3 Juan 1 - Biblia ande chib Romani

Salami

¹ O phuro katar e khanlliri bichalel salami e Gaioke kai me voliv le chachimaia.

Salami e Gaioke

² Phlala, mangav e Devletar, te llal chuke sukar ande suako ezgoda, te ave sasto, ta te llal chuke sukar ande cho pachape.

³ But veselisailem kana avile mande nesave phlal, ta phende mange kai san ando chachipe ta kai phire ando chachipe.

⁴ Mi mai bari veselia si kana asunav kai me chaurre ando pachape llan po drom o chacho.

⁵ Phlala, tu chere but sukar kana pomozi amare phlalen ta i kana pomozi avere phlalen kai aven duratar.

⁶ Von die chi orba ande khanlliri ta phende katar cho volipe. Sukar avela te pomozin len ande so trubul len, soke von si te llan e dromea, gia sar si drago e Devleke.

⁷ Soke von likiste te phenen e lachi viasta e Jesukristoki, ta ni lie niso katar e llene kai inai judiura.

⁸ Goleke amen morabi te ava lenchar pachivale, te sai phenen saurrenge e lachi viasta.

O Diotrefes ta o Demetrio

⁹ Me pisisardem iek lil e khanllirake, a o Diotrefes kai drago leke te gazdaril, ni kamel te thovel mange sama.

¹⁰ Goleke kana ka llau tumende me ka dav pe lete, soke phenel alava kojamne amendar. Ta na samo gua, inai pachivalo e phlalenchar kai aven duratar, ta ogola kai mangen te aven pachivale lenchar, vou ni mukel len ta trade len katar e khanlliri.

¹¹ Phlala Gaio, na cher sargo gola kai cheren o bilachipe, cher o lachipe. Soke gola kai cheren o lachipe si e Devleke, a gola kai cheren o bilachipe ni pinllaren e Devle.

¹² A katar o Demetrio sa den orba lachi. Ta i o chachipe del orba sukar letar, ta i amen da orbe lache letar, ta tu llane kai so phena amen si o chachipe.

Salami

¹³ Man sea but ezgode te phenav chuke, ta ni kamam te pisiv len chuke,

¹⁴ soke mangav te llav tute oma te dav tuia orba.

¹⁵ E pas te avel tuia. E amale bichalen chuke salami. Bichal i tu salami suakone amaleke.