2 Samuel 17 - Biblia ande chib Romani

O Jusai peravel o mislo katar o Ajitofel

¹ Ondaka o Ajitofel phenda e Absaloneke: Me ka esviriv desudui milie murusen, ta isto gaia riat ka llav te rodav e Davide.

² Kana vou ka avel chinio ka dav pe lete, ka daravav le ta sa o foro kai si lea ka nasel. Ta kana o charo ka achel korkorre, me ka mundarav le,

³ soke tu mange te mundare samo iekhe llene. Gia ka cherav te irilpe tute o foro, ta kana sa ka aven tuia ka avel e pas.

⁴ Goia orba pela drago e Absaloneke ta e phurenge katar o Israel.

⁵ Ta o Absalon ikharda e Jusaie arkitae te asunel so mislila vou.

⁶ Kana o Jusai avilo, o Absalon phenda leke: Gia mangel te cherel o Ajitofel ¿Ka chera le gia o iok? Phen amenge so misli tu.

⁷ Ondaka o Jusai phenda e Absaloneke: Inai sukar so mislil o Ajitofel.

⁸ Tu llane kai cho dad ta leke boñikura si murusa tromane ta von si pherde zalba, sargo e melleda kana len latar lake minonen. Ta i cho dad si murus marimako, ta gaia riat ni ka mukel e foro te lelpe lendar o chinipe.

⁹ Akana vou gurudol ande iek pechina o ande aver than. Sai avel kai ando maripe ka peren nesave katar che boñikura, ta ando foro ka mislin kai dobisarde tut,

¹⁰ ta i o lleno tromano kai leko lio si sargo lionoko ka jasarel sa pi zor, soke sa o Israel llanel kai cho dad si iek lleno tromano, ta e llene kai si lea si zurale.

¹¹ Me phenav kai mai sukar avela te chidiniaon tuia sa e israelitura katar o Dan llik o Berseba sargo e chisai e moraki, ta tu te inllaren len po maripe.

¹² Ondaka ka da pe cho dad kaigo avela, ta ka pera pe lete sargo o pai kana pechalpeke pe phuv, ta ni ka muka llundo lendar ni iek.

¹³ A te gurudol ande iek foro, sa e israelitura e solenchar ka inllara terrindo e foro karing o pai, ta ni ka achel ni iek bar katar gua foro.

¹⁴ Ondaka o Absalon ta sa e israelitura phende kai sar phenela o Jusai saia mai sukar neko o Ajitofel. Soke isto o Del murisarda so mangela te cherel o Ajitofel te sai avel e zatrania po Absalon.

¹⁵ Mapalal o Jusai phenda e poponenge e Sadokeke ta e Abiatareke so mangela te cherel o Ajitofel, ta so phenda vou te cheren,

¹⁶ te sigaren te phenen le e Davideke te na nakhen e riat pe umalia katar o pusto, ta oma te nakhen o Jordan te na mundaren e charo ta sa e foro kai si lea.

¹⁷ Ta o Jonatan ta o Ajimaas sea pasa o bunari katar o Rogel, ta iek diskinia sluga avili te phenel lenge soke von nasti sikadona e foroke, ta von llele te phenen le e charoke o David.

¹⁸ A iek chaurro dikhla len ta llelo kai o Absalon te phenel leke. Ondaka o Jonatan ta o Ajimaas sigarde te nasen ta avile ando Bajurim, ta gurudile ando o bunari kai saia ande iekhe lleneko cher.

¹⁹ Ta e rromi katar gua lleno thoda upral po bunari iek gertachi ta pe lete chudia lliu, ta niko ni llangla niso.

²⁰ Kana avile e sluge katar o Absalon, puchle e diskinia: ¿Kaitalen o Ajimaas ta o Jonatan? Ta e diskinia phenda lenge: Von nakhle katar ta llele ando Jordan. Ta e sluge llele te roden len, a ni malade len ta irisaile ando Jerusalem.

²¹ Ta kana e sluge lleletar, putarde o bunari ta o Ajimaas ta o Jonatan likiste ta llele kai o David te phenen leke te ustel ta te nakhel o pai, soke o Ajitofel phendaia te den pe lete.

²² Ondaka o David ustilo ta sa o foro kai saia lea, ta sa nakhle o Jordan mai anglal te pharron e zore. Sa nakhle, ni iek ni achilo bi te nakhel o Jordan.

²³ Ta kana o Ajitofel dikhla kai ni cherde pe leko, ustilo pe iek magarcho ta llelotar kai po cher. Mapalal kana lacharda sa e ezgode katar pi familia, umbladape. Gia mulo o Ajitofel ta prajosarde le pasa o limori leke dadeko.

O David ando Majanaim

²⁴ Ta o David avilo ando Majanaim. Ta o Absalon nakhlo o Jordan sa e llenenchar katar o Israel.

²⁵ Ta o Absalon thoda e Amasa gazda katar e boñikura po than katar o Joab. O Amasa saia chavo katar iek lleno ando Israel kai ikhardola Itra. Gua Itra amisailo e Abigailaia e chorri katar o Najas, a e Abigail saia e phei katar o Seruia ta e dei katar o Joab.

²⁶ O Absalon ta sa o Israel logle ande phuv katar o Galaad.

²⁷ Kana o David avilo ando Majanaim, likiste te maladon lea o Sobi chavo katar o Najas kai saia katar e Raba ande phuv katar o Amon, o Makir chavo katar o Amiel kai saia katar o Lodebar, ta o Barzilai kai saia katar o Rogelim ande phuv katar o Galaad.

²⁸ Ta ande e Davideke ta e llenenge kai sea lea, astukura, tasura, piria, lliu, sebada, arina, simicha peki, lenteje, abe, garbanso peko,

²⁹ aullin, kaimako, bakre ta chiral guruvano te jan, soke phenena kai o foro saia bokhalo ta trusalo po pusto.