2 Samuel 16 - Biblia ande chib Romani

O David ta o Siba

¹ Kana o David nakhlo mai incha katar o than mai vazdino katar o burdo, o Siba kai saia sluga katar o Mefi Boset likisto de malavel le. Ta o Siba anela dui magarche kai inllarena dui stotine marrne, stotina pogache drakhake, stotine marrne cherde simochinenchar suke, ta iek morchi moliaki.

² Ta o charo phenda e Sibake: ¿Soke ane sa gala ezgode? Ta o Siba phenda leke: E magarche si te llan pe lende e familia katar o charo, e marrne ta e drakha suke si te jan e sluge, ta e mol si te pien gola kai ka chinion po pusto.

³ Ta o charo puchla le: ¿Kai talo o unuko che gazdako? Ta o Siba phenda leke: Llelotar ando Jerusalem, soke phenda gia: Akana o foro e Israeleko ka iril mange e charoina me dadeki.

⁴ Ondaka o charo phenda e Sibake: Sa so si le o Mefi Boset, si chiro. Ta o Siba dia changa angla o charo ta phenda leke: ¡Dav tut fala glamno charo pala so chere mange, daboida te dikhe pe ma dragostimaia, gazda murno!

⁵ Ta o charo avilo llik kai o Bajurin. Ta iek lleno katar e familia e Sauleki kai ikhardola Simei, chavo katar o Gera, likisto te malavel le ta dela le armaia,

⁶ ta chudela barra ando David ta ande sluge e charoke. Ta sa o foro ta sa e murusa mai tromane sea pe chachi ta po stingo e Davideko.

⁷ Ta o Simei dela le armaia ta phenela leke: ¡Llatar katar, lleno bilacho kai samo mundare!

⁸ ¡O Del dukhada tut pala sa o mundaripe kai cherdan e familiake katar o Saul, te sai ave tu o charo! ¡Akana o Del dia e charoina ande va che chaurreke o Absalon, ta dik pelan isto ande cho bilachipe, soke san iek lleno kai samo mundare!

⁹ Ondaka o Abisai chavo katar o Seruia, phenda e charoke: ¿Soke gava llukel mulo del armaia e charo? ¡Isto akana ka chinav leki kor!

¹⁰ Ta o charo phenda: Tumen na phenen niso katar murne ezgode, chave e Seruiake. Te si kai vou del man armaia, gua si soke o Del phenda leke te cherel le. ¿Ko sai puchel e Devle, soke chere gia?

¹¹ Ta o David phenda e Abisaieke ta leke slugenge: Isto mo chavo mangel mundarel man. ¡Gachin ios ka mangel te mundarel man iek lleno katar e vicha e Benjamineki! Muken le, o Del phenda leke te del man armaia.

¹² Sai avel kai o Del ka dikhel mo tristope, ta ka blagosil man pala e armaia kai asundem allive.

¹³ Ta kana o David ta e llene kai llana lea phirena po drom, o Simei llala po ogoia rig katar o burdo ta dela armaia e Davide ta chudela barra ta prajo.

¹⁴ Ta o charo ta sa o foro kai saia lea avile chinie, ta achile kote te lelpe lendar o chinipe.

O Absalon del ando Jerusalem

¹⁵ O Absalon ta e israelitura die ando Jerusalem, ta lenchar saia o Ajitofel.

¹⁶ Ta o Jusai arkita, o amal e Davideko, likisto te maladol e Absalonea, ta urkindo phenela: ¡Te zivil o charo, te zivil o charo!

¹⁷ Ta o Absalon phenda e Jusaieke: ¿Gia chere che amaleke? ¿Soke ni llelan che amalea?

¹⁸ Ta o Jusai phenda leke: ¡Nasti, soke me morabi te avav kote kai si o esvirime e Devletar ta e forotar katar o Israel!

¹⁹ ¿Kako sluga morabi te avav me? ¿Inai e chaveko katar mo amal? Isto gia sar radisardem angla cho dad, ka radiv angla tu.

²⁰ Ondaka o Absalon puchla e Ajitofele: ¿So phene mange kai morabi te chera?

²¹ Ta o Ajitofel phenda e Absaloneke: Amisao e konkubinenchar che dadeke kai thoda len te arakhel o cher, ta sa o foro ka asunel kai cho dad murzil pe tute pala so cherdan, ta gia ka len zor e llene kai si tuia.

²² Ondaka vazdie iek chara upral po cher, ta o Absalon amisailo kote pe dadeke konkubinenchar angla e akha katar sa o Israel.

²³ Ta ande gola llivesa kana puchena e Ajitofele so saia te cheren, saia sargo kana puchena e Devle. Gia mislinape katar o David ta katar o Absalon.