2 Samuel 11 - Biblia ande chib Romani

O David ta e Betsabe

¹ Kana nakhla burs llive ta saia o vreme kana e charura llana po maripe, o David bichalda e Joabe, e slugen, ta saurren katar o Israel te marenpe e amonitonenchar. Ta dobisarde len ta thodepe truial katar o foro o Raba. A o David achilo ando Jerusalem.

² Iek llive kana perela o kham, o David likisto katar pi soba ta phirela upral po cher. Ta dikhla kotar iekhe diskinia but sukar kai naiola.

³ Ondaka o David bichalda te puchen latar, ta phende leke: Goia diskinia si e Betsabe chorri e Eliameki, rromi e Uriaseki o jitita.

⁴ Ta o David bichalda llenen te anen la, ta voi avili lete ta vou sovto laia. Mapalal voi chistosaili katar po pokalipe, ta irisaili kai po cher.

⁵ Ta voi achili khamni, ta bichalda llenen te phenen le e Davideke.

⁶ Ondaka o David bichalda te phenen e Joabeke te anel e Uriase o jitita. Ta o Joab bichalda e Uriase kai o David.

⁷ Kana o Urias avilo, o David puchla le sar saia o Joab, puchla le katar o foro ta sar llala o maripe.

⁸ Mapalal o David phenda e Uriaseke: Lla kai cho cher ta jalav che porrne. Ta kana o Urias likisto katar o cher e charoko ande leke jape katar e sinia e charoki.

⁹ A o Urias thodape te sovel po udar katar o cher e charoko e slugenchar e gazdake, ta ni llelo kai po cher.

¹⁰ Ta phende e Davideke kai o Urias ni llelo kai po cher, ta o David puchla le: ¿Ni avilam duratar? ¿Soke ni llelan kai cho cher?

¹¹ Ta o Urias phenda e Davideke: E arka e Devleki, o Israel ta o Juda si ande chare ta mo gazda o Joab ta leke sluge si ando vos ¿A me sai llava kai mo cher te jav, te piav ta te sovav me rromiaia? Dur mandar te cherav gaia ezgoda.

¹² Ta o David phenda e Uriaseke: Achi kate allive, thiara ka Bichalav tut pale po maripe. Ta o Urias achilo ando Jerusalem llik thiarinako.

¹³ Ta o David ikharda le te jal ta te piel lligo ni matarda le. Ta orachaia o Urias likisto ta llelo te sovel e slugenchar e gazdake, ta ni llelo kai po cher.

¹⁴ Thiarinako o David pisisarda iek lil e Joabeke, ta bichalda le e Uriasea.

¹⁵ Ta ando lil phenela: Thou e Uriase chak anglal kote kai o maripe si mai baro. Muken le korkorre te ranisaren le ta te merel.

¹⁶ Gia kana o Joab thodape truial katar o foro te del pe lete, thoda e Uriase pe rig kai sea e boñikura mai tromane,

¹⁷ ta likiste e boñikura katar o foro ta mardepe e Joabea, ta nesave katar e sluge e Davideke mule, ta i mulo o Urias jeteo.

¹⁸ Ondaka o Joab bichalda iekhe llene e Davideke sar llala o maripe.

¹⁹ Ta phenda e lleneke gia: Kana ka phene e charoke sar llal o maripe,

²⁰ te joliaola ta te phenela chuke: ¿Soke sena gia pase katar o foro te marenpe? ¿Ni llanen so chuden von katar o zido?

²¹ ¿Ko ranisarda e Abimeleke chavo katar o Jerobaal? ¿Ni saia kai iek diskinia chudia iek kotor barr kai moren o lliu, ta mulo ando Tebes? ¿Soke sena gia pase katar o zido? Ondaka tu ka phene leke gia: Cho sluga o Urias jeteo, i vou mulo.

²² O lleno llelo kai o David, ta phenda leke sa so phenda o Joab.

²³ Ta phenda gia e Davideke: E boñikura kai likiste ando vos te marenpe amenchar dobina amen. Mapalal amen cherdam len te irinpe llik kai o udar e foroko,

²⁴ ta katar o zido chudie llide ande che sluge, ta nesave katar che sluge mule, ta i mulo cho sluga o Urias o jeteo.

²⁵ Ta o David phenda e lleneke: Phen e Joabeke te na daral, soke gia si o maripe. A tu de le zor ta phen leke te del po foro mai zurale lligo ni ka zatril le.

²⁶ Kana e rromi e Uriaseki llangla kai lako rrom mulo, rovda pala le.

²⁷ Ta kana nakhle e llivesa zalosne, o David anda la kai po cher, cherda la pi rromi ta maladila lake iek minono. A so cherda o David ni pela drago e Devleke.