Apokalipsis 2 - Biblia ande chib Romani

E poroka e khanllirake kai si ando Efeso

¹ Pisisar e suechoke katar e khanlliri kai si ando Efeso: Gia phenel gua kai si e efta cheraia ande leko va o chacho, ta phirel maskar e efta lampare sunakune:

² Me llanav so chere, ta llanav kai trudi tut but ande cho rado, ta llanav kai nasti terpi e bilachen, ta kai zumadan golen kai phenen kai si apostolura a von inai, ta llanglan kai von si kojamne.

³ Terpisardan but ta radisardan but pe cho rado, soke voli mo anav.

⁴ A iek ezgoda inai mange drago tutar, kai muklan o volipe kai saia tut mai anglal.

⁵ Goleke de tut golli katar pelan ta keisao, ta cher e ezgode kai cherea omanglal. A te na chereale, ka avav oma tute ta ka ikanav chi lampara kotar katar si thodi, te na keisailan.

⁶ A si tut gaia ezgoda kai murzi pe ezgode kai cheren e nikolaiture, ta i me murziu pe ezgode kai von cheren.

⁷ ¡O lleno kai si le kan, te asunel so phenel o Duo e khanllirenge! Ko ka dobil, ka dav le te jal katar o kas e zivotoko kai si po maskaral katar o paraiso e Devleko.

E poroka pala e Esmirna

⁸ Pisisar i e suechoke katar e khanlliri ande Esmirna: Gia phenel o mai angluno ta o mai paluno, gua kai saia mulo ta pale zivisarda.

⁹ Me llanav e ezgode kai chere ta e patnia kai nakhe ta cho chorripe, a tu san barvalo ta pinllarav o kojaipe katar e llene kai phenen kai si judiura, a von si iek khanlliri e judionengi kai si e Satanaseki.

¹⁰ Te na dara katar e patnia kai ka nakhe, soke o llavolo ka chudel nesave llenen tumendar ande rubie te sai aven zumade des llive, goleke lla chachimaia llik kai o meripe ta me ka dav tut e korona e zivotoki.

¹¹ ¡O lleno kai si le kan, te asunel so phenel o Duo e khanllirenge! Sa gola kai ka dobin, ni ka len e duk katar o duito meripe.

E poroka pala o Pergamo

¹² Pisisar e suechoke katar e khanlliri ando Pergamo: Gia phenel gua kai si le o jarni sano ta ostro pe duie riga:

¹³ Me llanav so chere ta kai zivi. Tu san kote kai besel o Satanas ta isto gia lla chachimaia ande mo anav. Ni muklan mo pachape ni ande llivesa kana mundarde e Antipase kai dela mi orba chachi, kai mundarde le kote kai zivil o Satanas.

¹⁴ A si man nesave ezgode kai inai mange drago tutar: soke si tut kote gola llene kai ni kamen te muken o sikadipe e Balaameko, gua kai sikavela e Balake te cherel te peren ando bilachipe e Israeleke chaven, ta cherela len te jan kurbanura kai dena avere delenge, ta te cheren o kurvaluko.

¹⁵ Ta i si tut gola llene kai ni muken o sikadipe katar e nikolaite kai me murziu pe lengo sikadipe.

¹⁶ Goleke keisao, soke te na chereale, me ka avav tute oma ta ka marav man lenchar e jarniea kai likel katar mo mui.

¹⁷ ¡O lleno kai si le kan, te asunel so phenel o Duo e khanllirenge! O lleno kai ka dobil ka dav le te jal katar o mana gurudino, ta ka dav le iek barrorro parno kai pe lete si pisime iek anav nevo kai niko ni pinllarel le, samo gua kai lel le.

E poroka pala e Tiatira

¹⁸ Ta pisisar e suechoke katar e khanlliri kai si ande Tiatira: Gia phenel o Chavo e Devleko, kai leke akha si sargo plameko iagako ta leke porrne si sargo o tuch kai klichil:

¹⁹ Me llanav so chere ta llanav cho volipe, cho pachape, cho rado, sar terpi, ta kai cho rado akana si mai baro.

²⁰ A si nesave ezgode kai inai mange drago tutar: kai muke gole diskinia kai ikhardol Jezabel kai phenel kai si porauka te sikavel, ta cherel me eslugen te cheren o kurvaluko ta cherel len te jan katar e kurbanura kai den len avere delenge.

²¹ Me diem la vreme te sai keilpe, a voi ni kamel pala po kurvaluko.

²² Goleke me peravav la ande postelia. Ka cherav te perel dukhadi ande postelia ta golen kai kurvinpe laia ka cherav len te nakhen bari patnia, te na keinape katar e ezgode kai voi cherel.

²³ Ta lake chaurren ka raniu len merimaia, ta gia sa e khanlliria ka llanen kai me sem gua kai pinllarel o mislo ta o lio, ta ka dav suakone llene prema so cherda.

²⁴ A tumenge ta i golenge kai si ande Tiatira, ta sa e llenenge kai inai len gua sikadipe ta kai ni pinllarde so von ikharen, e bare ezgode gurudine katar o Satanas, me phenav tumenge kai ni ka thovav aver pharipe pe tumende.

²⁵ A so si tumen, na muken le lligo ni ka avav me.

²⁶ Gua kai ka dobil ta kai ka cherel mo rado llik kai o son, me ka dav len o gazdaripe pe phuvia.

²⁷ Ta ka gazdarin iekhe kastea kai si sastruno, ta ka phagen len sargo o taso kai cherel o lleno e chikatar, gia sar liem i me o gazdaripe me Dadetar.

²⁸ Ta i ka dav len e cherain e thiarinaki.

²⁹ ¡O lleno kai si le kan, te asunel so phenel o Duo e khanllirenge!