Apokalipsis 21 - Biblia ande chib Romani

¹ Ondaka dikhlem iek miloso nevo ta iek phuv nevi, soke o purvo miloso ta e purvi phuv nakhle ta e mora ni saia ios.

E nevi Jerusalem

² Ta dikhlem o santo foro, e nevi Jerusalem kai fuliela katar o miloso e Devleko, lachardi sargo iek chei te zinilpe e chavea.

³ Ta asundem iek baro avazi kai avela katar o trono kai phenela: Kate si kai o Del zivil pe foroia. Ta o Del ka zivil lenchar, ta von ka aven leko foro, ta isto vou ka avel lengo edino Del.

⁴ Ta o Del ka kosel sa lenge ausa, ta ni ka avel ios o meripe, ni o roipe, ni o kukipe, ni e duk, soke e purve ezgode nakhle.

⁵ Ondaka gua kai besela po trono phenda: Me cherav sa e ezgode neve. Ta i phenda: Pisisar, soke gala alava si chache ta chachune.

⁶ Mapalal phenda mange: Cherdo si. Me sem e Alfa ta e omega, o mai anglal ta o mai palal. Ko si trusalo me ka dav le te piel llabe kotar katar likel o pai o llundo.

⁷ Gua kai ka dobil ka avel lenge dine sa gala ezgode; ta me ka avav leko Del ta vou ka avel mo chaurro.

⁸ A e darane, ta e llene kai ni pachan, ta e bilache, ta gola kai mundaren, gola kai cheren o kurvaluko, ta gola kai cheren e chirimate, gola kai blagosin avere delen ta sa e kojamne, ka aven kote kai phabol e iag ta o asufre, kai gua si o duito meripe.

⁹ Ondaka avilo mande iek katar e efta suechura kai saia len e efta tasura pherde katar e efta zatranie kai si te aven, ta dia orba manchar, ta phenda mange: Aide karinga, me ka sikavav chuke e diskinia kai si mangli, te avel e rromi e Bakreki.

¹⁰ Ta inllarda man ando Duo kai iek burdo baro, ta sikada mange o baro foro santo katar o Jerusalem, kai fuliela katar o miloso e Devleko.

¹¹ Ta o foro kletosarela katar o klichipe e Devleko; ta leko klichipe saia sargo iek barr but kuch sargo o diamante bristo, sargo e serchava.

¹² Truial katar o foro, saia iek baro zido kai sea le desudui udara, ta pe suako udar iek suecho; ta pe udara sea pisime e anava katar e desudui viche e Israeleke.

¹³ Ando este katar o foro sea trin udara, ando norte trin udara, ando sur trin udara, ando oeste trin udara.

¹⁴ Ta o zido e foroko saia upral pe desudui barra, ta upral pe lende e desudui anava katar e desudui apostolura e Bakreke.

¹⁵ O suecho kai dela orba manchar inllarela iek kas sunakuno te llinel e pole katar o foro, leke udara ta leko zido.

¹⁶ O foro saia le star riga, ta leko lungipe saia sargo leko bulipe. Ta o suecho llinda e pole katar o foro pe sunakune kastea: ta sea le dui milie ta dui stotine kilometrura: leko lungipe ta leko baripe saia is, to sargo leko bulipe.

¹⁷ Mapalal llinda i o zido; ta sea le sovardes ta panch pole: prema sar llinen e manusa, gia llinda o suecho.

¹⁸ O zido saia cherdo katar o diamante, a o foro saia cherdo katar o sunakai o lacho, ta klichila sargo serchava chisti.

¹⁹ E barra kai sea telal katar o zido e foroko sea lacharde ande but sukar barra: O purvo saia diamante, o duito saia safiro, o trito saia agata, o starto saia esmeralda,

²⁰ o panchto saia onise, o souto saia rubi, o eftato saia krisolito, o ojtoto saia berilo, o iniato saia topasio, o desto saia krisoprasa, o desuiekto saia jasinto, ta o desuduito saia amatista.

²¹ E desudui udara sea desudui klea, suako udar saia cherdo katar iek klen. Ta o drom e foroko saia cherdo katar o sunakai lacho ta bristo sargo e serchava.

²² Ta ni dikhlem ande lete o Cher e Devleko, soke o Gazda, o Del kai si le sa e zor ta o Bakro, si o cher e Devleko ande gua foro.

²³ E foro ni trubul le o kham ni o chon te del le villelo, soke o villelo e Devleko si kai kletosarel le, ta o Bakro si leki lampara.

²⁴ Ta e phuvia kai ka aven braduime ka phiren ande leko villelo, ta e charura e phuvienge ka anen leke po barvalipe ta po liubao.

²⁵ Ta e udara e foroke nikada ni ka aven phangle ollivesea, ta kote ni ka avel orachaia.

²⁶ Ta ka inllaren o barvalipe ta o liubao e phuviengo kai gua foro;

²⁷ ta nikada ni ka del ando foro ni iek ezgoda pokalime o kai cherel bilachipe o kojaipe, samo ka den ande lete gola kai lenge anava si pisime ando lil e zivotoko ta e Bakreko.