Apokalipsis 5 - Biblia ande chib Romani

O lil ulime ta o Bakro

¹ Ta dikhlem ando va o chacho goleko kai besela po trono iek lil ulime pisime andral ta i avrial, ta saia phanglo efta sellonenchar.

² Ta dikhlem iek suecho zuralo kai phenela bare avazea: ¿Ko si lacho te sai putarel o lil?

³ Ta niko ni ando miloso ni pe phuv ni telal katar e phuv ni telal katar e mora nasti putarela o lil ni te dikhel le.

⁴ Ta me rovava but, soke niko ni saia lacho te putarel o lil, ni te chitil le ni te dikhel le.

⁵ A iek katar e phure phenda mange: Na rou ios, soke o liono katar o Juda dobisarda te putarel e efta sellura ta te dikhel o lil.

⁶ Ondaka dikhlem kai maskar o trono ta e star zivotura ta maskar e phure, saia iek Bakro pe porrne sargo iek kurbano, ta sea le efta singa ta efta akha, gala si e efta duura e Devleke kai si bichalde pe sa o sueto.

⁷ Ta avilo ta lia o lil kai saia ando va o chacho katar gua kai besela po trono.

⁸ Ta kana lia o lil, e star zivotura ta e bis ta star phure die changa angla o Bakro. Ta saurre saia len arpe ta tasura sunakune pherde taimano, kai si o molipe katar o foro santo.

⁹ Ta llilabena iek llili nevi kai phenel gia. Lacho san te le o lil ta te putare leke sellura, soke tu sana o kurbano; ta che ratea pochindan amen e Devleke katar suako vicha, chib, foro ta phuv.

¹⁰ Ta cherdan amen amare Devleke charura ta popura ta ka charoi pe phuv.

¹¹ Ta dikhlem, ta asundem e avazura katar but suechura kai sea truial katar o trono, ta katar e zivotura, ta e phure. Ta e suechura sea millonura ta millonura,

¹² ta phenena bare avazea: ¡O Bakro kai saia kurbano: si lacho te lel o gazdaripe ta o barvalipe, o bizaipe e zor, o liubao, o baripe ta o blagosipe!

¹³ Ta i sa so si cherdo ando miloso, pe phuv ta telal katar e phuv ta ande mora, ta sa e ezgode kai si ande lende, phenena gia: ¡Goleke kai si besindo po trono ta i e Bakreke, te avel o blagosipe, o liubao o baripe ta e zor ostade!

¹⁴ Ta e star zivotura phenena: ¡Gia te avelpe! Ta e bis ta star phure die changa, ta thode po mui llik pe phuv, ta blagosisarde gole kai zivil ostade.