Apokalipsis 19 - Biblia ande chib Romani

¹ Mapalal katar gala ezgode, asundem avazura e bare avazura e suetoke ando miloso kai phenena: ¡Aleluia! O braduipe, o liubao, o baripe ta e zor si e Gazdake amaro Del,

² soke leke krisa si chachune ta chache; soke krisisarda e bare kurvichka kai cherda te murilpe o sueto ande lako kurvaluko ta cherdala te pochinel o meripe katar leke esluge.

³ Ondaka pale phende: ¡Aleluia! Ta lako thuv vazdiniaol ostade.

⁴ Ta e bis ta star phure ta e star zivotura, die changa ta blagosisarde e Devle kai besela po trono, ta phenena: ¡Gia te avelpe! ¡Aleluia!

⁵ Ondaka likisto katar o trono iek avazi kai phenela: ¡Blagosisaren amare Devle sa leke esluge ta gola kai daran letar minone ta i bare!

⁶ Ta i asundem o avazi katar iek baro sueto, sargo kana basen but paia, ta sargo avazura katar e bare germipe kai phenela: ¡Aleluia! Soke o Gazda amaro Del kai si le sa e zor charoil.

⁷ Veseli amen, ta pherdiva dragostia ta da le o baripe, soke avilo o biau e Bakreko ta leki rromi lachardape.

⁸ Ta lake si dino te furiadol ando lino kuch chisto ta kai klichil soke o lino kuch si e ezgode lache kai cherel o santo foro.

⁹ Ta o suecho phenda mange: Pisisar: Blagosime gola kai si ikharde pe sinia katar o biau e Bakreko. Ta phenda mange: Gala si alava chachune e Devleke.

¹⁰ Me diem changa angla e porrne e suechoke te blagosiv le, a vou phenda mange: Na cher gua, soke me sem esluga sargo tu ta sargo che phlal kai pachan ande orba e chachi e Jesuseki. Blagosisar e Devle. Soke e orba e chachi e Jesuseki si o Duo katar e porauka.

O lleno po gra parno

¹¹ Ondaka dikhlem o miloso putardo; ta iek gra parno, ta o lleno kai llala po gra ikhardola Chacho ta Chachuno, marelpe ta krisil chachimaia.

¹² Leke akha sea sargo plameko iagako, ta pe leko soro sea but korone, ta saia le iek anav pisime kai niko ni pinllarela samo vou.

¹³ Saia furiado iekhe patavenchar kai sea makhle ando rat, ta leko anav si: o Alav e Devleko.

¹⁴ Ta e boñikura e milosoke furiade ando lino but kuch parno ta chisto, llana pala le pe gra parrne.

¹⁵ Ta katar leko mui likel iek jarni sano te ranil e phuvien, ta vou ka gazdaril len ikhe kastea sastruno, ta vou ustavel o than kote kai cherdol e mol katar e joli e Devleki kai si le sa e zor.

¹⁶ Ta pe leke patave ta pe leki chang si pisime gava anav: Charo e charonengo ta Gazda e gazdengo.

O jasardipe katar e azdava

¹⁷ Ta dikhlem iek suecho kai saia pe porrne ando kham, ta phenda bare avazea sa e chiriklienge kai furian po maskaral katar o miloso: ¡Aven ta chidiniaon pe bari sinia e Devleki,

¹⁸ te jan o mas katar e charura ta o mas e kapitanengo ta i zuralengo, mas grastengo ta i golengo kai llan pe lende, ta mas saurrengo, e llenengo kai si esluge ta e llenengo kai inai esluge, minonengo ta i barengo!

¹⁹ Ta dikhlem e azdava ta e charura e suetoke ta lenge boñikonen chidine, te marenpe golea kai saia po gra ta leke boñikonenchar.

²⁰ Te e azdava avili phangli, ta laia o kojamno profeta kai cherdaia angla la e bare ezgode kai gale ezgodenchar kojadaia e llenen kai liea e marka katar e azdava, ta kai blagosisardea lake slika. Ondaka e dui avile chudine llunde andre ande iek bari iag kai phabol ando asufre.

²¹ A ogola avile mundarde e jarniea kai likela katar o mui goleko kai saia po gra, ta sa e chiriklia chalile katar lengo mas.