Abdias 1 - Biblia ande chib Romani

O lallao katar o Edom

¹ E ezgode kai o Del cherda te dikhel o Abdias. Amen asundam o alav e Devleko, iek bichaldo llelo karing e phuvia te phenel lenge, Gia phenel o Del: ¡Aide! ¡Aide te mara amen e Edomea!

² Ka cherav te ave minono maskar e phuvia ta te ja baro lallao.

³ Cho baripe kojada tut. Tu zivi ando putardipe katar e pechine ta cho cher si vazdino chak upre, goleke misli kai niko nasti peravel tut.

⁴ I te furiaa sargo e agila ta te thovea cho kuibo maskar e cheraia, kotar ka cherav te pere. O Del phenel le.

⁵ Te avena orachaia e kochkaria te choren tut, ni ka choren tutar sa. Te avena e llene kai chiden e drakha ni ka len sa e krangura. A che dusmanura zatrisarde tut sa.

⁶ ¡Sar rodie ande ezgode katar o Esau! ¡Chorde sa leko barvalipe!

⁷ E llene kai amisaile tuia kojade tut, tradie tut katar e phuv. Isto che pharnave mangen marenpe tuia, ta thoven chuke sole te pere. ¡O Edom inai bizai!

⁸ Gia phenel o Del: Kana ka dukhavav e Edome ka zatriv sa leke llenen kai si bizai, ta ka lav o bizaipe katar e llene kai zivin pe burdura ande phuv katar o Esau.

⁹ E boñikura katar o Teman ka izdran daratar, ta ande burdura katar o Esau niko ni ka achel llundo.

E dos katar o Edom

¹⁰ Ka ja baro lallao ta ka ave zatrime ostade, soke dian orbe kojamne katar cho phlal o Jakob.

¹¹ Kana o dusmano lia o barvalipe e foroko, kana e boñikura katar aver phuvia perade e udara katar o Jerusalem, ¡I tu sana sargo von! Kana fulade peke o Jerusalem ta lie leko barvalipe ¡I tu cherea sargo von!

¹² Saia te na veseli tut kana cho phlal saia dukhado, ta saia te na veseli tut kana perela o Juda, ando llive katar leki zatrania. Saia te na mare espurnia lendar kana von sea but brigime.

¹³ Saia te na de ande mo foro kana von nakhena patnia, ta saia te na veseli tut kana perena, ta te na le leko barvalipe ando llive katar leki nuzda.

¹⁴ Ta saia te na thove tut pe droma te mundare e llenen kai nasena, ta saia te na de len ande va katar lenge dusmanura ando llive katar e patnia.

¹⁵ So cherdan averenge, ka cheren le i chuke. ¡Ka perel pe cho soro! Soke o llive e Devleko si pase sa e phuvienge.

E dragostia katar o Israel

¹⁶ Gia sar tumen pilen pe mo santo burdo, isto gia ka pien ogola phuvia, polokorre ka pien, ta ka ni ka dikhon ios, sargo kana nikada sea.

¹⁷ A po burdo o Sion ka aven nesave llene kai ka nasen, ta o porodo e Jakobeko pale ka lel pe phuvia.

¹⁸ O porodo e Jakobeko ta e Joseeko ka aven sargo iag, a o porodo katar o Esau ka avel sargo char suki ta e iag ka phabarel la sa. ¡Niko katar o Esau ka achel llundo! Me, o Del phenav le.

¹⁹ E israelitura katar o Negev ka len o burdo katar o Esau, ta gola kai si ande Sefela ka len e phuv katar e filisteura, ta i ka len e umalia katar o Efrain ta e umalia katar e Samaria. Ta o Benjamin ka lel o Galaad.

²⁰ Ta e israelitura kai sea phangle, ka len e phuv katar e kananeura llik kai e Sarepta. Ta e israelitura katar o Jerusalem kai si phangle ando Sefarad, ka len e forura katar o Negev.

²¹ Ta ka llan braduimaria po burdo katar o Sion te krisin o burdo katar o Esau, ta e charoina ka avel e Devleki.