2 Relles 9 - Biblia ande chib Romani

O Jeu si chinado te charoil ando Israel

¹ O Eliseo ikharda iekhe profeta ta phenda leke: Lachar tut te lla ando Ramot katar o Galaad ta inllar gava taso zeitino ande cho va.

² Kana ka ave incha rode e Jeue chavo katar o Josafat ta unuko katar o Nimsi. De andre kote kai si vou pe phalenchar, cher te ustel ta inllar le ande aver soba.

³ Ondaka le o zeitino ta thov le pe leko soro, ta phen: Gia phenel o Del: Me thovav tut charo katar o Israel. Mapalal putar o udar ta nas ta na achi.

⁴ O profeta terno llelo ando Ramot katar o Galaad,

⁵ ta kana avilo dikhla kai e gazda katar e boñikura sea chidine, ta phenda: Si man iek alav te phenav me gazdake katar e boñikura. O Jeu phenda: ¿Kake amendar? O profeta phenda: Chuke, mo gazda e boñikonengo.

⁶ Ondaka o Jeu ustilo ta dia ande soba ta o profeta thoda o zeitino pe leko soro, ta phenda: O Del e Israeleko phenel gia: Me thovav tut charo katar o Israel mo foro.

⁷ Tu ka zatri e familia katar cho gazda o Ajab, te sai pochinel o rat katar me poraukura ta me sluge kai e Jezabel mundarda.

⁸ Sa e familia katar o Ajab ka avel zatrime. Me ka cherav te na achel llundo ni iek murus, ni o sulga ni gua kai inai sluga, katar leki familia ando Israel.

⁹ So cherdem e familiake katar o Jeroboam chavo katar o Nabat ta o Baasa chavo katar o Ajias, ka cherav le e familiake katar o Ajab.

¹⁰ Ta e llukela ka jan e Jezabela ande umal katar o Jezreel ta ni ka avel niko te prajol la. Kana o profeta phenda gala alava, putarda o udar ta naslo.

¹¹ Ta kana o Jeu pale llelo kai sea e boñikura, von puchle le: ¿So si? ¿So mangela gua dilo? A o Jeu phenda lenge: Tumen pinllaren le ta llanen sar del orba.

¹² E boñikura phende leke: Na kojav. ¡Phen amenge sa! Ondaka o Jeu phenda lenge: Vou phenda mange gia: Gia phenel o Del: Me thovav tut charo katar Israel.

¹³ Ondaka saurre lie po gertachi oma ta thode len angla e porrne katar o Jeu pe iek trono vazdino. Basalde ande tuturuge, ta urkisarde: ¡O Jeu si o charo!

O Jeu mundarel e Jorame

¹⁴ O Jeu chavo e Josafateko ta unuko katar o Nimsi, mislisailo te mundarel e Jorame. Ondaka o Joram ta sa o Israel arakhena e foro katar o Ramat ando Galaad soke o Jazael, o charo katar e Siria, mangela te del po foro,

¹⁵ ta avilo ando Jezreel te sai sastol katar po ranipe kana mardaiape e sirionenchar. Ondaka o Jeu phenda e boñikonenge: Te si kai istina mangen te avel vou o charo, na muken nika te likel katar o foro te phenen e viasta ando Jezreel.

¹⁶ Mapalal o Jeu likisto ande po bordon ta llelo ando Jezreel kai saia o Joram ande postelia. Ta i o Okosias o charo katar o Juda lleloia te dikhel e Jorame.

¹⁷ Kana o boñiko kai arakhela dikhla kai o Jeu avela pe boñikonenchar, urkisarda: ¡Aven llene! Ta o Joram phenda: Bichalen iekhe llene te llal po gra te puchel len soke aven.

¹⁸ Ta o lleno llelo po gra te dikhel e Jeue, ta phenda leke: O charo bichalda man te pucha soke aven. O Jeu phenda: Ni chitilpe chuke. ¡Thou tut palal pala ma! Ondaka o boñiko kai arakhela e foro phenda: O bichaldo avilo lende ta ni dikhav kai irilpe.

¹⁹ Mapalal o charo bichalda avere llene te llal po gra. Vou avilo lende ta phenda lenge: O charo mangel te llanel soke aven. O Jeu phenda leke: Ni chitilpe chuke. ¡Thou tut palal pala ma!

²⁰ O boñiko kai arakhela e foro pale phenda: I gava lleno avilo lende ta ni dikhav kai irilpe. O lleno kai avel po bordon sai te avel o Jeu, o unuko katar o Nimsi, soke tradel o bordon sargo dilo.

²¹ Ondaka o Joram phenda: ¡Lacharen mo bordon e marimako! Lacharde leko bordon, ondaka o Joram ta o Okosias likiste pe bordona te malaven e Jeue. Ta malade le ande umal kai saia katar o Nabot ando Jezreel.

²² Ta kana o Joram dikhla e Jeue, phenda leke: ¿Ave ande pas Jeu? A o Jeu phenda leke: ¿Sar ka avav ande pas kana chi dei cherel o kurvaluko ta e chirimate?

²³ O Joram boldinailo ta naslo ande po bordon, ta urkila e Okosiaseke: ¡Okosias, von si dusmanura!

²⁴ A o Jeu lia po arko ta chudia iek llida ando Joram. E llida dia katar leke sea ta likisti katar leko lio, ta o Joram mulo ande po bordon.

²⁵ Ondaka o Jeu phenda pe slugake o Bidkar: Ikan le kotar ta chude le ande umal katar o Nebot katar o Jezreel. De tut golli kai kana tu ta me llelam pasa o bordon marimako katar o Ajab, o Del proketisarda le ta phenda:

²⁶ Isto gia sar arachi dikhlem o rat katar o Nabot ta o rat katar leke chave, isto gia ka cherav te pochine pe gava than. Me o Del phenav le. Goleke chude le ande umal katar o Nabot.

O Jeu mundarel e Okosiase

²⁷ Kana o Okosias, o charo katar o Juda, dikhla so nakhla, naslo po drom katar o Bet Agan. A o Jeu rodia le, ta phenda: ¡Mundaren i le! Ta ranisarde le ande leko bordon po burdo katar o Gur pasa o Ibleam, a vou naslo llik kai o Megido, ta kote mulo.

²⁸ Mapalal leke boñikura inllarde le pe iek bordon ando Jerusalem ta prajosarde le leke puranenchar ande leko limori, ando foro katar o David.

²⁹ O Okosias thodape te charoil ando Juda kana nakhle desuiek burs sar kana charoila o Joram, o chavo e Ajabeko.

O meripe katar e Jezabel

³⁰ O Jeu llelotar ando Jezreel. Ta kana llanglale e Jezabel, makhla pe akha ta lacharda pe bal. Mapalal thodape te dikhel katar e penllerava.

³¹ Ta kana o Jeu avilo po udar e foroko, voi phenda leke: ¿Sar san Zimri kai mundardan che gazda?

³² O Jeu dikhla karing e penllerava, ta phenda: ¿Ko llal pala ma? Ta dui o trin eunukura likiste te dikhen le,

³³ ta o Jeu phenda lenge: ¡Chuden la tele! Von chudie la tele, ta lako rat jutlo po zido ta pe gra, ta o Jeu dia upral pe late.

³⁴ Mapalal o Jeu llelotar te jal ta te piel, ta phenda: Llan te dikhen gale diskinia proketime ta prajon la, soke voi saia chorri katar iek charo.

³⁵ Ta kana llele te prajon la malade samo e kokala katar lako soro, katar lake porrne ta katar lake va.

³⁶ E llene irisaile te phenen e Jeueke, ta o Jeu phenda: O Del phendaia katar po sluga o Elias tisbita, kai e llukela ka jan laki esnaga ande umal katar o Jezreel,

³⁷ ta kai laki esnaga muli ka avel rispime sargo e pogastia ande umal katar o Jezreel, ta niko nasti ka pinllarel la.