Apokalipsis 6 - Biblia ande chib Romani

E sellura

¹ Mapalal dikhlem kai o Bakro putarda o purvo katar e efta sellura, ta asundem kai iek katar e star zivotura phenela iekhe avazea sargo germipe: ¡Aide ta dik!

² Ondaka dikhlem iek gra parno ta gua kai llala pe lete inllarela ande po va iek arko, ta avila leke dini iek korona, soke dobisarda ta likisto te dobil ios.

³ Kana o Bakro putarda o duito sello, asundem kai o duito zivoto phenela: ¡Aide ta dik!

⁴ Ta likisto aver gra kai saia lolo, ta gua kai llala pe lete avila le dini e zor te lel katar o sueto e pas, ta te cherel e llenen te mundaren iek avere, ta avila leke dino iek baro jarni.

⁵ Kana o Bakro putarda o trito sello, asundem kai o trito zivoto phenela: ¡Aide ta dik! Ta dikhlem iek gra kalo, ta gua kai llala pe lete saia ande leko va iek balansa.

⁶ Ta maskar e efta zivotura asundem iek avazi kai phenela: Iek kila lliu pe iek denario, a trin kile sebada pe iek denario, a na murisar ni o zeitino ni e mol.

⁷ Kana o Bakro putarda o starto sello, asundem o avazi katar o starto zivoto kai phenela: ¡Aide ta dik!

⁸ Ta dikhlem iek gra galbeno, ta gua kai llala pe lete ikhardola Meripe. Ta pala le llala o baro meripe, ta avila leke dino te gazdaril pe iek katar e star riga e suetoke te mundarel e jarniea, e bokhaia, e nasualimaia kai mundarel, ta e zivirinienchar, kai si dive pe phuv.

E panchto ta e souto sellura

⁹ Kana o Bakro putarda o panchto sello, dikhlem telal katar o altar e duura katar e llene kai mundarde len pala e alava e Devleke, ta pala e ezgode kai cherena.

¹⁰ Ta phenena bare avazea: Gazda santo ta chachuno, ¿kana ka chine e kris golenge kai zivin ando sueto te pochinen amaro meripe?

¹¹ Ondaka avile lenge dine patave parrne, ta phendilo lenge te aduricharen cherricha ios vreme, te getonpe e llene ta e phlal kai saia te mundaren len sargo len.

¹² Dikhlem kana o Bakro putarda o souto sello, ta e phuv dermosaili but zurale. O kham kalilo sargo angar, ta o chon lolilo sargo o rat.

¹³ E cheraia peletar e milosotar pe phuv, sargo kana o kas e simochinengo peravel e simochine kana miskol le iek bari balav.

¹⁴ A o miloso ni dikhilo ios, sargo kana ulilpe iek lil, ta sa e burdura ta sa e isle miskosaile katar po than.

¹⁵ Ta e charura e suetoke, e bare, e barvale e bare sudura, e zurale ta sa e esluge ta gola kai ni sea esluge, gurudile ande burdura ta maskar e pechine e burdonenge

¹⁶ ta phenena e burdonenge ta e pechinenge: ¡Peren pe amende ta guruven amen katar o mui goleko kai besel po trono ta katar e Bakreki joli!

¹⁷ Soke avilo o baro llive katar leki joli; ¿ko ka achel pe porrne ande gua llive?