2 Samuel 19 - Biblia ande chib Romani

¹ Ta phende e Joabeke kai o charo rovela pala o meripe katar o Absalon.

² Ta e veselia katar gua llive cherdilo tristome, soke asunde kai o charo saia but dukhado pala leko chavo.

³ Gua llive e boñikura die ando foro lallane, sargo kana dobin len po maripe.

⁴ A o charo uchardo, bare avazea urkila: ¡Mo chavo, Absalon, Absalon, mo chavo, mo chavo!

⁵ Ondaka o Joab avilo kai o cher e charoko, ta phenda leke: Tu cherdan te jan lallao che sluge, kai allive braduisarde che zivoto, ta e zivoto katar che chave, katar che diskinie, ta katar che konkubine,

⁶ soke voli golen kai murzin pe tu, ta murzi golen kai volin tut. Allive cherdan te achardol kai ni chitilpe chuke che mai preche gazda ta che sluge. Akana llanav kai te zivila o Absalon, i te avava sa amen mule avea veselo.

⁷ Akana, uste ta lla avri ta de orba lachimaia che slugenchar, soke jav sovel ando anav e Devleko kai te na like, gaia riat niko ni ka achel tuia. Gua ka avel e ezgoda mai bilachi kai avili pe tu sar kana sana terno llik akana.

⁸ Ondaka o charo ustilo ta beslo po udar, ta phende e foroke: O charo si besindo po udar. Ta sa o foro avilo lete, a o Israel nasloa suako lleno kai pi chara.

O David irilpe ando Jerusalem

⁹ Ta o foro diepe orba maskar pete ta phenena: O charo braduisarda amen katar amare dusmanura ta katar e filisteura, ta akana vou nasel katar o Absalon.

¹⁰ A o Absalon, ka i thodam te charoil pe amende, mulo ando maripe. ¿Soke ni cheren niso te irilpe o charo?

¹¹ Ta o charo David bichalda e poponen o Sadok ta o Abiatar, ta phenda lenge: Puchen e phuren katar o Juda, soke tumen sen lene ta ni cheren niso te iriv man kai mo cher.

¹² Tumen sen me phlal, ¿soke ka aven e mai palune te cheren te irilpe o charo?

¹³ Ta i ka phenen e Amasaeke: Tu san katar murni familia, goleke ka ave o gazda katar me boñikura, po than katar o Joab. A te na cherav le, te dukhavel man o Del.

¹⁴ Gia o lio e manusengo katar o Juda cherdilo sargo iek lleno, ta bichalde te phenen e charoke: Irisao che slugenchar.

¹⁵ Ondaka o charo irisailo, ta avilo kai o Jordan. Ta foro katar o Juda avilo ando Gilgal te lel e charo ta te pomozil le te nakhel o pai katar o Jordan.

¹⁶ Ta o Simei chavo katar o Gera, chavo katar o Benjamin, kai saia katar o Bajurin, sigarda te llal e llenenchar katar o Juda te lel e charo David.

¹⁷ Lea avena milia llene katar o Benjamin ta i o Siba, o sluga katar o Saul ta leke desupanch chave ta bis sluge, sa nakhle o pai katar o Jordan angla o charo.

¹⁸ Ta nakhle o pai katar o Jordan te pomozin e familia e charoki te nakhen, ta te cheren e volia e charoki. Ondaka kana o charo nakhlo o pai, o Simei chavo katar o Gera dia changenchar angla le,

¹⁹ ta phenda leke: Na dosare man pala o bilachipe kai cherdem ta na de tut golli so cherdem kana tu, mo glamno charo, likistan katar o Jerusalem. Na achi joliariko manchar.

²⁰ Soke me, cho sluga llanav kai cherdem o bilachipe angla tu, ta allive katar e vicha e Joseeki me sem o purvo kai avilo te lav me gazda o charo.

²¹ Ondaka o Abisai chavo katar o Seruia, phenda: ¿Ni ka merel o Simei soke kusla e esvirime e Devletar?

²² A o David phenda: ¡Gaia ezgoda inai tumari, chave e Seruiake! ¿Soke ka aven me dusmanura allive? ¿Allive ka merel fiko ando Israel? ¿Ni llanav kai akana me sem o charo katar o Israel?

²³ Ta o charo phenda e Simeieke: Ni ka mere. Ta o charo jala leke sovel kai ni ka merel.

²⁴ Ta i o Mefi Boset chavo e Sauleko avilo te lel e charo. Sar kana llelotar o charo lligo kana irisailo ni jalada pe porrne, ni ranglape ta ni jalada pe patave.

²⁵ Ta kana avilo ando Jerusalem te lel e charo, o charo phenda leke: Mefi Boset, ¿soke ni ave manchar?

²⁶ Ta o Mefi Boset phenda leke: Mo glamno gazda, mo sluga kojada man, soke me phendem leke te lacharel man iek magarcho te llav pe lete kai mo charo, soke me sem mango.

²⁷ A vou phenda mandar angla mo gazda o glamno charo, ezgode kojamne. A mo gazda o charo si sargo iek suecho e Devleko. Cher sogo kamea.

²⁸ Soke sa e familia katar mo dad saia te merel angla mo charo, a tu thoda man te besav pe chi sinia. ¿So ios sai te mangav katar mo glamno charo?

²⁹ Ta o charo phenda leke: Na phen niso ios. Me diem o alav te fulaven e phuv tu ta o Siba.

³⁰ A o Mefi Boset phenda: Te achel leke sa e phuv. So chitilpe si kai o charo irisailo esmiro kai po cher.

³¹ Ta o Barzilai katar o Galaad, avilo katar o Rogelim te pomozil e charo te nakhel o Jordan.

³² O Barzilai saia but phuro, sea leke ojtovardes burs ta kana o charo saia ando Majanaim, o Barzilai dia e charoke sa so trubulale, soke saia but barvalo.

³³ Ta o charo phenda e Barzilaieke: Aide manchar ando Jerusalem, kote me ka arakhav tut.

³⁴ A o Barzilai phenda e charoke: Ni achen mange but bursa te ziviv te sai llav e charoia ando Jerusalem.

³⁵ Si mange ojtovardes burs, ni acharav dal si sukar o inai sukar so jav ta so piav, ta ni asunav e avazura katar e llene kana llilaben. ¿Soke ka avav me charoke iek pharipe?

³⁶ Me samo ka nakhav o Jordan e charoia, ¿soke mo charo ka pochinel mange pala murni buchi?

³⁷ Me moliv man chuke te muke man te iriv man kai mo foro, te merav kote ta te prajon man ande limori pasa me dada. A etalo kate aver sluga, mo chavo o Kimjam. Vou te llal e charoia, ta cher lea sogo mangea.

³⁸ A o charo phenda leke: Te avel manchar o Kimjam, ta me ka cherav pala le so tu mangea.

³⁹ Ta sa o foro nakhla o Jordan. Ta kana o charo nakhlo o pai, chumidia e Barzilaie ta blagosisarda le. Ta o Barzilai irisailo kai po foro.

⁴⁰ Ondaka o charo llelo ando Gilgal, ta lea llala o Kimjam. Sa o foro katar o Juda llala e charoia, ta i dopas katar o foro e Israeleko llelo lea.

⁴¹ Ondaka sa e israelitura avile kai o charo, ta phende leke: ¿Soke amare phlal katar o Juda inllarde tut, ta pomozisarde tut, che familia, che slugen ta che boñikonen te nakhel o Jordan?

⁴² Ta e llene katar o Juda phende e llenenge katar o Israel: Soke o charo si katar amari vicha. ¿Soke joliaon pe amende pala gua? ¿Amen ja e charoia? ¿Liam letar fisavo chari?

⁴³ A e llene katar o Israel phende lenge: Katar o charo perel amen des droma. Ta i amen sam e phlal mai purane neko tumen. ¿Soke tumen ni den amen liubao? ¿Ni sama amen e purve kai phende te irilpe o charo? A e llene katar o Juda die orba mai zurale neko e llene katar o Israel.