2 Samuel 24 - Biblia ande chib Romani

O David llinel e foro

¹ O Del pale jolailo po Israel ta cherda e Davide te llinel e llenen katar o Israel ta katar o Juda.

² Ondaka o charo phenda e Joabeke kai saia o gazda katar e boñikura: Lla kai sa e viche katar o Israel, katar o Dan llik kai o Berseba, ta llin e foro te llanav gachin llene si.

³ A o Joab phenda e charoke: Te del o Del e charo stotina droma mai but llene e foroke neko so si akana, ta tu mo glamno charo te dikhe sar bariol o foro. A ¿pala so mange te lline e foro?

⁴ A so phenela o charo saia mai zuralo neko o alav e Joabeko ta e gazdengo katar e boñikura. Goleke likisto o Joab ta e gazda e boñikonenge angla o charo te sai llinen e foro katar o Israel.

⁵ Nakhle o Jordan ta logle ando Aroer, ando sur katar o foro kai si ande bari umal kai ikharen le Gad, ta i pasa o Jazer.

⁶ Mapalal llele ando Galaad ta ande phuv katar e ititura. Avile ando Dan, ta katar o Dan llele pasa o Sidon.

⁷ Mapalal llele ando cher lachardo e marimake kai si ando Tiro ta llele ande sa e forura katar e jivitura ta e kananeura, ta ando Negev katar o Juda ta Berseba.

⁸ Gia llele pe sa e phuv, ta kana nakhle inia chon ta bis llive irisaile ando Jerusalem.

⁹ Ta o Joab phenda e charoke gachin llene sea ande sa e phuv. Ando Israel sea ojto stotine milie murusa kai sai llana po maripe, ta ando Juda panch stotine milie murusa.

¹⁰ Mapalal kana o David llinda e foro tristosailo ande po lio ta phenda e Devleke: Devla, cherdem baro bilachipe angla tu. Me mangav tutar Devla te prosti man so cherdem, soke cherdem iek baro dilipe.

¹¹ Thiarinako kana o David ustilo, avilo o alav e Devleko kai o profeta o Gad kai profetisila e Davideke, ta phenda:

¹² Lla ta phen e Davideke kai trin ezgode si man te dav le. Te phenel savi maskar e trin mangel, ta me ka cherav le.

¹³ Ondaka avilo o Gad kai o David ta phenda leke e orbe e Devleke: ¿Mange te aven efta burs e bok ande chi phuv? ¿O te nase trin chon katar che dusmanura, ta von te roden tut? ¿O te avel iek bari muka ande chi phuv trin llivesa? Mislisao ta phen mange, soke ka phenav so esvirisardan goleke kai bichalda man.

¹⁴ Ta o David phenda e Gadeke: Sem but dukhado. Mai sukar si te pera ande Devleke va soke vou si but lacho, neko te pera ande va e manusenge.

¹⁵ Ondaka o Del cherda te avel iek bari muka ando Israel katar e thiarin llik kana phenda o Del. Mule eftavardes milie llene, katar o foro Dan llik ando Berseba.

¹⁶ Ta kana o suecho inzarda po va te zatril o Jerusalem, avila zalba e Devleke ta phenda e suechoke kai zatrila e foro: ¡Dosta akana, achi! Ta o suecho e Devleko saia po than kai moren o lliu kai saia katar o Arauna o jebuseo.

¹⁷ Ta o David phenda e Devleke kana o suecho zatrila e foro: ¡Me sem o gua kai cherda o bilachipe! ¿A so cherde gala llene kai inai dosale? ¡Te perel e duk pe ma ta pe mi familia!

O David vazdel iek altar

¹⁸ Gua llive avilo o Gad kai o David ta phenda leke te vazdel iek altar e Devleke ande umal katar o Arauna o jebuseo.

¹⁹ Ta o David llelo sar phenda le o Gad prema o alav e Devleko,

²⁰ ta o Arauna dikhla kai avela lete o charo pe slugenchar, ta likisto ta dia changa angla le lligo ni dodisarda leko chikat pe phuv,

²¹ ta phenda leke: ¿Soke ave mo glamno gazda kai cho sluga? Ta o David phenda leke: Me avav te chinav tutar chi phuv te sai vazdav iek altar e Devleke, te sai lelpe e bari muka katar o foro.

²² Ta o Arauna phenda e Davideke: Mo glamno charo, le sogo mangea ta de o kurbano e Devleke. Kate si guruva te de kurbano phabardo, char suki kai achel kana ikanen e simicha, ta kasta kai thodol pe guruvengi kor te sai cheren e iag.

²³ Sa gala ezgode dav len e charoke, ta i o Arauna phenda: ¡O Del te blagosil tut!

²⁴ Ta o charo phenda e Arauneke: Iok, me ka chinav len. Ni ka dav kurbano e Devleke kai die le mange llabe. Ondaka o David chinda e guruva ta pochinda len pinda tolaria rupune.

²⁵ Ta o David vazdia kote iek altar e Devleke, ta dia kurbanura phabarde ta ezgode dine te sai prostil o Del. Ta o Del asunda o molipe pala e phuv, ta e muka achili ando Israel.