2 Samuel 21 - Biblia ande chib Romani

E joli katar e gabaonitura

¹ Ande llivesa katar o David saia bok. Ta o David puchla e Devle soke saia e bok trin burs. Ta o Del phenda leke: Cheres o Saul ta leki familia kai mundarde e gabaonitonen.

² E gabaonitura ni sea katar o foro e Israeleko, von sea katar e amorreura kai e israelitura jalea lenge sovel, a o Saul mangla te mundarel len pala e chave katar o Israel ta o Juda.

³ Ondaka o David ikharda e gabaonitonen ta puchla len: ¿So sai cherav pala tumende? ¿Sar ka lelpe tumendar e joli te sai blagosin e foro Devleko?

⁴ A e gabaonitura phende leke: Inai pala e love kai amen sam joliarike po Saul ta pe leki familia, ta ni manga te merel niko ando Israel. Ta o David phenda lenge: Phenen mange so mangen te cherav pala tumende.

⁵ Ta von phende e charoke: Katar o lleno kai mangla te zatril amen ta te na achel niso amendar ande phuv katar o Israel,

⁶ de amen efta murusa katar leke chave te umblava len angla o Del ando Gabaa katar o Saul, o esvirime e Devletar. Ta o charo phenda lenge. Ka dav len tumenge.

⁷ Ta o charo prostisarda e Mefi Bosete, o chavo e Jonataneko, unuko e Sauleko, pala e sovel kai jala vou ta o Jonatan.

⁸ A o charo lia duie chaven katar e Rizpa e chorri e Ajaeki kai avila la e Saulea, von ikhardona Armoni ta Mefi Boset. Ta lia panch chaven katar e Mikal chorri e Sauleki, kai avila la e Adrielea chavo katar o Barzilai mejolita,

⁹ ta dia len ande va katar e gabaonitura, ta e gabaonitura umblade len po burdo angla o Del. Gia mule gala efta ande purve llivesa kana chiden e sebada.

¹⁰ Ondaka e Rizpa lia chito zalosno ta inzarda le peke upral pe iek pechina. Sar kana chidena e simiche llik kana diapeke, ni mukla te aven chiriklia pe mule ollivesea, ta ni orachaia te aven zivirinie.

¹¹ Ta phende e Davideke so cherela e Rizpa, e chorri e Ajaki, e konkubina e Sauleki.

¹² Ondaka o David llelo ta lia e kokala katar o Saul ta o Jonatan kai sea ando Jabes katar o Galaad. E llene katar o Jabes chorde e esnaga katar o Saul ta katar o Jonatan ando Bet San kai saia o foro kai e filisteura mundardea len kana dobisarde e Saule ando Gilboa,

¹³ ta cherda te anen kotar e kokala katar o Saul ta o Jonatan ta thoda len pasa e kokala katar e llene kai mulea umblade.

¹⁴ Ta prajosarde e kokala katar o Saul ta o Jonatan ande phuv katar o Benjamin ando Zela, ande pe dadeko limori kai si ando Kis. Sa cherde le sar phendaia le o charo. Mapalal o Del asunda e foro, ta cherda lenge o lachipe.

O Abisai braduil o zivoto katar o David

¹⁵ Pale e filisteura mardepe e Israelea, ta o David likisto pe slugenchar te marelpe e filisteonenchar, a o David chinilo.

¹⁶ Ta o Isbi Benob, iek katar e llene kai sea but bare manusa kai leki lansa phariavela tranda kile ta inllarela iek jarni nevo, mangla te mundarel e Davide.

¹⁷ A o Abisai chavo katar o Seruia llelo te pomozil e Davide, ranisarda e filisteo ta mundarda le. Ondaka e boñikura katar o David jale sovel kai nikada ios o David ni ka likel lenchar po maripe, te na mundardol e lampara katar o Israel.

O maripe e llenenchar kai sea but bare

¹⁸ Pale saia aver maripe e filisteonenchar ande Gob. Ondaka o Sibekai jusatita mundarda e Safe kai saia katar e llene but bare.

¹⁹ Ta ande aver maripe e filisteonenchar ando Gob, o Eljanan chavo e Jareko Oregineko katar o Belen, mundarda e Goliate katar o Gat, kai leko jarni saia sargo kas kai ulin pe lete o chiti.

²⁰ Ando Gat saia aver maripe, kote saia iek manus kai sea le desudui naia pe va, ta desudui naia pe porrne, bis ta star sea sa leke naia. I vou saia chavo katar e llene kai sea but bare manusa.

²¹ Vou ikharda e Israele te marelpe lea, ta mundarda le o Jonatan chavo katar o Simea, phlal e Davideko.

²² Gala star murusa sea katar e vicha katar e but bare manusa ando Gat, ta mundarde len o David ta leke sluge.