Amos 1 - Biblia ande chib Romani

¹ E alava katar o Amos, chobano katar o Tekoa, kai poraukisarda katar o Israel dui burs mai anglal te dermolpe e phuv, ande llivesa katar o charo e Judaeko o Ozias, ta ande llivesa katar o Jeroboam, chavo katar o Joas charo katar o Israel.

² Kana o Del cherel te asunen leko avazi sargo girmipe katar o Sion, ando Jerusalem, e patra katar e phuv sukon ta sukol o than mai vazdino katar o Karmelo.

E kris katar e phuvia kai si pase

³ Gia phenel o Del: E llene katar o Damasko cherde o bilachipe ta ni ka prostiv len, soke ustade po Galaad sargo kana ustadol o lliu e sastrea.

⁴ Ka phabarav o cher katar o Jazael, ta e bare chera katar o Ben Adad ka phabon.

⁵ Pe zor ka putarav e udara katar o Damasko, ka zatriv e charo katar o Bikat aven ta e gazda katar o Bet eden, ta e sirionen ka inllaren len phangle ando Kir, gia phenda le o Del.

⁶ Gia phenel o Del: E llene katar e Gaza cherde gachin ezgode bilache, kai ni ka prostiv len, soke inllarde phangle saurren katar iek foro ta bichinde len ando Edom te aven sluge.

⁷ Goleke ka phabarav iag pe zidura katar e Gaza, ta goia iag ka phabarel lenge bare chera sukar.

⁸ Ka zatriv e charoina katar o Asdod ta e gazda katar o Askalon. ¡Sa me zoriaia ka dav po Ekron, ta ni iek filisteo ni ka achel llundo! Gia phenda le o Del.

⁹ Gia phenel o Del: E llene katar o Tiro cherde gachin ezgode bilache kai ni ka prostiv len, soke die iekhe foro kai o Edome te phanden le, ta bristraile kai achilea lenchar po alav sargo phlal.

¹⁰ Goleke ka phabarav e iag pe zidura katar o Tiro, ta goia iag ka phabarel lenge bare chera.

¹¹ Gia phenel o Del: E llene katar o Edom cherde gachin ezgode bilache, kai ni ka prostiv len, soke llelo pala po phlal o Israel e jarniea. Ta ande pi joli ni mislisailo so cherela ta leki murzania ni phagili.

¹² Goleke ka phabarav o Teman, ta e iag ka phabarel e bare chera katar o Bosra.

¹³ Gia phenel o Del: E llene katar o Amon cherde gachin ezgode bilache kai ni ka prostiv len, soke kana mangena te bariol lengi phuv chinden po dopas e diskinien katar o Galaad kai sea khamne.

¹⁴ Ka phabarav e iag pe zidura katar o Raba, ta goia iag ka phabarel lenge bare chera ando germipe katar iek llive marimako

¹⁵ ta lenge charo ka inllaren le phanglo, ta sa leke sudonen. Gia phenda le o Del.