Amos 8 - Biblia ande chib Romani

E kotaricha katar e septelie resle

¹ O Del sikada mange gaia ezgoda: Saia iek kotaricha katar e septelie resle,

² ta vou puchla man: ¿So dikhe, Amos? Ta me phendem: Iek kotaricha katar e septelie resle. Ta o Del phenda mange: O Israel si reslo, ni ka prostiv le ios.

³ Gua llive e llene kai llilaben ando cher e Devleko, ka kukin, ta but esnage mule ka aven chudine pe suako rig, ta niko ka phenel niso.

E kris katar o Israel si pase

⁴ Asunen, tumen kai ustaven e lachen ta zatrin e chorren katar e phuv,

⁵ tumen kai phenen ¿Kana ka nakhel e mesechina te sai bichina o lliu? ¿Kana ka nakhel o sabado te sai bichina kuch o marrno, ta kojaimaia ka phariava le?

⁶ ¡Aide te zatri e golen kai si chorre te sai china len lovenchar, ta golenge kai trubul len ta china len minienchar! ¡Ta ka bichina so chudelpe katar o lliu!

⁷ O Del jala sovel pe dragostia e Jakobeki: Nikada ni ka bristarav man so cherde.

⁸ ¿Ni ka dermolpe e phuv pala sa gala ezgode? ¿Ni ka roven sa e llene katar o foro? ¡E phuv ka vazdiniaol ta ka fuliel, isto gia sar liken ta fulien e paia katar o Nilo!

⁹ Gua llive, phenel o Del, ka cherav te perel o kham ando dopas e lliveseko, ta o llive ka cherdol truniariko pe sa e phuv.

¹⁰ Ka boldav e slave ando kukipe pala e mule, e llilia ando roipe, ta ka cherav te thoven pe tumen patave zalosne, te jaliaren tumare sore. Ka roven sargo kana merel o edino chavo, ta sa ka avel ando cherkipe.

¹¹ Aven llivesa, phenel o Del, kai ka bichalav bok pe phuv, na bok te jan marrno, ta na trus te pien pai, a bok te asunen o alav e Devleko.

¹² E llene ka llan pe suako rig, te roden o alav e Devleko, katar iek mora karing aver mora, katar o norte llik e rig kai likel o kham, ta ni ka malaven le.

¹³ Gua llive e chorra sukar ta e chaurre tromane, ka baldinpe trusatar.

¹⁴ Gola kai jan sovel pe dela katar e Samaria, gola kai phenen: Pala cho del, ioi Dan, ta phenen: Pala che dela, ioi Berseba, ka peren ta ni ka usten ios.