Apokalipsis 4 - Biblia ande chib Romani

O blagosipe ando miloso

¹ Mapalal katar gala ezgode, dikhlem iek udar putardo ando miloso; ta o avazi kai asundem mai anglal saia sargo iek tuturuga ta phenda mange: Like karinga, ta me ka sikavav chuke e ezgode kai si te aven mapalal katar gala.

² Ta isto kote me achilem ando Duo ta dikhlem iek trono thodo ando miloso, ta vareko besela pe lete.

³ Gua kai besela saia sargo iek rubi o sargo iek diamante, ta truial katar o trono saia iek korona kai saia sargo iek esmeralda.

⁴ Ta truial katar o trono sea ios bis ta star tronura, ta bis ta star phure kai besena pe lende: ta lenge patave sea parrne ta pe lenge sore sea korone sunakune.

⁵ Katar o trono likena esterliche, germipe ta avazura. Ta angla o trono phabona efta lampare iagake, kai si e efta duura e Devleke.

⁶ Ta angla o trono saia sargo iek mora serchavaki kai saia but bristi. Ta pasa o trono ta truial katar o trono, sea star zivotura pherde akha, anglal ta i palal.

⁷ O purvo zivoto saia sargo iek liono, o duito sargo guruv, o trito leko mui saia sargo manuseko, ta o starto sargo iek agila kana furial.

⁸ Ta suako iek katar e star zivotura sea len sou pakha, ta truial ta andral sea pherde akha. Ta ni orachaia ni ollivesea ni achena te phenen: ¡Santo, santo, santo si o Gazda, o Del kai si le sa e zor, Gua kai saia, kai si, ta kai si te avel!

⁹ Suako drom kana gola zivotura blagosin ta den liubao, ta den fala gole kai besel po trono,

¹⁰ e bis ta star phure den changa angla gua kai besel po trono ta blagosin gole kai zivil ostade, ta thoven pe korone angla o trono ta phenen:

¹¹ Gazda, tu san lacho te ave blagosime te den tut o liubao, ta te chudenpe katar chi zor, soke tu cherdan sa e ezgode ta pala chiri volia si ta cherdile.