Amos 2 - Biblia ande chib Romani

¹ Gia phenel o Del: E llene katar o Moab cherde gachin ezgode bilache kai ni ka prostiv len, soke phabarde e kokala katar o charo e Edomeko lligo ni cherdile prajo iagako.

² Goleke ka phabarav e phuv katar o Moab, ta goia iag ka phabarel lenge bare chera katar o Keriot, ta ande urkipe marimake ta basaldipe katar e tuturuge, ka meren e moabitura.

³ ¡Ka ikanav e charo maskar o foro, ta ka mundarav le ta leke sudonen mai preche! Gia phenda le o Del.

⁴ Gia phenel o Del: E llene katar o Juda cherde gachin ezgode bilache soke ni asunde o sikadipe e Devleko, ta ni cherde leki volia, a radisarde isto gole delenge kai radisarde lenge purane.

⁵ Goleke ka phabarav o Juda, ta e iag ka phabarel lenge bare chera katar o Jerusalem.

E kris po Israel

⁶ Gia phenel o Del: E llene katar o Israel cherde gachin ezgode bilache kai ni ka prostiv len, soke bichinde e lache llenen, ta die e chorre llenen pala e minie.

⁷ Ustaven e chorren, muken len ando lallao, ta ni chinen lenge kris orta. O dad ta o chavo soven isto iekhe diskiniaia, ta ni den liubao me anaveke.

⁸ Inzarde pe patave kai lie kana die love unllile, jan o jape kai chirade e delenge ta e lovenchar kai len kojaimaia pien mol ande chera katar lenge dela.

⁹ Me zatrisardem e amorreonen angla lende, kai sea bare sargo e sedrura ta zurale sargo o roble. Zatrisardem lenge septelie ta chindem lenge zile.

¹⁰ Ikandem tumen katar o Ejipto, inllardem tumen saranda burs po pusto te dav tumenge lengi phuv.

¹¹ Katar tumare chave cherdem poraukura, ta nazareonura. Gia phenda le o Del.

¹² A tumen pe zor cherden te pien mol e nazareonura, ta ni muklen e profetanen te den orba ande mo anav.

¹³ Goleke me ka chichidav tumen kote kai sen, gia sar chichidiniaol o lliu ando iek bordon.

¹⁴ Makar te prastena ni ka nasen. O lleno mai zuralo ni ka blazil leki zor, ta ni o mai tromano nasti ka braduilpe.

¹⁵ O lleno kai chudel llide ni ka terpil, ta ni ka braduilpe. Ni ka braduilpe o lleno kai ka prastel zurale, ni o lleno kai ka nasel pe gra.

¹⁶ Gua llive, o mai tromano katar e boñikura, ka nasel nango. Gia phenda le o Del.