2 Samuel 7 - Biblia ande chib Romani

O Del phenel kai ka blagosil e Davide

¹ Kana o charo zivila ande po cher, ta o Del diaia le pas pe dusmanonenchar kai sea truial katar e phuv,

² o charo phenda e Nataneke o profeta: Dik akana, me ziviv ando cher cherdo katar o sedro ta e arka katar o Del si thodi maskar e chitura.

³ Ta o Natan phenda e charoke: Lla, ta cher so si ande cho lio soke o Del si tuia.

⁴ Isto goia riat o Del dia orba e Natanea, ta phenda leke:

⁵ Lla ta phen me slugake o David, kai me o Del phenav gia: ¿Tu ka vazde mange iek cher?

⁶ Me ni zivisardem ande iek cher sar kana ikandem katar o Ejipto e chaven katar o Israel, llik akana samo zivisardem ande chare.

⁷ Ta ande sa o vreme kai llelem e chavenchar katar Israel, ¿phendem fisavi drom te vazde mange iek cher cherdo katar o sedro?

⁸ Akana, gia ka phene me slugake o David: Me ikandem tut katar e stoka e bakrengi te na ave ios chobano, ta thodem tut te ave gazda pe mo foro Israel.

⁹ Sema tuia kaigo llelan, zatrisardem che dusmanonen, ta diem tut iek baro anav, sargo e anava kai si len e mai preche llene katar e phuv.

¹⁰ Ta i lachardem iek phuv me foroke te sai zivin kote te na chuden len nikada ios, te na patin len e bilache sar cherena le omanglal

¹¹ sar kana gazdarina e krisaria pe mo foro Israel. Me ka bradui tut katar che dusmanura, ta ka sikavav chuke kai ka dav tut but chave.

¹² Ta kana ka avel o son katar che llivesa ta ka mere, me ka vazdav mapalal tutar iekhe maskar che chave, ta ka thovav le charo katar e charoina.

¹³ Vou ka vazdel mange cher me Anaveke, ta me ka cherav te avel leko trono ostade.

¹⁴ Me ka avav leke sargo dad, a vou ka avel mange sargo chavo. Te cherela o bilachipe, me ka pativ le ta ka dav pe lete e bichoia, sar cheren le e dada pe chaurrenchar,

¹⁵ a ni ka mukav le sar muklem e Saule kai ikandem le te thovav tut pe leko than.

¹⁶ Ta e charoina katar che chave ka achen ostade angla tu ta leko trono ka achel ostade.

¹⁷ O Natan phenda e Davideke sa gala ezgode, isto gia sar dikhla le ta asunda le.

¹⁸ Ondaka o charo o David dia andre ta thodape angla o Del, ta phenda: Devla, ¿ko sem me, a so si murni familia kai andan man llik kate?

¹⁹ Ta na samo gua Devla, soke i diam orba katar so ka avelpe me porodoke. ¡Niko ni cherel so tu chere Devla!

²⁰ ¿So ios sai phenav chuke Devla kana tu pinllare man?

²¹ Sa gala ezgode cherdan sar phendan le ta manglan le, ta ande cho lio manglan te llanav len.

²² Goleke, ¡gia baro san Devla! Niko inai sargo tu ta inai aver Del. Samo tu san o Del, gia sar asundam le.

²³ ¿Ta savo foro si sargo cho foro o Israel maskar sa e phuvia? Soke o Del llelo te braduil le, te thovel leke iek anav, te cherel leke ezgode bare ta ezgode darane, soke voli che foro kai ikandan le katar o Ejipto, katar e phuvia ta lenge dela.

²⁴ Soke tu phendan kai cho foro o Israel ka avel chiro ostade, a tu Devla san lengo Del.

²⁵ Akana Devla, cher sa so phendan che slugake ta leke porodoke, isto gia sar phendan le.

²⁶ Te avel cho anav blagosime ostade. Te phenen kai o Del si o Del e Israeleko kai si le sa e zor. Te aven ostade angla tu e chave e Davideke.

²⁷ Soke tu Devla, o Del e Israeleko ka si tut sa e zor, cherdan te llanav kai ka de man porodo baro. Goleke ta soke llanav kai sem cho sluga, sem tromano te moliv man chuke.

²⁸ Akana Devla, tu san o Del ta cho alav si chachipe, ta jalan sovel kai ka chere che slugake gava baro lachipe.

²⁹ Blagosisar man Devla, te avav ostade angla tu. Tu Devla jalan sovel, ta cho blagosipe ka avel pe cho sluga ostade.