¡Na zatrin e phuvia ni e mora ni e kasten, lligo ni ka thova o sello po chikat katar e esluge amare Devleke!

⁴ Ta asundem gachin sea e llene kai saia pe lende o sello: Stotina ta saranda ta star milie katar e desudui viche e Israeleke.

⁵ Katar e vicha e Judaeki, desudui milie saia pe lende o sello. Katar e vicha e Rubeneki, desudui milie. Katar e vicha e Gadeki, desudui milie.

⁶ Katar e vicha e Asereki, desudui milie. Katar e vicha e Neftalieki, desudui milie. Katar e vicha e Manaseki, desudui milie.

⁷ Katar e vicha e Simeonoki, desudui milie. Katar e vicha e Levieki, desudui milie. Katar e vicha e Isakareki, desudui milie.

⁸ Katar e vicha e Zabulonoki, desudui milie. Katar e vicha e Joseeki, desudui milie, ta katar e vicha e Benjamineki, desudui milie.

⁹ Mapalal katar gala ezgode dikhlem iek baro sueto kai niko nasti llinela le, sea katar sa e phuvia, viche, forura ta chibia kai sea pe porrne angla o trono ta angla o Bakro furiade ando parno ta ande lenge va sea krangura katar e palmera.

¹⁰ Ta sa urkina bare avazea ta phenena: ¡O braduipe si amare Devleko kai besel po trono ta i e Bakreko!

¹¹ Ta sa e suechura sea pe porrne truial katar o trono ta katar e phure ta e star zivotura. Ta die changa angla o trono ta lengo mui reslo llik pe phuv, ta blagosisarde e Devle

¹² ta phenena: ¡Gia te avelpe! O blagosipe, o baripe, o bizaipe, e fala, o liubao ta e zor te aven e Devleke ostade. ¡Gia te avelpe!

¹³ Ondaka iek katar e phure puchla man: ¿ko si gala kai si furiade ando parno, ta katar avile?

¹⁴ Me phendem leke: Tu llanele, gazda Vou phenda mange: Gala si kai nakhle e bari patnia, kai jalade pe patave ta parniarde len ando rat e Bakreko:

¹⁵ Goleke von si angla o trono e Devleko, ta radin ollivesea ta orachaia ando leko cher. Ta gua kai besel po trono ka buliarel lenge pi chara.

¹⁶ Nikada ios ni ka aven bokhale ni trusale, ta o kham ni ka del ios pe lende, ta ni ka avel lenge tatipe

¹⁷ soke o Bakro kai si po maskaral katar o trono, ka avel lengo chobano ta ka inllarel len kai si o pai o llundo, Ta o Del ka kosel sa e ausa katar lenge akha.