Amos 7 - Biblia ande chib Romani

E poroka katar e langoste

¹ Gava sikada mange o Del: Gola kai barion e septelie mai palune, gola kai chiden mapalal kana chiden e septelie katar o charo, dikhlem e Devle kai cherela langoste.

² Ta kana e langoste jale sa o zelenipe kai bariola pe phuv, phendem: ¡Devla, prostisar amen! ¿Sar ka terpil cho foro o Jakob kana si iek foro gia minono?

³ Ondaka o Del keisailo te cherel gaia ezgoda, ta phenda: ¡Ni ka avel gia!

E poroka katar e iag

⁴ O Del sikada mange gaia ezgoda: Dikhlem le kai e iagaia krisisarela, ta e iag sukarda e mora ta phabarela e vostanura.

⁵ Ta phendem: ¡Achi Devla, me moliv man chuke! ¿Sar ka terpil cho foro o Jakob kana si iek foro gia minono?

⁶ Ondaka o Del keisailo te cherel gaia ezgoda, ta phenda: ¡Ni gaia ezgoda ni ka cherav la!

E poroka katar e plomada

⁷ Ta i o Del sikada mange gava: Vou saia pasa o zido ta ande leko va saia iek plomada katar e llene kai radin ande barra.

⁸ Ta o Del puchla man: ¿So dikhe Amos? Me phendem leke: Iek plomada katar e llene kai radin ande barra. Ta o Del phenda mange: Me thovav iek plomada pe mo foro o Israel. Ni ka terpiv le ios.

⁹ E thana vazdine katar o Isaak ka aven zatrime, ta e santuariura katar o Israel ka achen sa peradine. ¡Ka vazdav o jarni pe familia katar o Jeroboam!

O Amos ta o Amasias

¹⁰ O Amasias, kai saia popo ando Betel, bichalda te phenen e charoke katar o Israel, o Jeroboam: O Amos llal maskar e llene katar o Israel te vazdel len pe tute. E phuv nasti terpil ios leke alava.

¹¹ Soke gia phenda o Amos: O Jeroboam ka mundaren le jarnienchar, ta e Israele ka inllaren le phanglo ande aver phuv.

¹² Ta o Amasias phenda e Amoseke: Porauko, llatar, nas kai e phuv katar o Juda, ta incha ja cho marrno ta incha poraukisar,

¹³ ta na poraukisar ios ando Betel, soke si santuario e charoko ta o cher katar e charoina.

¹⁴ A o Amos phenda leke: Me ni sem profeta, ta mo dad inai profeta. Me arakhav bakren ta chidav simochine,

¹⁵ a o Del lia man katar e stoka ta phenda mange: Lla ta poraukisar e Israeleke.

¹⁶ Goleke, asun o alav e Devleko. Tu phene: Na de orba bilachi po Israel ta na phen niso bilacho katar e chave katar o Isaak.

¹⁷ A o Del phenel gia: Chi rromi ka avel kurvichka ando foro, ta che chaurren ta che chorren ka mundaren len e jarnienchar. Ta ka chelenpe te sai fulaven chi phuv, ta tu ka mere ande iek phuv pogani ta e Israele ka inllaren le phanglo ande iek phuv kai si dur.