2 Samuel 12 - Biblia ande chib Romani

O Natan del po David

¹ O Del bichalda e Natane kai o David, ta kana avilo lete phenda leke: Ande iek foro sea dui llene. Iek saia barvalo a o gua saia chorro.

² E barvale sea but bakre ta guruva,

³ a e chorre saia le samo iek bakri kai chinda ta bariarda. Ta e bakri barili leke chaurrenchar, ta jala katar leki sinia ta sovela pe leko brek, ta voi saia sargo leki chorri.

⁴ Iek llive avilo kai o barvalo iek lleno te dikhel le, a o barvalo ni lia katar pe bakre ta katar pe guruva te chiravel zumi e lleneke kai aviloa lete, a lia e bakri katar o chorro, mundarda la, chirada la ta cherda iek jape gole lleneke.

⁵ Ondaka o David jolailo zurale, ta phenda e Nataneke: ¡Ando anav e Devleko phenav chuke kai o lleno kai cherda gua, si te merel!

⁶ Ta si te pochinel pala e bakri star droma mai but pala so cherda, soke ni avila leke zalba.

⁷ Ondaka o Natan phenda e Davideke: ¡Tu san gua lleno! Ta gia phenel o Del e Israeleko: Me thodem tut te ave charo katar o Israel, ta braduisardem tut katar o Saul,

⁸ ta diem tut o cher katar cho gazda, diem tut leke diskinien. Ta na samo gua, soke diem tut o foro katar o Israel ta o Juda, ta sai diema tut ios mai but.

⁹ ¿Soke ni thodan sama po alav e Devleko ta cherdan o bilachipe angla leke akha? Mundardan e Uriase o jeteo e jarnienchar katar e amonitura, ta lian leki rromia.

¹⁰ Goleke, soke ni thodan mange sama ta lian pala tu e rromia katar o Urias o jeteo, o silnope nikada ni ka llaltar katar chi familia.

¹¹ Me o Del phenav chuke. Ka cherav te vazdiniaol o bilachipe katar chi familia pe tute, ta angla tu ka lav che diskinien ta ka dav len avere lleneke, ta vou ka amilpe lenchar ollivesea.

¹² Tu cherdan le po chorial, a me ka cherav le angla sa o Israel ollivesea.

¹³ Ondaka o David phenda e Nataneke: Cherdem o bilachipe angla o Del. Ta o Natan phenda e Davideke: O Del prostisarda tut. Ni ka mere.

¹⁴ A tu cherdan te kusen e Devle e dusmanura e Devleke, goleke cho minono kai biandilo ka merel.

¹⁵ Ta o Natan irisailo kai po cher. Ta o Del cherda te avel but nasualo o minono kai maladiloia e rromiake katar o Urias.

¹⁶ Ondaka o David molisailo e Devleke te sastol o minono. Cherda alluno, ta nakhela e riat inzardo pe phuv.

¹⁷ Ta e phure katar o cher avile te vazden le katar e phuv. A vou ni kamla ta ni jala lenchar.

¹⁸ Pala eftato llive o minono mulo, ta e sluge e Davideke darana te phenel leke kai o minono muloa, ta phenena iek avereke: Kana o minono saia llundo, ni kamela te asunel amen, ¿sar akana ka phena leke kai o minono mulo? ¡Sai cherel iek baro dilipe!

¹⁹ Ta kana o David dikhla kai leke sluga balavina maskar pete, acharda kai leko minono mulo, ta puchla pe slugen: ¿Mulo o minono? A e sluge phende leke: Ea, mulo.

²⁰ Ondaka o David ustilo katar e phuv, jaladape, lachardape, ta dia ando cher e Devleko, ta blagosisarda e Devle. Mapalal avilo kai po cher, mangla te anen leke marrno, ta jala.

²¹ Ta leke sluge phende leke: ¿So chere glamno charo? Kana o minono saia llundo cherea alluno ta rovea pala le. Akana kai mulo, ustilan katar e phuv ta thodan tut te ja.

²² Ta o David phenda lenge: Kana vou saia llundo me cherava alluno ta rovava soke misliva kai e Devleke ka avel zalba letar ta kai ka mukel le te zivil.

²³ Akana kai o minono mulo, ¿pala so ka cherav alluno? ¿Sai cherav me te iril pe? Me llav lete, a vou ni ka irilpe mande.

Biandol o Salomon

²⁴ Mapalal o David dia zor pe rromia e Betsabee. Llelo late ta sovto laia, ta maladila lake iek chaurro ta thoda leko anav Salomon, ta Del volisarda le,

²⁵ ta o Del bichalda e Natane o profeta, te phenel te thoven e minoneko anav Jedidias.

O David lel e foro katar e Raba

²⁶ O Joab marelape e foroia e Raba kai saia katar e amonitura, ta lia o foro e charoko.

²⁷ Ondaka o Joab bichalda llenen kai o David te phenen leke: Phanglem o foro katar e Raba ta e llene katar o foro nasti llan te len peke pai.

²⁸ Chide e boñikonen kai achen ta de po foro ta le le, soke te lav le me, ka ikharav le pe mo anav.

²⁹ Ta o David ikharda saurren katar o foro, mardepe e Rabaaia ta lie la.

³⁰ Ta o David lia e korona katar o charo, ta e korona phariavela tranda ta trin kile. Sea la klea but sukar, ta thode la po soro e Davideko. Ta o David lia but ezgode katar o foro.

³¹ Ta e llenen kai sea ando foro ikanda len kotar ta thoda len te chinen kasta e toverenchar ta te radin e phuv e sastrenchar. Mapalal o David irisailo pe boñikonenchar ando Jerusalem.