2 Samuel 22 - Biblia ande chib Romani

Llili e Davideki

¹ Kana o Del braduisarda e Davide katar leke dusmanura ta katar o Saul, o David llilabia gaia llili e Devleke.

² Ta phenda gia: Devla, tu san mi zor, ta mo braduimari.

³ Tu san mo Del, tu san o barr kai arakhel man, mo eskudo. Tu san o than kai sai gurudivav, tu san o than vazdino kai arakhel man, mo braduimari. Braduisardan man katar me dusmanura.

⁴ Tu Devla, te ave blagosime. Kana ikharav tut, tu bradui man katar me dusmanura.

⁵ Ulina man e valura e merimake, darailem katar e bari len e merimaki kai inllarela man.

⁶ O meripe ulila man pe solenchar, sema istardo ande sole e merimake.

⁷ Ande nuzda ikhardem e Devle, manglem katar mo Del te pomozil man, ta vou katar po cher asunda man, mo urkipe reslo kai leke kan.

⁸ Ondaka dermosaili e phuv, e burdura izdraie chak telal, e joli e Devleki chinosarda len.

⁹ Katar leko nak likela thuv, katar po mui chudela iag kai zatrila sa, ta cherda te phabon e angara.

¹⁰ Fulada o miloso po dopas ta fulisto. Telal katar leke porrne sea bare oblakura kale.

¹¹ Likisto pe iek kerubin ta furiao ta llala upral pe pakha e balaviake.

¹² Ta gurudilo ando truniariko maskar e oblakura kai sea pherde pai kai ucharena le sa.

¹³ Iag kai klichil likela letar, ta likiste krupe ta angara phabarde.

¹⁴ O Del o Baro, cherda te asundol katar o miloso o germipe katar leko avazi.

¹⁵ Chudia llide ta cherda te nasen leke dusmanura, Chudia esterliche ta zatrisarda len.

¹⁶ Dikhili e phuv kai si ande mora e phuv achili puchardi, pala o avazi e Devleko kai daravel, ta pala e bari balav kai phurdia vou.

¹⁷ O Del inzarda mange po va chak upral, pe vastea ikanda man katar e mora e bari.

¹⁸ Braduisarda man katar e dusmanura e zurale, kai murzina pe mande ta sea mai zurale neko me.

¹⁹ Die pe mande kana sema ande nuzda, a o Del pomozisarda man.

²⁰ Ikanda man ando mukliardipe, braduisarda man soke volil man.

²¹ O Del dia man mo chari, soke sema chacho, soke me llelem orta po drom e Devleko.

²² Me kandav sa leke zakonura, nikada ni muklem pe iek rig leke zakonura.

²³ Angla ma si sa leke zakonura ta nikada ni durilem lendar.

²⁴ Nikada ni cherdem angla le ni iek bilachipe, durilem katar o bilachipe.

²⁵ O Del dia man mo chari, soke ni cherav o bilachipe angla le.

²⁶ Tu Devla san lacho golea kai si lacho, ta san orta golea kai si orta.

²⁷ San chacho golea kai si chacho, ta bizai golea kai si llanglo.

²⁸ Tu bradui e llenen kai inai barikane, a muke ando lallao golen kai istardon.

²⁹ Tu Devla de man villelo. Mo Del kai san o villelo ande mo truniariko.

³⁰ Tu ka pomozi man te dobiv me dusmanonen, ta te nakhav upral pe lenge zidura.

³¹ E Devleko drom si chacho uzdi amen ande sovlia kai jala o Del. O Del si o eskudo sa golenge kai si len vera ande lete.

³² Samo tu san o Del, ¿Savi aver pechina si amen?

³³ O Del si kai del man zor ta ortol mo drom.

³⁴ Vou cherel man lokho sargo iek bakrorro, ta kana sem upre ni mukel man te perav.

³⁵ Vou sikavel man sar te marav man, del man zor te bangarav e arkura tuchne me vastenchar.

³⁶ Tu dian man o eskudo katar cho braduipe, cho volipe cherda man te avav baro.

³⁷ Cherdan te avel lokho mo drom ta te na eskonban me porrne.

³⁸ Llelem pala me dusmanura ta reslem len, ta ni irisailem lligo ni zatrisardem len.

³⁹ Sa phaglem len. Ni ka usten ios, peletar tala me porrne.

⁴⁰ Tu dian man zor kana marava man, cherdan te den changa angla ma me dusmanura.

⁴¹ Cherdan te nasen angla ma me dusmanura, ta gia sai zatrisardem golen kai murzina pe ma.

⁴² Mangena te pomozil len vareko, a niko ni pomozisarda len. Ikharena e Devle ta ni dia lenge anglal.

⁴³ Drobou len sargo o prajo kai inllarel e balav, ustadem len sargo o glibo kai si po drom.

⁴⁴ Kurtulisardan man katar iek foro kai ni kandela. Cherdan man gazda katar e phuvia, cherdan te radin mange llene kai ni pinllarava.

⁴⁵ Samo asunen mo avazi, kanden man. E llene katar aver phuvia blagosin man.

⁴⁶ E llene katar aver phuvia daran, izdran ta liken kotar katar sea gurudine.

⁴⁷ ¡Blagosime te avel o Del! ¡Blagosime te avel gua kai arakhel man! ¡Blagosime te avel o Del kai braduil man!

⁴⁸ Tu kurtuli man katar me dusmanura ta thove e phuvien tala me porrne.

⁴⁹ Vou kurtulil man katar me dusmanura, ta thovel man upral pe llene kai vazdiniaon pe ma. Tu Devla bradui man katar e llene silne.

⁵⁰ Goleke blagosiv tut maskar e phuvia ta llilabav llilia chuke.

⁵¹ Chere te dobil but droma o charo kai esvirisardan. Suako drom sikave kai voli e Davide ta leke porodo.