Apokalipsis 18 - Biblia ande chib Romani

E Babilonia perel

¹ Mapalal katar gala ezgode, dikhlem aver suecho kai fuliela katar o miloso bare zoriaia, ta pe gachin klichila kai e phuv pherdili villelo

² Ta phenela bare avazea: ¡Pelitar e bari Babilonia! ¡Ta cherdili o cher e llavolonengo, ta kuibo katar suako duo melalo ta i kai sovel suako chirikli pokalime ta bilachi!

³ Soke sa e phuvia matile e moliaia katar lako kurvaluko, ta e charura e phuvienge kurvisaile laia, ta e llene katar e phuv kai chinen ta bichinen barvaile soke voi chinela suako ezgoda lendar te sai chaliavel o bilachipe kai saia lake drago.

⁴ Ta asundem aver avazi katar o miloso kai phenela: Liken latar tumen kai sen mo foro te na aven i tumen ande lako bilachipe te na len i tumen lake zatranie;

⁵ Soke lako bilachipe avilo llik kai o miloso ta o Del diape golli katar lako bilachipe.

⁶ Den la gia sar voi dia tumen ta pochinen lake dui droma mai but prema e ezgode kai cherda ta amin lake iek pipe dui droma mai zuralo neko gua pipe kai voi amisarda averenge.

⁷ Gia sar voi cherda baripe ta zivisarda ande dragostie isto gia cheren la tumen te nakhel patnia ta roipe, soke voi phenel ande po lio: Me besav sargo charoina. Ta ni sem phivli ta ni dikhav roipe.

⁸ Goleke, ande iek llive ka aven lake e zatranie: o meripe o roipe ta e bok, ta ka avel phabardi e iagaia, soke bari zor si e Devle o Gazda kai krisil la.

⁹ Ta e charura e suetoke kai kurvisaile laia ta kai laia jale e love ando bilachipe, ka roven ta ka kukin kana ka dikhen e thuv katar lako phabardipe.

¹⁰ Ta duratar pala laki zatrania, ta ka phenen: ¡Tesko, tesko, katar o baro foro katar e Babilonia, o foro zuralo! Soke ande iek saiato avila laki zatrania.

¹¹ Ta e llene katar e phuv kai chinen ta bichinen ka roven ta ka kukin pe late, soke niko ni ka chinel ios latar so voi bichinela:

¹² bichinela sunakai, rup, barra but kuch, klea, chiti vuneto cherdo katar o lino kuch, seda loli, kotora katar suako kas kai khandel sukar, ta katar suako ezgoda cherdi katar o marfil, ta suako ezgoda cherdi katar e kasta kai si sukar, ezgode jarkune, sastrune ta i cherde katar o marmol;

¹³ ta karanfili, meriso, taimano, mirra, olibano, mol, zeitino, arina sani, lliu, zivirinie, bakre, gra, bordona, esluge ta zivotura manusenge.

¹⁴ Ta ka phenen e foroke: ¡Inai tut ios che lache septelie kai gia perena chuke drago; ostade jasardan cho baripe ta cho barvalipe!

¹⁵ Gola kai chinena ta bichinena sa gala ezgode, barvaile pala gava foro, a von ka achen dur, soke ka daran, ka roven ta ka kukin,

¹⁶ ta ka phenen: ¡Tesko, tesko katar o baro foro, katar e Babilonia! Kai saia furiadi ando lino kuch vunete sargo kaline ta lole, ta saia lachardi ando sunakai ta ande klea.

¹⁷ ¡Ta samo ande iek saiato jasailo sa lako barvalipe! Ta sa e kapitanura ta sa gola kai radin ande moraachile dur

¹⁸ ta kana dikhle o thuv katar lako phabardipe, urkisarde ¿Savo foro sai te avel sargo gava baro foro?

¹⁹ Ta chudie chik pe pe sore, rovena ta urkina ta phenena: ¡Tesko, tesko katar o baro foro! Katar lako barvalipe barvaile sa gola kai sea len llimie ande mora. ¡Ta samo ande iek saiato achili zatrime!

²⁰ Tu, glamno miloso, veselisao pala gava baro foro; ta veselin tumen, sa gola katar o santo foro, ta e apostolura ta poraukura, soke kana o Del dosarda la, golea cherda tumenge o chachipe.

²¹ Ondaka iek suecho zuralo vazdia iek barr baro sargo barr kai moren lea o lliu, ta chudia le pe mora, ta phenda: Gia ka chuden tut tele, Babilonia, o baro foro, ta nikada ios ni ka dikhen pe tute.

²² Nikada ios ni ka asundon pe che droma o basaldipe katar e arpe, katar e firura ta katar e tuturuge, ta niko ni ka radil ios ande tute, ta ni ka asundol o barr kana morel o lliu.

²³ Ta nikada ios ni ka klichil o villelo katar e lampare ande tute, ta ni ka asundol ios biava ande tute. Soke gola kai chinena ta bichinena kai sea chire, sea e mai zurale pe sogo si o sueto ta kojadan e phuvien che kojaimaia.

²⁴ Soke ande gava foro maladilo o rat katar e poraukura ta i o rat katar o santo foro, ta katar sa e llene kai mundarde len pe phuv.