2 Samuel 20 - Biblia ande chib Romani

O Seba vazdiniaol po David

¹ Saia iek lleno bilacho katar e vicha e Benjamineki kai ikhardola Seba chavo katar o Bikri, kai basalda e tuturuga, ta phenda: ¡Inai amen niso e Davidea ta o chavo e Isaieko ni ka del amen phuv. Suako lleno te llaltar kai pi chara!

² Ta sa e llene katar o Israel mukle e Davide ta lleletar pala o Seba o chavo katar o Bikri. A e llene katar o Juda llele pala lengo charo, llele katar o Jordan llik o Jerusalem.

³ Ta kana o David avilo kai po cher ando Jerusalem, lia e des konkubine kai muklaia te arakhen o cher ta phangla len ande iek cher. Kote o charo dia len te jan ta arakhla len, ta nikada ios ni sovto lenchar. Gia e konkubine achile phangle ande gua cher, ta zivisarde sargo phivlia llik kana mule.

⁴ Mapalal o charo phenda e Amasaeke: Ikhar e murusen katar o Juda, ta aide karinga lenchar ande trin llive.

⁵ Ta o Amasa llelo te ikharel e llenen katar o Juda, a ni avilo ando vreme kai saia te avel.

⁶ Ta o David phenda e Abisaieke: O Seba ka cherel amenge mai but bilachipe neko so cherda amenge o Absalon. Le e slugen katar cho gazda, ta rode le mai anglal te malavel iek foro kai truial si le zidura ta ka gurudol kote.

⁷ Ondaka likiste te roden le e boñikura katar o Joab, ta i llele lenchar e kereteura, e peleteura ta sa e murusa mai tromane, ta likiste katar o Jerusalem te roden e Seba chavo katar o Bikri.

⁸ Ta kana avile pasa e pechina bari kai si ando Gabaon, likisto o Amasa te maladol lenchar. Ta o Joab saia furiado ande patave marimake, ta pe po kavisi inllarela iek churi kai pelitar kana llala.

⁹ Ondaka o Joab phenda e Amasaeke: ¿Sar san phlala? Ta e vastea o chacho istarda e Amase katar leke chor te chumidel le.

¹⁰ Ta o Amasa ni dikhla e churi kai saia ando va e Joabeko. Ta o Joab ranisarda e Amase ando panchto pasuaro ta sa leke porra rispisaile pe phuv. Mulo bi te del le e churiaia pale. Mapalal o Joab ta leko phlal o Abisai rodie e Seba chavo katar o Bikri.

¹¹ Ta iek katar e boñikura e Joabeke thodape pasa o Amasa, ta phenda: ¡Ko ka llal pe rig e Joabeki ta e Davideki, te llal e Joabea!

¹² A o Amasa taulilape po drom ande po rat. Ta suako lleno kai nakhela po drom achela te dikhel le. Gua boñiko kana dikhla kai sa achena te dikhen e Amasa chudino ande po rat, thoda le pe iek rig e dromeki ta ucharda le e patavenchar.

¹³ Ta kana thode e Amasa pe iek rig e dromeki, sa e boñikura kai llana e Joabea rodie e Seba chavo katar o Bikri.

¹⁴ O Seba nakhlo pe sa e viche katar o Israel llik kai o Abel Betmaka, ta sa e llene katar o Barim chidinaile ta llele lea.

¹⁵ Ta kana o Joab ta leke boñikura avile ando Abel Betmaka, thodepe truial katar o foro ta vazdie iek phurd te sai den pe foro, ta mangena te peraven o zido.

¹⁶ Ondaka iek diskinia bizai urkisarda ando foro, ta phenela: ¡Asunen man! ¡Asunen man! ¡Phenen e Joebeke te avel karinga soke me mangav te dav orba lea!

¹⁷ Kana o Joab avilo late, voi puchla le: ¿Tu san o Joab? Vou phenda: Ea, me sem. Ta voi phenda: Asun e alava katar gaia sluga chiri. Ta o Joab phenda: Asunav.

¹⁸ Ta voi phenda: Omanglal phenena gia: O lleno kai mangel te llanel vareso, te puchel e llene katar o foro Abel.

¹⁹ Inai mange drago o maripe, ta me sem iek diskinia chachi ando Israel, a tu mange te zatri iekhe bare foro katar o Israel. ¿Soke mange te zatri e phuv kai del amen o Del?

²⁰ O Joab phenda lake: ¡Te na del o Del te zatriv e foro, te mukav le zatrime!

²¹ Inai gia, soke iek lleno katar o burdo o Efraim kai ikhardol Seba, vazdinailo te marelpe e Davidea. An le mande ta me ka llautar katar o foro. Ta e diskinia phenda e Joabeke: Amen ka chuda leko soro katar o zido e foroko.

²² Ondaka e diskinia dia orba bizaimaia e llenenchar katar o foro. Ta von chinde o soro katar o Seba, ta chudie le e Joabeke. Mapalal o Joab basalda e sing, ta vou ta leke boñikura lleletar katar o foro, suako iek kai pi chara. Ta o Joab irisailo kai o charo ando Jerusalem.

E mai preche boñikura katar o David

²³ O Joab sai o mai baro boñiko ando Israel, ta o Benaias o chavo katar o Joiada, sai o mai baro boñiko katar e kereteura ta e peleteura,

²⁴ ta o Adoram arakhela e love e phuviake, a o Josafat chavo katar o Ajilud arakhela e lila.

²⁵ O Seva saia o pismiri, o Sadok ta o Abiatar sea e popura.

²⁶ O Ira katar o Jair, i vou saia popo katar o David.