Apokalipsis 22 - Biblia ande chib Romani

¹ Mapalal o suecho sikada mange iek len chisti, iek pai kai del zivoto ostade ta bristo sargo e serchava kai likela katar o trono e Devleko ta katar o Bakro.

² Ta po maskaral katar o drom o mai baro katar o foro, pe dui riga katar e len saia o kas e zivotoko, kai del septelie suako chon, gua si kai del desudui droma septelie ando burs llive; ta leke patra sea te sastaren e phuvien.

³ Ta ando foro ni ka avel niso proketime. O trono e Devleko ta e Bakreko ka avel ando foro, ta leke esluge ka blagosin le.

⁴ Sa ka dikhen e Devleko mui, ta e Devleko anav ka avel pe lengo chikat.

⁵ Kote ni ka avel ios e riat, ta nika ni ka trubul e lampara ni o villelo e khameko, soke o Del o Gazda ka avel lengo villelo, ta von ka charoin ostade.

Pase si kana ka avel o Jesukristo

⁶ Ta o suecho phenda mange: Gala alava si chache ta chachune. O Gazda o Del, si isto gua kai del po Duo e profetanen, ta bichalda pe suecho te sikavel pe eslugenge e ezgode kai si te avenpe oma.

⁷ ¡Thoven sama, me ka avav oma! ¡Blagosime gua kai cherel so phenen e alava katar e poroka kai si pisime ande gava lil!

⁸ Me o Juan, dikhlem ta asundem gala ezgode. Ta kana dikhlem len ta asundem len, diem changa angla e porrne e suechoke kai sikada mange gala ezgode, te blagosiv le.

⁹ A vou phenda mange: Na cher gia, soke me sem esluga e Devleko sargo tu, sargo che phlal e poraukura ta sargo gola kai cheren so si pisime ande gava lil. Blagosisar e Devle.

¹⁰ Ta i phenda mange: Na muk gurudini e poroka kai si pisime ande gava lil, soke o vreme si pase,

¹¹ Muk e bilache te llan ande po bilachipe, ta e llene kai si le bilache mislura te llal ande pe bilache mislura. A ko si lacho manus te llal ande lachipe, ta ko si santo, te avel ios mai santo.

¹² Thoven sama, me ka avav oma ta ka dav suakone llene te dobil prema so cherda.

¹³ Me sem e Alfa ta e omega, o mai angluno ta o mai paluno.

¹⁴ Blagosime gola kai jalaven pe patave, te sai jan katar o kas e zivotoko, ta te den katar o udar e foroko.

¹⁵ Avri ka achen e bilache, ta sa gola kai cheren chirimate, gola kai cheren kurvaluko, gola kai mundaren, gola kai blagosin avere delen, ta sa gola kai si lenge drago te kojaven.

¹⁶ Me o Jesus, bichaldem me suecho te phenel gala ezgode e khanllirenge. Me sem katar e vicha e Davideki, e patrin kai likisti katar o kas chindo. Me sem e cherain kai klichil thiarinako.

¹⁷ O Santo Duo ta e rromi e Bakreki, phenen: ¡Aide! ta gua kai asunel, i vou te phenel: ¡Aide! a gua kai si trusalo, te avel te piel llabe katar o pai o llundo.

¹⁸ Sa tumenge kai asunen e alava katar e poroka kai si pisime ande gava lil, me phenav tumenge: Vareko te thovela ios ezgode ande gava lil, o Del ka thovel pe lete sa e zatranie kai si pisime ando lil.

¹⁹ A vareko te tromala te ikanel nesave alava katar gaia profesia kai si pisme ande gava lil, o Del ni ka mukel le te lel katar e septelie kai del o kas e zivotoko.

²⁰ Gua kai phenel gala ezgode, phenel: Ea, avav oma. Gia te avelpe. ¡Aide, Gazda Jesus!

²¹ O Gazda o Jesus te del po volipe saurren. Gia te avelpe.