Apokalipsis 17 - Biblia ande chib Romani

E bari kurvichka dosali

¹ Iek katar e efta suechura kai sea le e efta tasura, avilo ta phenda mange: Aide karinga, me ka sikavav tut so si te avel e kurvichkake kai besel pe but paia.

² E charura katar sa e phuvia amisaile laia, ta e llene e suetoke matile e moliaia katar lako kurvaluko.

³ Ondaka o Duo inllarda man po pusto. Kote dikhlem iek diskinia besindo pe iek azdava loli kai pe late sea pisime anava kai kusena e Devle, ta sea la efta sore ta efta singa.

E diskinia pe azdava

⁴ Gaia diskinia saia furiadi ande chitura but lache, vunete sargo kaline ta lole, ta i saia lachardi ando sunakai ta ande klea but sukar, ta ande lako va saia iek taso sunakuno pherdo gado ta melalipe katar lako kurvaluko.

⁵ Pe lako chikat saia pisime iek anav gurudino: Babilonia e bari, e dei katar sa e kurvichke ta katar sa o bilachipe kai si ando sueto.

⁶ Ta dikhlem kai e diskinia saia mati katar o rat katar o santo foro ta i katar o rat e llenengo kai mundarde len, soke die e orba e chachi e Jesuseki. Kana dikhlem la, chudisailem but.

⁷ Ondaka o suecho phenda mange: ¿Soke chudisailian? me ka phenav chuke so si gurudino katar gaia diskinia ta e azdava kai inllarel la, kate si efta sore ta efta singa.

⁸ E azdava kai dikhlan si iek kai omanglal zivila ta akana inai; gaia azdava ka likel katar e bari jar oma te avel zatrime. E llene katar e phuv kai lenge anava inai pisime ando lil e zivotoko sar kana o Del cherda e sueto, ka chudinpe kana ka dikhen e azdava kai omanglal zivila ta akana inai, ta pale avel.

⁹ Kote ka dikhol kate si bizaipe ta ko si llanglo: E efta sore si efta burdura kai upral pe lende besel e diskinia. A e efta sore si efta charura.

¹⁰ Panch katar gala charura peletar, iek gazdaril a akana, ta aver charo si te avel. Kana ka avel, ni ka gazdaril but vreme.

¹¹ E azdava kai zivila omanglal ta akana inai, si o ojtoto charura, ta i vou si katar e efta charura, ta ka avel zatrime.

¹² E efta singa kai dikhlan si des charura kai ni ios ni charoin akana, samo iek saiato ka avel lenge dino te gazdarin e azdavaia.

¹³ Lengo mislo isto gua si, goleke ka den pi zor ta po gazdaripe e azdava.

¹⁴ Ka marenpe e Bakrea a o Bakro ka dobil len, ta lea si gola kai o Del esvirisarda ta si chache soke vou si Gazda e gazdengo ta Charo e charonengo.

¹⁵ Ta i o suecho phenda mange: E paia kai dikhlan, kote kai e diskinia besel si e phuvia, e forura, ta e chibia.

¹⁶ A e efta singa kai dikhlan pe azdava, ka murzin pe kurvichka ta ka muken la chudini ta i nangi; ta ka jan o mas lake esnagako, ta ka phabaren la e iagaia.

¹⁷ Soke o Del thoda ande lengo lio te cheren so vou mangel te cherdol: te aven ande iek mislo ta te den po gazdaripe e azdava, lligo ni ka cherdon e alava e Devleke.

¹⁸ E diskinia kai dikhlan, si o baro foro kai gazdaril pe charura kai si ando sueto.