Apokalipsis 12 - Biblia ande chib Romani

E diskinia ta o dragon

¹ Dikhili ando miloso iek bari ezgoda, iek diskinia furiadi e khametar ta telal katar lake porrne saia o chon ta upral katar lako soro saia iek korona desuduie cheraiengi.

² E diskinia saia khamni ta urkila katar e dukha soke aviloia lako vreme te maladol lake.

O dragon

³ Ta i dikhili aver bari ezgoda ando miloso, iek baro dragon lolo kai saia le efta sore ta des singa ta iek korona pe suako soro.

⁴ Ta leki pori chirdela iek katar suako trin cheraia kai si ando miloso, ta chudia len upral pe phuv ta o dragon thodape angla e diskinia kai saia khamni te jal lake minone kana ka biandol.

⁵ Ta e diskiniake maladila iek murusorro kai ka gazdaril iekhe kastea sastruno sa e phuvien, ta lie lake chaurre e Devleke ta leke tronoke;

⁶ ta e diskinia nasli po pusto, kote kai o Del lacharda lake iek than, te sai pravaren la milia ta dui stotine ta sovardes llivesa.

⁷ Mapalal saia iek baro maripe ando miloso, o Migel ta leke suechura, marenape e dragonoia ta marelape o dragon ta leke suechura.

⁸ Ta nasti dobisarde, ta ni avila lenge ios than ando miloso.

⁹ Ta avilo tradino avri o baro dragon, o sap o purano kai ikhardol llavolo ta Satanas, kai kojavel sa e sueto; avilo tradino pe phuv ta leke suechura avile tradine lea.

¹⁰ Ondaka asundem iek baro avazi ando miloso kai phenela: Akana avilo o braduipe, e zor ta e charoina katar amaro Del, ta o gazdaripe katar leko Mesias; soke avilo tradino avri gua kai dosarela amare phlalen, angla amaro Del ollivesea ta i orachaia.

¹¹ Ta von dobisarde le pala o rat e Bakreko, ta pala lenge alava e chache, ta lenge ni mola niso lengo zivoto, ta ni chitilape lenge te meren.

¹² Goleke veselin tumen milosura. Ta tumen kai zivin ande lende ¡A tesko e llenenge kai zivin pe phuv ta pe mora, soke o llavolo fulisto tumende bare jolinaia soke llanel kai inai le but vreme!

¹³ Ta kana dikhla o dragon kai avilo tradino pe phuv, llelo pala e diskinia kai maladilaia lake o minono te marel la.

¹⁴ Ta avila lake dine dui pakha katar e bari agila, te sai furial angla o sap karing o pusto kai lako than, kote kai saia te pravarenla trin burs ta dopas.

¹⁵ A o sap chudia katar po mui pai te sai cherel iek len palal pala e diskinia, te sai avel chirdini e paietar.

¹⁶ A e phuv pomozisarda e diskinia, soke e phuv putarda po mui ta nakhada e len kai o dragon chudiaia katar po mui.

¹⁷ Ondaka o dragon pherdilo joli pe diskinia ta llelo te marel e vichaia kai achilaia katar o porodo e diskiniako, gola kai cheren so phenel o zakono e Devleko ta si len e orba e chachi e Jesukristoki.

¹⁸ Ta o dragon thodape pasa e mora.