2 Samuel 6 - Biblia ande chib Romani

O David mangel te anel e arka e Devleki

¹ O David pale chidia e mai lache boñikonen katar o Israel kai sea tranda milie.

² Ta o David llelotar katar o Baala kai si ando Juda, ta lea llelo sa o foro te anen kotar e arka e Devleki kai angla la blagosin o anav e Devleko kai si le sa e zor, ta kai si maskar e kerubinura.

³ Ta thode e arka e Devleki pe iek bordon nevo, ta ande la katar o cher e Abinadabeko kai saia pe burdura. Ta e chaurre katar o Abinadab o Uza ta o Ajio, inllarena o bordon nevo.

⁴ Ta ande e arka e Devleki katar o cher e Aminadabeko kai saia pe burdura, ta o Ajio llala angla e arka.

⁵ Ta o David ta sa o foro katar o Israel chelena chelipe e Devleko angla o Del ta llilabena ande arpe, salteriura, panderura, firura ta simbalura.

⁶ Kana avile ando Nakon kai saia iek than kai chistosarena o lliu, o Uza istarda e arka e Devleki te na perel, soke e guruva eskonbana.

⁷ Ta o Del jolailo po Uza ta lia leko zivoto isto kote, soke istarda e arka e Devleki.

⁸ Ta o David jolailo but soke o Del lia katar o Uza leko zivoto, goleke o David ikharda gua than Perez Uza ta gia ikharen le llik akana.

⁹ A o David darailo but katar o Del, ta phenda: ¡Sar ka inllarav kai mo cher e arka e Devleki!

¹⁰ Goleke o David ni kamla te anel kai po cher e arka e Devleki, ta inllarda la kai o cher katar o Obed Edom kai saia katar o Gat.

¹¹ E arka e Devleki achili trin chon ando cher katar o Obed Edom. Ta o Del blagosisarda e Obede Edome ta sa leke familia.

O David anel e arka e Devleki ando Jerusalem

¹² Kana phende e charoke o David kai o Del blagosisarda e porodo katar o Obed Edom ta sa leko cher, o David llelo veselimaia kai o Obed Edom ta anda e arka e Devleki ando foro e Davideko.

¹³ Ta kana e llene kai inllarena e arka e Devleki phirde sov korakura, o David dia kurbano iek guruv ta iek bakro singenchar thulo.

¹⁴ O David cherela iek chelipe Devlikano but zurale angla o Del, ta o David saia furiado ando efod cherdo katar o lino.

¹⁵ Gia o David ta sa e llene katar o Israel inllarena e arka e Devleki ta urkina veselimatar ta basena e tuturuge.

¹⁶ Kana e arka e Devleki avili kai o foro e Davideko, e Mikal chorri e Sauleki dikhla katar iek penllerava sar o charo jutela ta cherela iek chelipe Devlikano angla o Del, ta marda letar espurnia ande po lio.

¹⁷ Ondaka thode e arka e Devleki ande iek chara kai o David vazdia lake. Ta o David dia e Devle kurbanura phabarde ta ofrende pala e pas.

¹⁸ Ta kana o David getosarda te del e kurbanura phabarde ta ofrende pala e pas, blagosisarda e foro ando anav katar o Del kai si le sa e zor.

¹⁹ Ta o David fulada sa e foroke, sa e llenenge katar o Israel, murusenge ta diskinienge, suakoneke iek marrno, kotor mas ta iek marrno cherdo katar e drak. Ta mapalal sa o foro llelotar kai po cher.

²⁰ O David irisailo te blagosil po cher. Ta kana e Mikal likisti te maladol e Davidea, phenda leke: ¡Gia sukar dikhola allive o charo katar o Israel, kana sikadola angla leke sluge sargo iek lleno kai inai leke lallao!

²¹ Ondaka o David phenda e Mikalake: Cherdem le angla o Del kai esvirisarda man angla cho dad ta angla sa leko porodo te avav gazda e Israeleko, o foro katar o Del. Goleke ka cherav chelipe Devlikano angla o Del.

²² Ta ios mai gore ka avav angla che akha, a me sluge kai tu de lengi orba, von ka den man liubao.

²³ Ta e Mikal chorri e Sauleki, nikada ni maladila la minone.