Apokalipsis 14 - Biblia ande chib Romani

O Bakro ta e esvirime

¹ Mapalal dikhlem e Bakre kai saia pe porrne upral po burdo katar o Sion. Lea sea stotina ta saranda ta star milie llene, kai saia pisime pe lengo chikat o anav e Bakreko, ta leke Dadeko.

² Ta mapalal asundem iek avazi sargo but paia kai avela e milosotar, sargo iek germipe zuralo; ta o avazi kai asundem saia sargo but llene kai basalen e arpe.

³ Ta llilabena iek llili nevi angla o trono ta angla e star zivotura, ta angla e phure. Ta niko nasti sikola gaia llili, samo e stotina ta saranda ta star milie, kai sea braduime maskar e llene kai si pe phuv.

⁴ Von si gola kai nikada ni amisaile diskinienchar. Von si gola kai llan pala o Bakro kaigo llal vou. Von si braduime maskar e llene, sargo so si dino mai anglal e Devleke ta e Bakreke.

⁵ Ta ande lenge muia ni maladilo kojaipe, soke angla o trono e Devleko von inai makhle.

O Chavo e Manuseko ta sou suechura

⁶ Dikhlem aver suecho kai furiala po maskaral katar o miloso ta inllarela e lachi viasta kai si ostade te phenel la e llenenge kai zivin pe phuv, kaigo si phuv, vicha, chib ta foro.

⁷ Ta phenda bare avazea: Daran e Devletar ta blagosin le, soke o vreme katar leki kris avili. Ta blagosin gole kai cherda o miloso e phuv e mora ta o pai kai likel katar e phuv.

⁸ Ondaka avilo aver suecho ta phenela: ¡Pelitar, pelitar e Babilonia o baro foro, soke cherda te pien sa e phuvia e mol katar lako kurvaluko!

⁹ O trito suecho avilo ta phenela bare avazea: Vareko te blagosila e azdava ta lake slika ta te lela e marka pe po chikat o pe po va,

¹⁰ i vou ka piel e mol katar e Devleki joli kai avilo thodo chisto ando taso katar leki joli; ta ka nakhel bari patnia ande iag ta ando asufre, angla e sante suechura ta angla o Bakro.

¹¹ Ta o thuv katar leki patnia likel ostade; ta gaia patnia ni achel, ni ollivesea ni orachaia, golenge kai blagosin e azdava ta i leke slika ta sa golenge kai len e marka katar leko anav.

¹² ¡Kate si o terpipe katar o santo foro, gola kai cheren so phenel o zakono e Devleko ta o pachape e Jesuseko!

¹³ Ondaka asundem iek avazi kai katar o miloso phenela mange: Pisisar blagosime katar angle gola llene kai meren ando Gazda. Ea phenel o Duo, ka achen te lelpe lendar o chiñipe katar lenge radura.

¹⁴ Ondaka dikhlem iek oblako parno, ta upral po oblako besela iek lleno kai dikhola sargo o Chavo e Manuseko: ta pe leko soro saia iek korona sunakuni, ta ande leko va iek jarni bangardo sano ta ostro.

¹⁵ Ta katar o cher e Devleko likisto aver suecho kai phenela bare avazea goleke kai besela po oblako: ¡Thov cho jarni bangardo ta chide so dia e phuv, soke avilo o vreme te chidiniaon e septelie kai dia e phuv soke si resle!

¹⁶ Ondaka gua kai besela po oblako thoda po jarni bangardo ta chidia e septelie kai dia e phuv.

¹⁷ Mapalal likisto aver suecho katar o cher e Devleko kai si ando miloso, ta i le saia iek jarni bangardo sano ta ostro.

¹⁸ Ta likisto katar o altar aver suecho kai gazdarila pe iag, ta ikharda bare avazea gole kai saia le o jarni bangardo, ta phenela: ¡Thov cho jarni bangardo ta chin e drak katar e kasta e phuviake, soke lake drakha si resle!

¹⁹ O suecho chudia po jarni bangardo pe phuv ta chinda e drak katar e kasta e phuviake ta thoda e drak ando baro than, kote kai ustadon kai gua si e joli e Devleki.

²⁰ Ta avile ustade e drakha ando baro than avri katar o foro ta likisto rat kai reslo llik kai e salvaria e grastenge, ta reslo llik kai e trin stotine kilometrura duratar.