Amos 9 - Biblia ande chib Romani

Niko ni ka nasel e Devletar

¹ Dikhlem e Devle kai saia pasa o altar, ta phenda mange: Perav e direkura llik kana ka peren, te dermonpe e udara, ¡te peren pe kotora pe llene! Gola kai ka achen llunde, ka mundarav len jarnienchar, te nasena, ni iek lendar ni ka achel llundo.

² Te guruduna andre ande phuv, kotar ka ikanav len, te likena llik kai o miloso, kotar ka cherav te fulien.

³ Te guruduna pe rig mai vazdino katar o burdo Karmelo, incha ka llav te anav len, ta te guruduna mandar chak telal katar e mora, ka bichalav e sapa ta ka dandaren len,

⁴ a lenge dusmanura te inllarena len phangle ande aver phuv, inchate ka bichalav o jarni te mundarel len. ¡Me ka thovav me akha pe lende te zatriv len, na te blagosiv len, suako drom ka aven angla me akha!

⁵ O Del kai si le sa e zor, dodil e phuv ta e phuv bilaol ta e llene roven. E phuv vazdiniaol ta fuliel, sargo e paia katar o Nilo.

⁶ O Del thoda pi soba ando miloso ta o putardipe pe phuv. Vou ikharel e paien katar e mora ta chudel len pe phuv. Vou si o Del, kai leko anav si baro.

⁷ Gia phenel o Del: Israelitura, mange sa e llene si sargo iek. Isto gia sar andem tumen katar o Ejipto, andem katar e Kreta e filisteonen, ta katar o Kir andem e arameonen.

⁸ O Del dikhel pe iek charoina bilachi, ta phenel: Me ka zatriv len katar e phuv, a ka braduiv e porodo katar o Jakob. Me o Del phenav le.

⁹ Me ka cherav te chiston e Israele isto gia sar chiston o lliu ta ni iek lliu ni perel pe phuv.

¹⁰ Sa e llene kai cheren o bilachipe ande mo foro ka mundaren len e jarniea, sa gola kai phenen kai ni ka nakhel niso, ta kai e zatrania ni ka resel lende.

O Israel pale ka avel vazdino

¹¹ Kana ka avel o llive, me ka vazdav pale e chara katar o David kai akana si peradini. Ka lacharav e zidura phage ta ka vazdav len pale katar e zatrania. Ka vazdav le gia sar cherdem le omanglal,

¹² te sai len so achel katar o Edom ta sa e phuvia gola kai ikharen man. Gia phenda le o Del, ta gia ka cherel le.

¹³ Aven e llivesa, phenel o Del, kai e llene kai putaren e phuv ka resen ogolen kai chiden e septelie, ta gola kai ustaven e drakha ka resen ogolen kai thoven e simicha e drakhaki, ta sa e burdura ka bilaon.

¹⁴ Ondaka ka anav me foro o Israel kai si phanglo ande aver phuv, ta von ka vazden pale e forura kai achile zatrime, ta pale ka zivin andre. Ka bariaren vostanura drakhake, ta lendar ka pien e mol. Ka bariaren vostanura, ta lendar ka jan e septelie.

¹⁵ Me ka thovav len ande lengi phuv, ta nikada ios ni ka chuden len kotar, soke me diemla lenge. Gia phenda le o Del.