Apokalipsis 3 - Biblia ande chib Romani

E poroka pala e Sardes

¹ Pisisar i e suechoke katar e khanlliri kai si ando Sardes: Gia phenel gua kai si le e efta duura e Devleke ta e efta cheraia: Me llanav so chere ta llanav kai pinllaren tut kai san llundo, a tu san mulo.

² Goleke thov sama ta lachar ogola ezgode kai si te meren, soke dikhlem kai e ezgode kai chere inai chache angla o Del.

³ Goleke de tut golli so lian ta so asundan ta cher le, keisao soke te na prezosardan, me ka avav pe tute sargo iek chor, ta ni ka llane o saiato kana ka avav pe tute.

⁴ A ando Sardes si tut nesave llene kai ni makhle pe patave, von ka llan manchar furiade ando parno soke dobisarde.

⁵ O lleno kai ka dobil ka furiavav le parrne patavenchar, ta ni ka ikanav leko anav kai si pisime ando lil e zivotoko, ta ka phenav angla mo Dad ta angla leke suechura kai me pinllarav gole llenen.

⁶ ¡O lleno kai si le kan te asunel so phenel o Duo e khanllirenge!

E poroka pala e Filadelfia

⁷ Pisisar i e suechoke katar e khanlliri kai si ande Filadelfia: Gia phenel o Santo, o chachuno, gua kai si lete o klucho katar o David, gua kai kana putarel niko nasti phandel, ta kana phandel niko nasti putarel:

⁸ Me llanav so chere ta thodem angla tu iek udar putardo kai niko nasti phandel, soke ni san but zuralo a cherdan so phenen me alava, ta ni phendan kai ni pinllare mo anav.

⁹ Gole llenen kai si katar e khanlliri e judionengi kai si e Satanaseki, kai phenen kai si judiura a von inai ta kojaven, me ka cherav te den changa angla che porrne, ta te llanen kai me volisardem tut.

¹⁰ Goleke soke kandian me alava me terpimake, i me ka arakhav tut kana ka avel o saiato katar o zumadipe, kai ka avel pe sa o sueto te aven zumade sa e llene kai zivin pe phuv.

¹¹ Me avav oma. Na muk so si tut, te na lel niko chi korona.

¹² Gua kai ka dobil me ka cherav te avel sargo o zido kai istarel o cher me Devleko, ta nikada ios ni ka likel kotar; ta ka pisiv pe lete o anav me Devleko ta o anav katar e foro me Devleko, o nevo Jerusalem, kai fuliel katar o miloso, ta i ka pisiv pe lende mo anav o nevo.

¹³ ¡O lleno kai si le kan te asunel so phenel o Duo e khanllirenge!

E poroka pala e Laodisea

¹⁴ Ta pisisar e suechoke katar e khanlliri kai si ande Laodisea: Gia phenel o Amen, gua kai del e orba e chachi ta si chacho, o purvo katar so cherda o Del.

¹⁵ Me llanav so chere kai ni san ni sudro ni tato. ¡Mai sukar avilaia te avilana sudro o tato!

¹⁶ A soke san maklome, ta ni san sudro ni tato, ka chadav tut katar mo mui.

¹⁷ A tu phene: me sem barvalo, barvailem ta niso ni trubul man; a ni llane kai inai tut veselia ta san iek lakomo, chorro, korro ta nango.

¹⁸ Goleke me phenav chuke: te chine mandar sunakai chistome ande iag te sai ave barvalo, ta patave parrne te sai furiado ta te na dikhol o lallao katar cho nangipe, ta thov pe che akha kolirio te sai dikhe.

¹⁹ Me dav pe sa gola kai voliv ta dukhavav len, goleke trudisao ta keisao.

²⁰ Me sem po udar ta ikharav; a vareko te asunela mo avazi ta te putarela o udar, me ka dav ande lete ta ka jau lea, ta vou manchar.

²¹ Gua kai ka dobil ka dav le te besel manchar pe mo trono, gia sar me dobisardem ta beslem me Dadea pe leko trono.

²² ¡O lleno kai si le kan te asunel so phenel o Duo e khanllirenge!