Apokalipsis 1 - Biblia ande chib Romani

Salami

¹ Gava si so sikada o Del e Jesukristoke katar e ezgode kai si te avenpe oma, te sai sikavel vou e llenen kai si leke esluge. Goleke o Jesukristo bichalda iekhe suecho te sikavel gala ezgode e Juaneke kai si leko esluga,

² Ta o Juan phenda sa o chachipe katar e ezgode kai dikhla ta katar e orba e chachi e Jesukristoki.

³ Blagosime gua kai chitil gava lil, ta blagosime i gola kai asunen gala alava katar e ezgode kai si te avenpe ta kanden e alava kai si pisime ande gava lil, soke pase si o vreme.

⁴ Me o Juan, bichalav salami e efta khanllirenge kai si ande Asia. Len tumen o volipe ta e pas katar gua kai si, kai saia, ta kai si te avel; ta i katar e efta duura kai si angla leko trono,

⁵ ta i katar o Jesukristo, kai phenel o chachipe, ta si o purvo kai ustilo katar o meripe ta kai gazdaril pe sa e charura katar e phuv. O Kristo volil amen ta jalada amen katar amaro bilachipe pe ratea,

⁶ ta cherda amendar charura ta popura kai radin e Devleke kai si leko Dad ¡O baripe ta e zor te aven leke ostade! Gia te avelpe.

⁷ ¡O Kristo avel maskar e oblakura! Suako iak ka dikhel le ta i gola kai mundarde le, ta sa e phuvia e suetoke ka roven pala le. Ea, gia te avelpe.

⁸ Me sem e Alfa ta e Omega phenel o Gazda, o Del kai si le sa e zor; gua kai si, kai saia, ta kai si te avel.

O sikadipe katar o Jesukristo

⁹ Me o Juan sem tumaro phlal, soke me sargo tumen, si man vera ando Jesukristo. Goleke sem katar e Devleki charoina, ta gia sargo tumen, si man e zor te nakhav e patnia. Me sema phanglo ande isla kai ikhardol Patmos, soke sikavava e Devleke alava ta e orba e chachi e Jesukristoki.

¹⁰ Me sema ando Duo ando llive e Devleko, ta asundem palal pala mande iek baro avazi sargo iek tuturuga,

¹¹ kai phenela: Me sem e Alfa ta e Omega, o mai angluno ta o mai paluno, ta phenela: Pisisar pe iek lil so dikhe, ta bichal le e efta khanllirenge kai si ande Asia, ando Efeso, Esmirna, Pergamo, Tiatira, Sardes, Filadelfia, ta Laodisea.

¹² Boldinailem te dikhav katar avela o avazi kai dela orba manchar, ta dikhlem efta lampare sunakune,

¹³ ta po maskaral katar e efta lampare saia iek lleno sargo o Chavo e Manuseko, furiado iekhe patavenchar kai resena llik kai leke porrne ta iek kavisi sunakuno kai resela llik kai leko brek.

¹⁴ Ta leko soro ta leke bal sea parrne sargo e bakrane bal, parrne sargo thud, ta leke akha sea sargo plameko iagako.

¹⁵ Leke porrne klichina sargo o tuch kana kosen le, ta sargo kana biladol ande furnava. Ta leko avazi asundilo but zurale sargo iek bari len.

¹⁶ Ta ande leko va o chacho sea efta cheraia. Ta katar leko mui likela iek jarni sano ta ostro pe dui riga. Leko mui saia sargo o kham kana kletosarel zurale.

¹⁷ Kana dikhlem le pelemtar kai leke porrne sargo mulo. Vou thoda po va o chacho pe mande, ta phenda mange: Na dara. Me sem o mai angluno ta o mai paluno,

¹⁸ gua kai zivil. Me sema mulo, ta akana ziviu ostade, ta mande si e kluchura katar o meripe.

¹⁹ Pisisar so dikhlan: so si akana ta so ka avel mai angle katar gala ezgode.

²⁰ Gava si so si len gurudino e efta cheraien kai dikhlan pe murni chachi, ta so si len gurudino e efta lampare sunakune: E efta cheraia si e efta suechura katar e efta khanllira, a e efta lampare si e efta khanllira.