Apokalipsis 11 - Biblia ande chib Romani

¹ Mapalal die man iek kas te llinav e pole, ta phende mange: Uste ta llin gachin pole si ando cher e Devleko ta gachin pole si ando altar, ta llin gachin llene blagosin kote.

² Na llin e pole kai si avrial katar o cher e Devleko, soke gava than si dino golenge kai ni pachan. Von ka gazdarin ando Jerusalem saranda ta dui chon.

³ A me ka bichalav dui poraukura te phenen murni viasta chachuni. Ka bichalav len furiade ande patave krupne te den orba milia ta dui stotine ta sovardes llive.

⁴ Gala dui poraukura si e dui kasta maslinkenge ta e dui kandelabrura kai si angla o Del, o charo e suetoko.

⁵ Fiko te mangel te marel len, von ka chuden iag katar po mui ta ka phabaren pe dusmanonen, a vareko te mangela te cherel lenge vareso bilacho, i von ka meren isto gia.

⁶ Gala dui poraukura si len zor te cheren te na del peke kana von ka phenen so si te avelpe. Ta i si len e zor te bolden o pai ando rat, ta i te dukhaven e sueto nasualimaia pe gachin droma von mangena.

⁷ A kana ka nakhel o vreme kai von si te phenen e orba e chachi, e azdava kai likel katar e bari jar ka marelpe lenchar, ta ka dobil len ta ka mundarel len.

⁸ Lenge esnage ka achen chudine pe droma katar o foro kai krustosarde e Gazda. E llene ikharen gale foro Sodoma ta i ikharen le Ejipto.

⁹ Ta ande trin llive ta dopas, e llene katar sa e phuvia chibia ta forura, ka dikhen lenge esnage ta ni ka muken te prajon len.

¹⁰ Gola kai zivin pe phuv ka veselinpe katar lengo meripe. Ka aven gia vesele kai ka den pe ezgode iek avereke, soke e dui poraukura cherena len te nakhen bari patnia.

¹¹ Ondaka kana nakhle trin llive ta dopas, o Del llungada len ta pale ustile, ta sa e llene kai dikhle len, pherdile dar.

¹² Ta e dui poraukura asunde iek baro avazi kai avela e milosotar, ta phenda lenge: ¡Aven karinga! Ta likiste ando miloso pe iek oblako ta leke dusmanura dikhle len.

¹³ Isto kote zurale dermosaili e phuv kai zatrisarda des katar e stotina katar o foro, ta efta milie llene mule. Gola kai achile llunde daraile but goleke blagosisarde e Devle kai si ando miloso.

¹⁴ O duito tesko nakhlo; a o trito iakom avel.

E eftato tuturuga

¹⁵ O eftato suecho basalda pi tuturuga, ta asundile avazura zurale katar o miloso ta phenena: E charoine e suetoke akana si katar amaro Gazda ta katar leko Kristo, ta vou ka gazdaril ostade.

¹⁶ E bis ta star phure kai besena angla o trono e Devleko, die changa pe phuv ta blagosisarde e Devle,

¹⁷ ta phenena: Fala chuke Devla, kai tu sa chere, kai san ta kai sana, soke lian chi bari zor ta thodan tut te gazdari.

¹⁸ E phuvia ni pachan ande tute ta akana avilo cho llive e jolinako, o vreme kana ka chine e kris e mulenge ta ka veseli che eslugen, e profetanen ta che santo foro ta golen kai blagosin cho anav, avena bare o minone, ta ka zatri golen kai zatrin e phuv.

O cher e Devleko ando miloso

¹⁹ Ondaka putailo o cher e Devleko kai si ando miloso ta dikhola e arka katar o zakono. Ta sea esterliche ta germipe, dermosaili e phuv ta diapeke krupe.