Apokalipsis 20 - Biblia ande chib Romani

E milia burs

¹ Dikhlem iekhe suecho kai fuliela katar o miloso, ta anela o klucho katar e jar ta iek baro lancho ande leko va.

² Ta phangla e dragono, o sap o purano kai si o llavolo ta i o Satanas, ta phangla le e lanchoia milia burs.

³ Ta chudia le ande jar, ta phangla le ta thoda po sello upral pe lete te na kojavel ios e sueto lligo ni ka nakhen milia burs, ta mapalal katar gala ezgode morabi te avel mukliardo cherricha vreme.

⁴ Ta dikhlem tronura, ta besle upral pe lende gola kai die len o gazdaripe te chinen kris. Ta i dikhlem e zivotura katar gola kai chinde lenge sore cheres e orba e chachi e Jesuseki ta cheres e orba e Devleki. Gola kai ni blagosisardea e azdava ni lake slika ta kai ni mukle te thoven e marka pe lengo chikat ta ni pe lenge va, ta pale zivisarde ta charoisarde e Kristoia milia burs.

⁵ A ogola mule ni zivisarde pale lligo ni nakhle e milia burs. Gava si o purvo llundipe.

⁶ ¡Blagosime ta santo gua kai ka ustel ando purvo llundipe! O purvo meripe ni gazdaril pe gala, soke von ka aven popura e Devleke ta e Kristoke, ta ka gazdarin lea milia burs.

⁷ Kana ka nakhen e milia burs, o Satanas ka avel mukliardo katar po phandipe,

⁸ ta ka llal te kojavel e phuvien kai si pe star riga e suetoke, kai o Gog ta kai o Magog, te chidel len te marenpe, ta von sea but sargo e chisai e moraki.

⁹ Ta llele pe sa e phuv, ta truisarde o pero katar o santo foro kai vou volil. Ta o Del cherda te fuliel iag katar o miloso ta phabarda len.

¹⁰ Ta o llavolo, kai kojavela len, avilo chudino ande iag ta o asufre, isto kote kai saia e azdava ta o profeta kojamno. Kote ka aven patime ostade orachaia ta ollivesea.

O krisipe

¹¹ Ta dikhlem iek baro trono parno ta gole kai besela pe lete. Ta angla lete sumbisaile e phuv ta o miloso ta niko ni dikhla len ios.

¹² Ta dikhlem e mulen, bare ta minone pe porrne angla o Del; ta e lila avile putarde, ta i aver lil avilo putardo kai si o lil e zivotoko, ta avile krisime e mule pala e ezgode kai sea pisime ande lila prema so von cherde.

¹³ Ta e mora irisarda e mulen kai sea ande late, ta i e charoina e merimaki irisarda e mulen kai sea ande late, ta suako lleno avilo krisime prema e ezgode kai cherda.

¹⁴ Ta e charoina e merimaki avili chudini ande iag, gava si o duito meripe,

¹⁵ ta ko ni saia pisime ando lil e zivotoko, avilo chudino ande iag.