2 Samuel 8 - Biblia ande chib Romani

O maripe katar o David

¹ Mapalal katar gala ezgode o David dobisarda e filisteonen ta lia lendar o foro Meteg Ama.

² Ta i dobisarda e moabitonen, ta cherda len te inzon pe phuv ta llinda len e solenchar. Gola kai resle ande dui sole mundarde len, a gola kai resle ande iek solo mukle len llunde. Ta e moabitura sea sluge e Davideke ta pochinena love.

³ Ta i e Adad Ezere chavo e Rejoveko kai saia o charo katar e Soba, o David dobisarda le kana o Adad Ezer llelo po pai katar o Eufrates te lel pale pi phuv.

⁴ Ta o David lia lendar milia ta efta stotine llenen kai llana pe gra, ta bis milie llenen kai llana peske. Ikanda katar e bordona sa e grasten, a mukla peke but gra te resen te chirden stotina bordona.

⁵ Ta avile e siriura katar o Damasko te pomozin e charo katar o foro Soba, o Adad Ezer. A o David mundarda bis ta dui milie sirionen.

⁶ Ta o David thoda boñikonen ando Damasko, ta e siriura sea sluge e Davideke ta pochinena love. Ta o Del cherda te dobil o David kaigo llala.

⁷ Mapalal o David lia e eskudura sunakune kai inllarena e boñikura katar o Adad Ezer, ta inllarda len ando Jerusalem.

⁸ Ta i katar e forura Beta ta Berotai kai sea forura katar o Adad Ezer, o David lia but ezgode tuchne.

⁹ Ondaka kana o Toi, kai saia o charo katar o Jamat, llangla kai o David dobisarda e boñikonen katar o Adad Ezer,

¹⁰ bichalda e Jorame kai saia leko chavo te blagosil e Davide ta te del le salami, soke o Toi saia dusmano katar o Adad Ezer. Ta o Joram inllarela pea ezgode rupune, sunakune ta tuchne

¹¹ kai o David dia len e Devleke, ta i dia e Devle o sunakai ta o rup kai saia katar e phuvia kai vou dobisarda len,

¹² katar e siriura, katar e moabitura, katar e filisteura, katar e amalekitura, ta katar o Adad Ezer chavo e Rejoveko, o charo katar e Soba.

¹³ Gia o David cherdilo but pinllardo. Kana irilape katar o maripe e sirionenchar, dobisarda desojto milie edomitonen ande bari Umal katar o Lon.

¹⁴ Ta o David thoda boñikonen pe sa e phuv katar o Edom. Ta e edomitura sea sluge e Davideke. Ta o Del cherda te dobil o David kaigo llala.

E mai glamne boñikura katar o David

¹⁵ Ta o David charoisarda ande sa o Israel ta krisila pe foro lachimaia ta chachimaia.

¹⁶ O Joab chavo e Seruiaeko, gazdarila pe boñikonen, ta o Josafat chavo e Ajiludeko saia o kovachi.

¹⁷ O Sadok chavo e Ajitobeko ta o Ajimelek chavo e Abiatareko sea popura, a o Seraias saia o pismiri.

¹⁸ Ta o Benaias chavo e Joiadaeko gazdarila pe kereteura ta e peleteura, a e chave e Davideke sea popura.