Apokalipsis 15 - Biblia ande chib Romani

E efta suechura ta e efta muke

¹ Dikhlem ando miloso aver bari ezgoda kai saia chudo: Efta suechura kai saia len e efta zatranie kai si te aven pe phuv, ta mapalal katar gala ezgode, ka avel o son katar e joli e Devleki.

E efta tasura

² Ta i dikhlem sargo iek mora serchavaki amime iagaia, ta dikhlem golen kai reslea te dobin e azdava ta lake slika, ta ni mukle te thoven pe lende laki marka ni o numero katar lako anav, von sea pe porrne, pe mora serchavaki ta ande lenge va sea e arpe kai o Del diaia len

³ Ta llilabena e Moiseseki llili, o esluga e Devleko ta e llili e Bakreki, ta phenena: Baro ta sukar si sa so cherdan, Gazda, Devla kai si tut sa e zor orta ta chachune si che droma, Charo katar o santo foro.

⁴ ¿Ko ni ka daral tutar Gazda? ¿Ta ni ka blagosil cho anav? Soke samo tu san santo, goleke sa e phuvia ka aven ta ka blagosin tut, soke che krisa sikadile

⁵ Mapalal katar gala ezgode, dikhlem kai ando miloso putailo o cher e Devleko, e chara katar e orba e chachi,

⁶ ta katar o cher e Devleko likiste e efta suechura kai inllarena e efta zatranie. Von sea furiade patavenchar kai sea cherde katar o lino chisto kai klichila, ta truial katar lengo brek inllarena kavisa sunakune.

⁷ Ta iek katar e star zivotura dia e efta suechonen efta tasura sunakune, pherde katar e joli e Devleki kai zivil ostade.

⁸ Ta o cher e Devleko pherdilo thuv katar e Devleko baripe ta katar leki zor, ta niko nasti dela andre lligo ni ka getonpe e efta zatranie katar e efta suechura.